ಮುಂಬೈ: ಆಸ್ಟ್ರೇಲಿಯಾದಲ್ಲಿ ನಡೆಯಬೇಕಿದ್ದ 2020 ಟಿ -20 ವಿಶ್ವಕಪ್ ಅನ್ನು ಐಸಿಸಿ ಮುಂದೂಡಿದ ಬೆನ್ನಲ್ಲೇ ಬಿಸಿಸಿಐ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಅನ್ನು ಈ ವರ್ಷದ ಕೊನೆಯಲ್ಲಿ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಗೆ ಸ್ಥಳಾಂತರಿಸಲು ಕೇಂದ್ರ ಸರ್ಕಾರದ ಅನುಮೋದನೆಗೆ ಕೋರಿಕೆ ಸಲ್ಲಿಸಿದೆ.
ಕೋವಿಡ್ -19 ಭೀತಿಯ ಕಾರಣ ಐಸಿಸಿ ಸೋಮವಾರದ ವರ್ಚುವಲ್ ಮೀಟಿಂಗ್ನಲ್ಲಿ 2020ರ ಟಿ-20 ವಿಶ್ವಕಪ್ ಅನ್ನು ಮುಂದೂಡುವ ನಿರ್ಧಾರ ತೆಗೆದುಕೊಂಡಿತ್ತು. ಈ ನಿರ್ಧಾರ ಹೊರಬರುತ್ತಿದ್ದಂತೆ ಕಾಯುತ್ತಿದ್ದ ಬಿಸಿಸಿಐ ಐಪಿಎಲ್ ಸಿದ್ದತೆ ಆರಂಭಿಸಿದೆ.
ಈ ಕುರಿತು ಮಾತನಾಡಿರುವ ಐಪಿಎಲ್ ಆಡಳಿತ ಮಂಡಳಿ ಅಧ್ಯಕ್ಷ ಬ್ರಿಜೇಶ್ ಪಟೇಲ್, "ಯುಎಇಗೆ ಐಪಿಎಲ್ ಸ್ಥಳಾಂತರ ಮಾಡಲು ಕೇಂದ್ರ ಸರ್ಕಾರಕ್ಕೆ ಇಂದು ಬೆಳಗ್ಗೆ ಔಪಾಚಾರಿಕವಾಗಿ ಅನುಮತಿ ಕೋರಿದ್ದೇವೆ. ಸರ್ಕಾರದ ಪ್ರತಿಕ್ರಿಯೆಯನ್ನು ಗಮನಿಸಿ , ಆಡಳಿತ ಮಂಡಳಿ ಲೀಗ್ನ ವೇಳಾಪಟ್ಟಿ ಅಂತಿಮಗೊಳಿಸಲಿದೆ" ಎಂದು ತಿಳಿಸಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ಸೋಮವಾರ ಸಂಜೆ 2020ರ ಟಿ-20 ವಿಶ್ವಕಪ್ ಅನ್ನು 2022 ಕ್ಕೆ ಮುಂದೂಡಿತ್ತು. ಐಸಿಸಿ ಈ ಘೋಷಣೆ ಮಾಡುತ್ತಿದ್ದಂತೆ ಇತ್ತ ಬಿಸಿಸಿಐ ಐಪಿಎಲ್ ಸಿದ್ದತೆ ನಡೆಸಲು ಅಖಾಡಕ್ಕೆ ದುಮುಕಿದ್ದು, ಈಗಾಗಲೆ ಲೀಗ್ ರೂಪುರೇಷೆಗಳನ್ನು ಸಿದ್ದಪಡಿಸಿಕೊಳ್ಳಲಾರಂಭಿಸಿದೆ.
ಪ್ರಸಾರಕರ ಜೊತೆ ಮಾತುಕತೆ ನಡೆಸಿದ ನಂತರ್ ಸೆಪ್ಟೆಂಬರ್ 26ರಿಂದ ನವೆಂಬರ್ 7ರವರೆಗೆ ಅಥವಾ ಸೆಪ್ಟೆಂಬರ್ 26ರಿಂದ ನವೆಂಬರ್ 14ರ ಮಧ್ಯೆ ಐಪಿಎಲ್ ನಡೆಸಲಾಗುತ್ತದೆಯೇ ಎಂಬ ಗೊಂದಲದ ಬಗ್ಗೆ ಪಟೇಲ್ ಪ್ರತಿಕ್ರಿಯಿಸಲು ಹಿಂದೇಟು ಹಾಕಿದ್ದಾರೆ.
