ಇಂಗ್ಲೆಂಡ್​ ವಿರುದ್ಧ ಸರಣಿ ಗೆಲ್ಲುವ ಮೂಲಕ 20 ಸೂಪರ್​ ಲೀಗ್ ಪಾಯಿಂಟ್​ ಪಡೆದ ಆಸ್ಟ್ರೇಲಿಯಾ

ಬುಧವಾರ ಕೊನೆಗೊಂಡ ಕೊನೆಯ ಏಕದಿನ ಪಂದ್ಯದಲ್ಲಿ ಗ್ಲೆನ್​ ಮ್ಯಾಕ್ಸ್​ವೆಲ್​ ಹಾಗೂ ಅಲೆಕ್ಸ್ ಕ್ಯಾರಿ ಅವರ ಅದ್ಭುತ ಶತಕದ ನೆರವಿನಿಂದ ದಾಖಲೆ 303 ರನ್​ಗಳನ್ನು ಚೇಸ್​ ಮಾಡುವ ಮೂಲಕ ಆಸ್ಟ್ರೇಲಿಯಾ ತಂಡ 2-1 ರಲ್ಲಿ ಏಕದಿನ ಸರಣಿಯನ್ನು ವಶಪಡಿಸಿಕೊಂಡಿತು.

ಮ್ಯಾಂಚೆಸ್ಟರ್​: ಆಸ್ಟ್ರೇಲಿಯಾ ತಂಡ ತನ್ನ ಮೊದಲ ಐಸಿಸಿ ವಿಶ್ವಕಪ್​ ಸೂಪರ್ ಲೀಗ್ ಸರಣಿಯಲ್ಲಿ ಇಂಗ್ಲೆಂಡ್​ ವಿರುದ್ಧ 2-1ರಲ್ಲಿ ಗೆಲ್ಲುವ ಮೂಲಕ​ 20 ಅಂಕ ಪಡೆದಿದೆ.

ಬುಧವಾರ ಕೊನೆಗೊಂಡ ಕೊನೆಯ ಏಕದಿನ ಪಂದ್ಯದಲ್ಲಿ ಗ್ಲೆನ್​ ಮ್ಯಾಕ್ಸ್​ವೆಲ್​ ಹಾಗೂ ಅಲೆಕ್ಸ್ ಕ್ಯಾರಿ ಅವರ ಅದ್ಭುತ ಶತಕದ ನೆರವಿನಿಂದ ದಾಖಲೆ 303 ರನ್​ಗಳನ್ನು ಚೇಸ್​ ಮಾಡುವ ಮೂಲಕ ಆಸ್ಟ್ರೇಲಿಯಾ ತಂಡ 2-1ರಲ್ಲಿ ಏಕದಿನ ಸರಣಿಯನ್ನು ವಶಪಡಿಸಿಕೊಂಡಿತು.

ಐಸಿಸಿ ಈ ವರ್ಷದಿಂದ ಐಸಿಸಿ ವಿಶ್ವಕಪ್ ಏಕದಿನ ಸೂಪರ್​ ಲೀಗ್​ ಆರಂಭಿಸಿದ್ದು, ಇದರಲ್ಲಿ ಹೆಚ್ಚು ಅಂಕ ಪಡೆದ 7 ರಾಷ್ಟ್ರಗಳು 2023ರಲ್ಲಿ ಭಾರತದಲ್ಲಿ ನಡೆಯುವ ಏಕದಿನ ವಿಶ್ವಕಪ್​ಗೆ ನೇರ ಅರ್ಹತೆ ಪಡೆಯಲಿವೆ. ಇದೀಗ 5 ಬಾರಿಯ ವಿಶ್ವ ಚಾಂಪಿಯನ್​ ತಮ್ಮ ಮೊದಲ ಸರಣಿಯಲ್ಲಿ ವಿಜಯ ಸಾಧಿಸಿದ್ದು, 20 ಅಂಕ ಪಡೆದಿದೆ.

ಮ್ಯಾಕ್ಸ್​ವೆಲ್​ ಮತ್ತು ಅಲೆಕ್ಸ್​ ಕ್ಯಾರಿ

ಈಗಾಗಲೇ ಐರ್ಲೆಂಡ್​ ವಿರುದ್ಧ 2-1ರಲ್ಲಿ ಸರಣಿ ಗೆದ್ದಿದ್ದ ಇಂಗ್ಲೆಂಡ್ ಈ ಸರಣಿಯಲ್ಲಿ 10 ಅಂಕ ಪಡೆದು ಒಟ್ಟಾರೆ 30 ಅಂಕಗಳೊಂದಿಗೆ ಸೂಪರ್​ ಲೀಗ್​ನಲ್ಲಿ ಅಗ್ರಸ್ಥಾನ ಪಡೆದಿದೆ.

ಐಸಿಸಿಯ 12 ಸದಸ್ಯ ರಾಷ್ಟ್ರಗಳು ಹಾಗೂ 2015-17ರ ವಿಶ್ವ ಕ್ರಿಕೆಟ್​ ಲೀಗ್ ಚಾಂಪಿಯನ್​ಶಿಪ್​ ಗೆದ್ದಿರುವ ನೆದರ್ಲೆಂಡ್​ ಈ ಟೂರ್ನಿಯ ಭಾಗವಾಗಲಿವೆ. ಎಲ್ಲಾ ತಂಡಗಳು 4 ತವರು ಮತ್ತು 4 ವಿದೇಶಿ ಸರಣಿಗಳನ್ನು ಆಡಲಿವೆ. ಅಗ್ರ 7 ತಂಡಗಳನ್ನು ಹೊರತುಪಡಿಸಿ ಉಳಿದ ತಂಡಗಳು ಕ್ವಾಲಿಫೈಯರ್​ ಮೂಲಕ ವಿಶ್ವಕಪ್​ ಪ್ರವೇಶ ಮಾಡಬೇಕಾಗುತ್ತದೆ.

ಪ್ರತಿ ಪಂದ್ಯಕ್ಕೆ 10 ಅಂಕಗಳಿರುತ್ತವೆ. ಪಂದ್ಯ ರದ್ದಾದರೆ ಅಥವಾ ಟೈ ಆದರೆ ತಲಾ 5 ಅಂಕಗಳನ್ನು ಹಂಚಿಕೊಳ್ಳಲಿವೆ.