ನಮ್ಮೆದುರು ನಡೆಯುವ ಪ್ತತಿಯೊಂದು ಪಂದ್ಯವೂ ಫಿಕ್ಸ್​ ಆಗಿರುತ್ತದೆ... ಬುಕ್ಕಿ ಸಂಜೀವ್ ಚಾವ್ಲಾ ಆಘಾತಕಾರಿ ಹೇಳಿಕೆ

ಕ್ರಿಕೆಟ್​, ಅಂಡರ್​ ವರ್ಲ್ಡ್​ ಮಾಫಿಯಾ ನಿಯಂತ್ರಣದಲ್ಲಿರುತ್ತದೆ. ಒಬ್ಬ ಸಿನಿಮಾ ನಿರ್ದೇಶಕ ಸಿನಿಮಾ ಹೇಗೆ ನಿರ್ದೇಶಿಸುತ್ತಾನೋ ಹಾಗೆ ಫಿಕ್ಸಿಂಗ್​ ಕೂಡ ನಡೆಯುತ್ತದೆ ಎಂದು ಬುಕ್ಕಿ ಚಾವ್ಲಾ ಹೇಳಿದ್ದಾನೆ.

ನವದೆಹಲಿ:20 ವರ್ಷಗಳ ಹಿಂದೆ ಭಾರತ ಕ್ರಿಕೆಟ್​ನಲ್ಲಿ ನಡೆದಿದ್ದ ಬೃಹತ್​ ಫಿಕ್ಸಿಂಗ್​ನ ರೂವಾರಿಯಾಗಿದ್ದ ಸಂಜೀವ್​ ಚಾವ್ಲಾನನ್ನು ಭಾರತಕ್ಕೆ ಕರೆತರಲಾಗಿದ್ದು, ಜನರೆದುರು ನಡೆಯುವ ಪ್ರತಿಯೊಂದು ಪಂದ್ಯ ಫಿಕ್ಸಿಂಗ್​ಗೆ ಒಳಪಟ್ಟಿರುತ್ತದೆ ಎಂಬ ಆಘಾತಕಾರಿ ಹೇಳಿಕೆ ನೀಡಿದ್ದಾನೆ.

2000ನೇ ಇಸವಿಯಲ್ಲಿ ನಡೆದಿದ್ದ ಭಾರತ ಮತ್ತ ದಕ್ಷಿಣ ಆಫ್ರಿಕಾ ನಡುವಿನ ಪಂದ್ಯದ ಮ್ಯಾಚ್​ ಫಿಕ್ಸಿಂಗ್​ನ ಪ್ರಮುಖ ಆರೋಪಿಯಾಗಿರುವ ಸಂಜೀವ್​ ಚಾವ್ಲಾ, ನಮ್ಮೆದುರು ನಡೆಯುವ ಎಲ್ಲಾ ಪಂದ್ಯಗಳು ಫಿಕ್ಸಿಂಗ್​ಗೆ ಒಳಗಾಗಿರುತ್ತವೆ ಎಂದು ಹೇಳಿದ್ದಾನೆ. ಇದೊಂದು ಅಂಡರ್​ ವರ್ಲ್ಡ್​ ಮಾಫಿಯಾ. ಅದರ ನಿಯಂತ್ರಣದಲ್ಲಿ ಕ್ರಿಕೆಟ್​ ನಡೆಯುತ್ತದೆ. ಒಬ್ಬ ಸಿನಿಮಾ ನಿರ್ದೇಶಕ ಸಿನಿಮಾ ಹೇಗೆ ನಿರ್ದೇಶಿಸುತ್ತಾನೋ ಹಾಗೆ ಫಿಕ್ಸಿಂಗ್​ ಕೂಡ ನಡೆಯುತ್ತದೆ ಎಂದು ಚಾವ್ಲಾ ಹೇಳಿದ್ದಾನೆ.

2000ರಲ್ಲಿ ದಕ್ಷಿಣ ಆಫ್ರಿಕಾ ತಂಡ ಭಾರತದ ಪ್ರವಾಸ ಕೈಗೊಂಡಿತ್ತು. ಆ ವೇಳೆ ಹರಿಣಗಳ ನಾಯಕ ಹ್ಯಾನ್ಸಿ ಕ್ರೊಂಜೆ ಫಿಕ್ಸಿಂಗ್​ನಲ್ಲಿ ಭಾಗಿಯಾಗಿದ್ದರು. ಇದರಲ್ಲಿ ಸಂಜೀವ್​ ಚಾವ್ಲಾ ಅವರು ಪ್ರಮುಖ ಆರೋಪಿಯಾಗಿದ್ದ. ಹ್ಯಾನ್ಸಿ ಕ್ರೊಂಜೆ ಹಾಗೂ ಸಂಜೀವ್​ ಚಾವ್ಲಾ ಮಾತನಾಡಿರುವ ಆಡಿಯೋ ಕ್ಲಿಪ್​ಗಳು ಭಾರತದಲ್ಲಿ ನಡೆದ ಬೃಹತ್​ ಮ್ಯಾಚ್​ ಫಿಕ್ಸಿಂಗ್​ ಹಗರಣವನ್ನು ಬಿಚ್ಚಿಟ್ಟಿತ್ತು.

ಇನ್ನು ಈ ಮಾಫಿಯಾದಲ್ಲಿ ಅಂಡರ್​ ವರ್ಲ್ಡ್​ನ ಭಯಾನಕ ವ್ಯಕ್ತಿಗಳು ಸೇರಿದ್ದಾರೆ. ಅವರ ಬಗ್ಗೆ ಮಾಹಿತಿ ನೀಡಿದರೆ ನನ್ನನ್ನು ಕೊಲ್ಲುವುದಾಗಿ ಬೆದರಿಕೆಯೊಡ್ಡಿದ್ದಾರೆ ಎಂದು ಚಾವ್ಲಾ ಪೊಲೀಸ್​ ಬಳಿ ಹೇಳಿದ್ದಾನೆ.