ಬಾಂಗ್ಲಾಕ್ಕೆ ಐತಿಹಾಸಿಕ ತ್ರಿಕೋನ ಸರಣಿ: ವಿಶ್ವಕಪ್​ಗೂ ಮುನ್ನ ವಿಂಡೀಸ್​ಗೆ ಮುಖಭಂಗ

ತ್ರಿಕೋನ ಏಕದಿನ ಸರಣಿಯಲ್ಲಿ ವೆಸ್ಟ್​ ಇಂಡೀಸ್​ ತಂಡವನ್ನು ಮಣಿಸಿದ ಬಾಂಗ್ಲಾದೇಶ ಐತಿಹಾಸಿಕ ಸಾಧನೆ ಮಾಡಿದೆ.

ಡಬ್ಲಿನ್​:ತ್ರಿಕೋನ ಸರಣಿಯ ಫೈನಲ್​ ಪಂದ್ಯದಲ್ಲಿ ವೆಸ್ಟ್​ ಇಂಡೀಸ್​ ತಂಡವನ್ನು 5 ವಿಕೆಟ್​ಗಳಿಂದ ಮಣಿಸಿದ ಬಾಂಗ್ಲಾದೇಶವು ಐತಿಹಾಸಿಕ ಸಾಧನೆ ಮಾಡಿದೆ.

ಡಬ್ಲಿನ್​ನಲ್ಲಿ ನಡೆದ ಸರಣಿಯ ಫೈನಲ್​ ಪಂದ್ಯದಲ್ಲಿ ಟಾಸ್ ​ಗೆದ್ದ ಬಾಂಗ್ಲಾ, ಕೆರಿಬಿಯನ್ನರನ್ನು ಬ್ಯಾಟಿಂಗ್​ಗೆ ಆಹ್ವಾನಿಸಿತು. ಉತ್ತಮ ಆರಂಭ ಪಡೆದ ವಿಂಡೀಸ್​ 24 ಓವರ್​ಗಳಲ್ಲಿ ಒಂದು ವಿಕೆಟ್​ಗೆ 152 ರನ್​ ಗಳಿಸಿದ್ದಾಗ ಪಂದ್ಯಕ್ಕೆ ಮಳೆ ಅಡ್ಡಿಪಡಿಸಿತು. ತಂಡಕ್ಕೆ ಆರಂಭಿಕರಾದ ಶೈ ಹೋಪ್​​ 74 ಹಾಗೂ ಸುನಿಲ್​ ಆಂಬ್ರಿಸ್​ 69 ರನ್​ ಬಾರಿಸಿ ವಿಂಡೀಸ್​ಗೆ ಒಳ್ಳೆಯ ಆರಂಭ ನೀಡಿದ್ದರು.

ಮಳೆಯಿಂದಾಗಿ ಪಂದ್ಯವನ್ನು 24 ಓವರ್​ಗೆ ಸೀಮಿತಗೊಳಿಸಿ ಬಾಂಗ್ಲಾಕ್ಕೆ 210 ರನ್​ಗಳ ಗೆಲುವಿನ ಗುರಿ ನೀಡಲಾಯಿತು. ರನ್​ ಬೆನ್ನಟ್ಟಿದ ಮೊರ್ತಜಾ ಪಡೆ, 22.5 ಓವರ್​ಗಳಲ್ಲಿ 5 ವಿಕೆಟ್​​ ಕಳೆದುಕೊಂಡು ಗೆಲುವಿನ ಕೇಕೆ ಹಾಕಿತು. ಆರಂಭಿಕ ಆಟಗಾರ ಸೌಮ್ಯ ಸರ್ಕಾರ್​ 66, ಮುಷ್ಫಿಕರ್​ ರಹೀಮ್​ 36 ಹಾಗೂ ಮೊಸಾದ್ದೇಕ್​ ಹೊಸೇನ್​ ಅಜೇಯ 52 ರನ್​ ಬಾರಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಬಾಂಗ್ಲಾದ ಮೊಸಾದ್ದೇಕ್​ ಹೊಸೇನ್ ಪಂದ್ಯ ಪುರುಷ ಹಾಗೂ ವಿಂಡೀಸ್​ನ ಶೈ ಹೋಪ್​ ಸರಣಿ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಬಾಂಗ್ಲಾಕ್ಕೆ ಐತಿಹಾಸಿಕ ಸರಣಿ:

ಇನ್ನು ವಿಂಡೀಸ್​ ಮಣಿಸಿದ ಬಾಂಗ್ಲಾ ಮೊದಲ ಬಾರಿಗೆ ಎರಡಕ್ಕಿಂತ ಹೆಚ್ಚು ದೇಶಗಳು ಪಾಲ್ಗೊಂಡಿದ್ದ ಸರಣಿಯನ್ನು ಗೆದ್ದು ಇತಿಹಾಸ ನಿರ್ಮಿಸಿದೆ. ಇದಕ್ಕೂ ಮುನ್ನ ಬಾಂಗ್ಲಾ ದ್ವಿಪಕ್ಷೀಯ ಸರಣಿಗಳನ್ನು ಮಾತ್ರ ಗೆದ್ದಿತು. ಮುಶ್ರಫೆ ಮೊರ್ತಜಾ ಈ ಸಾಧನೆಗೈದ ಮೊದಲ ಬಾಂಗ್ಲಾ ನಾಯಕರಾಗಿ ಹೊರಹೊಮ್ಮಿದರು. ಐರ್ಲೆಂಡ್​ ಕೂಡ ಪಾಲ್ಗೊಂಡಿದ್ದ ಈ ಸರಣಿಯಲ್ಲಿ, ಬಾಂಗ್ಲಾ ವಿರುದ್ಧದ ಎಲ್ಲ ಪಂದ್ಯಗಳಲ್ಲೂ ವಿಂಡೀಸ್ ಸೋಲು ಕಂಡಿತು.