ಮುಂಬೈ: ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಆಯ್ಕೆ ಸಮಿತಿಯಲ್ಲಿ ಖಾಲಿ ಉಳಿದಿರುವ ಹುದ್ದೆಗಳಿಗೆ ಅರ್ಜಿ ಅಹ್ವಾನಿಸಿದೆ.
ಭಾರತ ಹಿರಿಯ ಕ್ರಿಕೆಟಿಗರ ತಂಡದ ಆಯ್ಕೆಸಮಿತಿ ತಂಡದ ಮುಖ್ಯಸ್ಥರಾಗಿರುವ ಎಂಎಸ್ಕೆ ಪ್ರಸಾದ್ ಹಾಗೂ ಮತ್ತೊಬ್ಬ ಸದಸ್ಯರಾಗಿರುವ ಗಗನ್ ಖೋಡ ಅವರ ಅವಧಿ ಮುಗಿದಿದ್ದು ಖಾಲಿಯಾಗುವ ಅವರ ಸ್ಥಾನ ತುಂಬಲು ಬಿಸಿಸಿಐ ಅರ್ಜಿಗೆ ಅಹ್ವಾನ ನೀಡಿದೆ.
ಪುರುಷರ ತಂಡದ ಆಯ್ಕೆಸಮಿತಿಯಲ್ಲಿ 2 ಹುದ್ದೆಗಳ ಜೊತೆಗೆ ಸೀನಿಯರ್ ಮಹಿಳೆಯರ ತಂಡದ ಆಯ್ಕೆಸಮಿತಿಯಲ್ಲಿ 5 ಹುದ್ದೆಗಳು, ಹಾಗೂ ಜೂನಿಯರ್ ಮಹಿಳಾ ತಂಡದ ಆಯ್ಕೆಸಮಿತಿಯಲ್ಲಿ 2 ಹುದ್ದೆಗಳು ಖಾಲಿಯಿದೆ. ಜನವರಿ 24 ರೊಳಗೆ ಅರ್ಜಿ ಸಲ್ಲಿಸುವಂತೆ ಬಿಸಿಸಿಐ ತನ್ನ ವೆಬ್ಸೈಟ್ನಲ್ಲಿ ಜಾಹಿರಾತು ಪ್ರಕಟಿಸಿದೆ.
ಭಾರತ ಸೀನಿಯರ್ ತಂಡದ ಆಯ್ಕೆ ಸಮಿತಿ ಹುದ್ದೆಗೆ ಸೇರಬಯಸುವವರು ಭಾರತ ತಂಡದ ಪರ 7 ಟೆಸ್ಟ್ ಪಂದ್ಯಗಳನ್ನಾಡಿರಬೇಕು ಅಥವಾ 30 ಪ್ರಥಮ ದರ್ಜೆ ಪಂದ್ಯ, ಅಥವಾ 10 ಏಕದಿನ ಹಾಗೂ 20 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿರಬೇಕು ಎಂದು ಸೂಚಿಸಿದೆ.
ಮದನ್ಲಾಲ್, ಗೌತಮ್ ಗಂಭೀರ್ ಹಾಗೂ ಸುಲಕ್ಷಣ ನಾಯಕ್ ಸಂದರ್ಶನ ನಡೆಸುವಂತೆ ಕ್ರಿಕೆಟ್ ಸಲಹಾ ಸಮಿತಿ ಕೇಳಿಕೊಂಡಿದೆ ಎನ್ನಲಾಗಿದೆ. ಆದರೆ ಈ ಕುರಿತು ಇನ್ನು ಅಧಿಕೃತ ಮಾಹಿತಿ ಲಭ್ಯವಾಗಿಲ್ಲ.
