ಹೈದರಾಬಾದ್: ಭಾರತದ ಆಟಗಾರ ಅಂಬಾಟಿ ರಾಯುಡು ಹಾಗೂ ಚೆನ್ನಪಲ್ಲಿ ವಿದ್ಯಾ ದಂಪತಿಗೆ ಹೆಣ್ಣು ಮಗು ಜನಿಸಿದ್ದು, ರಾಯುಡು ಕೂಡ ಸಿಎಸ್ಕೆಯ ಡ್ಯಾಡ್ಸ್ ಆರ್ಮಿ ಸೇರಿಕೊಂಡಿದ್ದಾರೆ. ಈಗಾಗಲೆ ಚೆನ್ನೈ ಸೂಪರ್ ಕಿಂಗ್ಸ್ನಲ್ಲಿರುವ ಧೋನಿ, ರೈನಾ, ಬ್ರಾವೋ, ಪ್ಲೆಸಿಸ್, ಇಮ್ರಾನ್ ತಾಹೀರ್, ಹರ್ಭಜನ್ ಸಿಂಗ್, ವ್ಯಾಟ್ಸ್ನ್ ಸೇರಿದಂತೆ ತಂಡದಲ್ಲಿ ಹೆಚ್ಚಿನ ಆಟಗಾರರು ತಂದೆಯಾಗಿದ್ದಾರೆ.
ರಾಯುಡು ತಂದೆಯಾದ ವಿಚಾರವನ್ನು ಸಿಎಸ್ಕೆ ತನ್ನ ಅಧಿಕೃತ ಟ್ವಿಟರ್ನಲ್ಲಿ ಶೇರ್ ಮಾಡಿಕೊಂಡಿದೆ. ಅಪ್ಪನಾಗಿರುವ ಸಂಭ್ರಮದಲ್ಲಿರುವ ರಾಯುಡುಗೆ ಭಾರತದ ಕ್ರಿಕೆಟಿಗರು ಶುಭಾಶಯ ಕೋರಿದ್ದಾರೆ.
ಕಳೆದ ಎರಡು ಆವೃತ್ತಿಗಳಿಂದ ಚೆನ್ನೈ ಸೂಪರ್ ಕಿಂಗ್ಸ್ನಲ್ಲಿ ಆಡುತ್ತಿರುವ ರಾಯುಡು ಒಂದು ಆವೃತ್ತಿಯಲ್ಲಿ ಭರ್ಜರಿ ಆಟವಾಡಿ ಎಲ್ಲರ ಗಮನ ಸೆಳೆದಿದ್ದರು. ಆದರೆ, 2019ರಲ್ಲಿ ಅವರ ಆಟ ಮಂಕಾಗಿತ್ತು. ಅದೇ ಸಂದರ್ಭದಲ್ಲಿ ವಿಶ್ವಕಪ್ ತಂಡದಿಂದಲೂ ಹೊರಬಿದ್ದಿದ್ದರು. ಇದಾದ ನಂತರ ಕ್ರಿಕೆಟ್ಗೆ ಗುಡ್ಬೈ ಹೇಳಿದ್ದ ಅವರು ಮತ್ತೆ ನಿವೃತ್ತಿಯಿಂದ ಹೊರ ಬಂದಿದ್ದರು.
2020ರ ಐಪಿಎಲ್ನಲ್ಲಿ ಮತ್ತೆ ಉತ್ತಮ ಪ್ರದರ್ಶನ ತೋರಿ ಭಾರತ ತಂಡಕ್ಕೆ ಮರಳುವ ಆಲೋಚನೆಯಲ್ಲಿದ್ದ ರಾಯುಡು ಕೋವಿಡ್ 19 ಅಡ್ಡಗಾಲಾಗಿ ಪರಿಣಮಿಸಿದೆ. ನವೆಂಬರ್ನಲ್ಲಿ ಐಪಿಎಲ್ ಆಯೋಜನೆಗೊಳ್ಳುವ ಸಾಧ್ಯತೆಯಿದ್ದು ಈ ಟೂರ್ನಿ ಆಂಧ್ರ ಆಟಗಾರನಿಗೆ ಮಹತ್ವದ್ದಾಗಿದೆ.