ಮ್ಯಾಂಚೆಸ್ಟರ್:2016ರ ವಿಶ್ವಕಪ್ ಟಿ20 ಫೈನಲ್ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ಗೆಲುವಿಗೆ ಬೇಕಾಗಿದ್ದು ಬರೋಬ್ಬರಿ 19ರನ್. ಟೂರ್ನಿಯಲ್ಲೇ ಅತಿ ಹೆಚ್ಚು ಮಾರಕ ಬೌಲಿಂಗ್ ಮಾಡಿದ್ದ ಸ್ಟೋಕ್ಸ್ ಕೊನೆ ಓವರ್ ಮಾಡಲು ಸಜ್ಜಾಗಿದ್ದರು. ಆದರೆ ಆ ಓವರ್ನಲ್ಲಿ ವೆಸ್ಟ್ ಇಂಡೀಸ್ನ ಕಾರ್ಲೋಸ್ ಬ್ರಾತ್ವೇಟ್ ಸತತ ನಾಲ್ಕು ಸಿಕ್ಸರ್ ಸಿಡಿಸಿ ತಂಡಕ್ಕೆ ಗೆಲುವಿನ ಉಡುಗೊರೆ ನೀಡಿದ್ದು ಎಲ್ಲರಿಗೂ ಗೊತ್ತಿದೆ.
ಅದೇ ರೀತಿ ನಿನ್ನೆ ನ್ಯೂಜಿಲ್ಯಾಂಡ್ ವಿರುದ್ಧ ನಡೆದ ಪಂದ್ಯದಲ್ಲೂ ಕಾರ್ಲೊಸ್ ಬ್ರಾತ್ವೇಟ್ ಅದೇ ರೀತಿಯ ಪ್ರದರ್ಶನ ನೀಡಿದ್ದಾರೆ. ಆದರೆ ಕೊನೆಯ ಓವರ್ನಲ್ಲಿ ತಂಡಕ್ಕೆ ಕೇವಲ 5ರನ್ಗಳ ಅವಶ್ಯಕತೆಯಿದ್ದಾಗ ಸ್ಫೋಟಕ ಹೊಡೆತಕ್ಕೆ ಮುಂದಾಗಿ ಬೌಂಡರಿ ಗೆರೆಯಲ್ಲಿ ಕ್ಯಾಚ್ ನೀಡುವ ಮೂಲಕ ತಂಡವನ್ನ ವಿರೋಚಿತವಾಗಿ ಸೋಲುವಂತೆ ಮಾಡಿದ್ದಾರೆ. ಆದರೆ ಇವರ ಈ ಅಬ್ಬರದ ಬ್ಯಾಟಿಂಗ್ ವೈಖರಿಗೆ ಎದುರಾಳಿ ನ್ಯೂಜಿಲೆಂಡ್ ಫುಲ್ ಫಿದಾ ಆಗಿದೆ.
40 ಓವರ್ಗಳಲ್ಲಿ 8ವಿಕೆಟ್ನಷ್ಟಕ್ಕೆ 222ರನ್ಗಳಿಸಿದ್ದ ವೆಸ್ಟ್ ಇಂಡೀಸ್ ತಂಡಕ್ಕೆ ಅಂತಿಮ 10 ಓವರ್ಗಳಲ್ಲಿ ಬೇಕಾಗಿದ್ದ ಬರೋಬ್ಬರಿ 70ರನ್. ಆದರೆ ಕೈಯಲ್ಲಿ 2ವಿಕೆಟ್ ಮಾತ್ರ ಇತ್ತು. ಈ ವೇಳೆ ಕಾರ್ಲೊಸ್ ಬ್ರಾತ್ವೇಟ್ ಧೈರ್ಯ ಕಳೆದುಕೊಳ್ಳದೇ ಬ್ಯಾಟಿಂಗ್ ಬೀಸಿದರು. ಕೇವಲ 80 ಎಸೆತಗಳಲ್ಲಿ ಚೊಚ್ಚಲ ಶತಕ ಸಿಡಿಸಿದ ಅವರು 4ನೇ ಓವರ್ನಲ್ಲಿ ಹ್ಯಾಟ್ರಿಕ್ ಸಿಕ್ಸರ್ ಹಾಗೂ ಒಂದು ಬೌಂಡರಿ ಸೇರಿ 24ರನ್ಗಳಿಸಿ ಎದುರಾಳಿಗಳಿಗೆ ನಡುಕ ಹುಟ್ಟಿಸಿದ್ದರು.
ಕೊನೆಯ ಓವರ್ನಲ್ಲಿ ವೆಸ್ಟ್ ಇಂಡೀಸ್ ಗೆಲುವಿಗೆ ಕೇವಲ 5ರನ್ಗಳ ಅವಶ್ಯಕತೆಯಿತ್ತು. ಇನ್ನೇನು ತಂಡ ಗೆಲುವಿನ ನಗೆ ಬೀರುವಂತೆ ಮಾಡುತ್ತಾರೆ ಎನ್ನುವಷ್ಟರಲ್ಲಿ ಬೌಂಡರಿ ಗೆರೆಯಲ್ಲಿ ಬೌಲ್ಟ್ ಹಿಡಿದ ಅದ್ಭುತ ಕ್ಯಾಚ್ಗೆ ಬಲಿಯಾದರು. ಇದರಿಂದ ತಂಡ ವಿರೋಚಿತ ಸೋಲು ಕಂಡಿತು. ಈ ವೇಳೆ ಕೆಲ ನಿಮಿಷಗಳ ಕಾಲ ಮೌನಕ್ಕೆ ಶರಣಾದ ಬ್ರಾಥ್ವೇಟ್, ಮೈದಾನದಲ್ಲಿ ಕಣ್ಣೀರು ಸಹ ಹಾಕಿದರು.ಈ ವೇಳೆ ಮೈದಾನದಲ್ಲಿದ್ದ ನ್ಯೂಜಿಲ್ಯಾಂಡ್ ಪ್ಲೇಯರ್ಸ್ ಬ್ರಾಥ್ವೇಟ್ಗೆ ಸಮಾಧಾನಪಡಿಸಿ, ಅಭಿನಂದನೆ ಸಲ್ಲಿಕೆ ಮಾಡಿದರು. ಇಷ್ಟೇ ಅಲ್ಲದೇ ಅವರು ಪೆವಿಲಿಯನ್ ಕಡೆ ಹೆಜ್ಜೆ ಹಾಕುತ್ತಿದ್ದಾಗ ಎದುರಾದ ಕಿವೀಸ್ನ ಪ್ರತಿಯೊಬ್ಬ ಪ್ಲೇಯರ್ಸ್,ಸಿಬ್ಬಂದಿ ಹಾಗೂ ಕೋಚ್ ಅವರಿಗೆ ಹಸ್ತಲಾಘವ ಮಾಡಿ, ಕೆಚ್ಚೆದೆಯ ಬ್ಯಾಟಿಂಗ್ಗೆ ವಿಶ್ ಮಾಡಿದ್ದಾರೆ.
