ನೋಡಿ: ಐರ್ಲೆಂಡ್‌-ನೇಪಾಳ ಕ್ರಿಕೆಟ್‌ ಪಂದ್ಯದ ವೇಳೆ ಕ್ರೀಡಾಸ್ಫೂರ್ತಿ ಮೆರೆದ ವಿಕೆಟ್‌ ಕೀಪರ್‌

ಐರ್ಲೆಂಡ್ ಮತ್ತು ನೇಪಾಳ ತಂಡಗಳ ನಡುವೆ ಸೋಮವಾರ ಟಿ20 ಪಂದ್ಯ ನಡೆದಿದ್ದು, ಈ ಪಂದ್ಯದಲ್ಲಿ ಐರ್ಲೆಂಡ್ ಆಟಗಾರನನ್ನು ರನೌಟ್ ಮಾಡಲು ಅವಕಾಶವಿದ್ದರೂ ನೇಪಾಳದ ವಿಕೆಟ್ ಕೀಪರ್ ಹಾಗೆ ಮಾಡದೆ ಕ್ರೀಡಾಸ್ಫೂರ್ತಿ ಮೆರೆದರು. ಇದಕ್ಕೆ ಕಾರಣವೇನು ಅನ್ನೋದನ್ನು ನೋಡಿ.

ಜಂಟಲ್​ಮನ್ ಕ್ರೀಡೆ ಎಂದೇ ಹೆಸರಾದ ಕ್ರಿಕೆಟ್​ನಲ್ಲಿ ಕ್ರೀಡಾಸ್ಫೂರ್ತಿ ಮೆರೆಯುವ ಸನ್ನಿವೇಶಗಳು ನಡೆಯುತ್ತಿರುತ್ತವೆ. ಈಗ ಅಂಥದ್ದೇ ಘಟನೆಗೆ ನೇಪಾಳ ಮತ್ತು ಐರ್ಲೆಂಡ್ ನಡುವಿನ ಪಂದ್ಯ ಸಾಕ್ಷಿಯಾಯಿತು.

ಓಮನ್ ಕ್ವಾಡ್ರಾಂಗುಲರ್ ಸರಣಿಯ ಪಂದ್ಯಗಳ ಭಾಗವಾಗಿ ಮಸ್ಕತ್​ನ ಅಲ್-ಅಲ್ಮೇರತ್ ಕ್ರೀಡಾಂಗಣದಲ್ಲಿ ಐರ್ಲೆಂಡ್ ಮತ್ತು ನೇಪಾಳ ನಡುವೆ ಟಿ20 ಪಂದ್ಯ ನಡೆಯುತ್ತಿತ್ತು. ಈ ಪಂದ್ಯದಲ್ಲಿ ಐರ್ಲೆಂಡ್ ಆಟಗಾರನನ್ನು ರನ್​ ಔಟ್ ಮಾಡಲು ನೇಪಾಳದ ವಿಕೆಟ್ ಕೀಪರ್‌ಗೆ ಅವಕಾಶವಿತ್ತು. ಆದರೆ ಆತ ಹಾಗೆ ಮಾಡಲಿಲ್ಲ. ಈ ಕೆಳಗಿನ ವಿಡಿಯೋ ನೋಡಿ..

ನೇಪಾಳದ ಬೌಲರ್ ಕಮಲ್ ಸಿಂಗ್ ಐರಿ ಬೌಲಿಂಗ್ ಮಾಡಿದ್ದು, ಅದನ್ನು ಎದುರಿಸಿದ ಮಾರ್ಕ್​ ಅಡೈರ್ ಒಂದು ರನ್ ಗಳಿಸಲು ಮುಂದಾಗುತ್ತಾರೆ. ಕ್ರೀಸ್​ನ ಮತ್ತೊಂದು ತುದಿಯಲ್ಲಿದ್ದ ಮೆಕ್​ಬ್ರಿನ್ ಅವರು ರನ್‌ಗಾಗಿ ಓಡುತ್ತಿರಬೇಕಾದರೆ, ಬೌಲರ್​ಗೆ ಡಿಕ್ಕಿ ಹೊಡೆದು ಕೆಳಗೆ ಬೀಳುತ್ತಾರೆ. ಚೆಂಡನ್ನು ತೆಗೆದುಕೊಂಡ ಕಮಲ್ ಸಿಂಗ್ ಐರಿ ತಕ್ಷಣ ವಿಕೆಟ್ ಕೀಪರ್ ಆಸೀಫ್ ಶೇಖ್​ ಕೈಗೆ ಎಸೆಯುತ್ತಾರೆ. ಆದರೆ ಕೆಳಗೆ ಬಿದ್ದಿದ್ದ ಮೆಕ್​​ಬ್ರಿನ್ ಅವರನ್ನು ರನ್​ ಔಟ್ ಮಾಡಲು ಆಸೀಫ್ ಶೇಖ್ ಮುಂದಾಗುವುದಿಲ್ಲ. ಈ ವೇಳೆ, ನಿರಾಯಾಸವಾಗಿ ನಡೆದುಕೊಂಡು ಬಂದು ಮೆಕ್​​ಬ್ರಿನ್ ಕ್ರೀಸ್ ತಲುಪುತ್ತಾರೆ.

ಇದನ್ನೂ ಓದಿ:'ಕನಸು ನನಸಾಗಿದೆ..': ಪದಾರ್ಪಣೆ ಪಂದ್ಯದಲ್ಲಿ ಪಂದ್ಯಶ್ರೇಷ್ಠ ಆಟವಾಡಿದ ರವಿ ಬಿಷ್ಣೋಯಿ

ಈ ದೃಶ್ಯವನ್ನು ಕಾಮೆಂಟೇಟರ್ ಆ್ಯಂಡ್ರೂ ಲಿಯೋನಾರ್ಡ್ ತಮ್ಮ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದು, ಕ್ರೀಡಾಸ್ಫೂರ್ತಿಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ವಿಕೆಟ್ ಕೀಪರ್​ ಆಸೀಫ್ ಶೇಖ್ ನಡೆಗೆ ನೇಪಾಳ ಕ್ರಿಕೆಟ್ ಮಾತ್ರವಲ್ಲ, ಸಾಕಷ್ಟು ಕ್ರೀಡಾಭಿಮಾನಿಗಳು ಸಂತಸ ವ್ಯಕ್ತಪಡಿಸಿದ್ದಾರೆ.​

ಓಮನ್ ಕ್ವಾಡ್ರಾಂಗುಲರ್ ಸರಣಿಯ ಟಿ-20 ಪಂದ್ಯಗಳಲ್ಲಿ ಓಮನ್, ನೇಪಾಳ, ಐರ್ಲೆಂಡ್ ಹಾಗು ಯುಎಇ ರಾಷ್ಟ್ರಗಳು ಭಾಗವಹಿಸಿವೆ. ಐರ್ಲೆಂಡ್ ಮತ್ತು ನೇಪಾಳ ನಡುವೆ ಸೋಮವಾರ ನಡೆದ ಟಿ20 ಪಂದ್ಯದಲ್ಲಿ ಐರ್ಲೆಂಡ್​ 16 ರನ್​ಗಳ ಅಂತರದಿಂದ ಜಯಗಳಿಸಿತು.