ಮುಂಬೈ: ಐಪಿಎಲ್ ಮುಂದೂಡಿದ ಮೇಲೆ ಕೋವಿಡ್ 19 ಪರೀಕ್ಷೆಯಲ್ಲಿ ಪಾಸಿಟಿವ್ ಪಡೆದಿದ್ದ ಕೆಕೆಆರ್ ತಂಡದಲ್ಲಿ ನ್ಯೂಜಿಲ್ಯಾಂಡ್ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಟಿಮ್ ಸೀಫರ್ಟ್, ತಾವೂ ಅಂದು ಕಳೆದ ದಿನಗಳನ್ನು ನೆನೆದು ಭಾವುಕರಾಗಿ ಕಣ್ಣೀರಿಟ್ಟ ಘಟನೆ ನಡೆದಿದೆ.
ವಿದೇಶಿ ಆಟಗಾರರಲ್ಲಿ ಹೆಚ್ಚಿನವರು ತಮ್ಮ ಮನೆಗೆ ತೆರಳಿದ್ದರು, ಆದರೆ, ಕೆಕೆಆರ್ನ ಟಿಮ್ ಸೀಫರ್ಟ್ ರೋಗ ಲಕ್ಷಣಗಳೊಂದಿಗೆ ಪಾಸಿಟಿವ್ ಪಡೆದಿದ್ದರಿಂದ ಭಾರತದಲ್ಲೇ ಉಳಿಯುವ ಅನಿವಾರ್ಯತೆ ಎದುರಾಗಿತ್ತು.
" ಚೆನ್ನೈ ಸೂಪರ್ ಕಿಂಗ್ಸ್ ಮ್ಯಾನೇಜರ್ ನಾನು ಕೋವಿಡ್ 19 ಪರೀಕ್ಷೆಯಲ್ಲಿ ದೃಢಪಟ್ಟಿರುವುದನ್ನು ತೋರಿಸಿದರು. ಆ ಸಂದರ್ಭದಲ್ಲಿ ಜಗತ್ತು ಒಂದು ಕ್ಷಣ ನಿಂತಂತೆ ಮತ್ತು ಮುಂದೇ ಏನು ಮಾಡಬೇಕೆಂದು ಯೋಚಿಸಲಾರದಂತಾಗಿದ್ದೆ. ಆ ಕ್ಷಣ ನಿಜಕ್ಕೂ ಭಯಾನಕವಾಗಿತ್ತು " ಎಂದು ಸೀಫರ್ಟ್ ಹೇಳಿಕೊಂಡು ಸಂದರ್ಶನದ ವೇಳೆ ಕಣ್ಣೀರಿಟ್ಟಿದ್ದಾರೆ.
ಇದೀಗ ಸಂಪೂರ್ಣ ಚೇತರಿಸಿಕೊಂಡ ಸೀಫರ್ಟ್ ಕೊನೆಗೂ ಕಳೆದ ವಾರ ನ್ಯೂಜಿಲ್ಯಾಂಡ್ಗೆ ಮರಳಿದ್ದಾರೆ. ಪ್ರಸ್ತುತ ಹೋಟೆಲ್ವೊಂದರಲ್ಲಿ 14 ದಿನಗಳ ಕ್ವಾರಂಟೈನ್ಗೆ ಒಳಗಾಗಿದ್ದಾರೆ.
ಹಿರಿಯ ನ್ಯೂಜಿಲ್ಯಾಂಡ್ ಕ್ರಿಕೆಟಿಗರಾದ ಸ್ಟೀಫನ್ ಫ್ಲೆಮಿಂಗ್ ಮತ್ತು ಬ್ರೆಂಡನ್ ಮೆಕಲಮ್ ತಮಗೆ ಸಾಕಷ್ಟು ಬೆಂಬಲ ನೀಡಿದ್ದಾರೆ ಎಂದು ಸೀಫರ್ಟ್ ಪ್ರಶಂಸಿಸಿದ್ದಾರೆ.
"ಅವರಿಬ್ಬರು ನನಗೆ ಎಲ್ಲವನ್ನೂ ತುಂಬಾ ಸುಲಭಗೊಳಿಸಿದರು. ಕೋಲ್ಕತಾ ನೈಟ್ ರೈಡರ್ಸ್‌ನ ಸಿಇಒ ಮತ್ತು ಸಿಎಸ್‌ಕೆ ಮ್ಯಾನೇಜ್ಮೆಂಟ್ ಚೇತರಿಸಿಕೊಳ್ಳುವರೆಗೂ ನನಗೆ ನೆರವಾದರು. ಮತ್ತು ನನ್ನ ಎಲ್ಲಾ ಕೆಲಸಗಳನ್ನು ಸುಲಭಗೊಳಿಸಿದರು. ನಂತರ ನಾನು ಮನೆಗೆ ತೆರಳಬೇಕಾದಾಗ, ಅವರು ನನ್ನನ್ನು ಸುರಕ್ಷಿತವಾಗಿ ಕಳುಹಿಸಿಕೊಡಲು ತಮ್ಮಿಂದಾಗುವ ಎಲ್ಲ ಪ್ರಯತ್ನಗಳನ್ನು ಮಾಡಿದರು" ಎಂದು ಸೀಫರ್ಟ್ ಹೇಳಿಕೊಂಡಿದ್ದಾರೆ.
ಸೀಫರ್ಟ್ ಈ ವರ್ಷ ಕೆಕೆಆರ್ ತಂಡಕ್ಕೆ ಸೇರ್ಪಡೆಗೊಂಡಿದ್ದರು. ಆದರೆ, 11ರ ಬಳಗದಲ್ಲಿ ಆಡುವ ಅವಕಾಶ ಸಿಕ್ಕಿರಲಿಲ್ಲ. ವರುಣ್ ಚಕ್ರವರ್ತಿ ಮತ್ತು ಸಂದೀಪ್ ವಾರಿಯರ್ಗೆ ಪಾಸಿಟಿವ್ ದೃಢಪಟ್ಟ ನಂತರ ಐಪಿಎಲ್ ರದ್ದುಗೊಳಿಸಲಾಗಿತ್ತು. ನಂತರ ನಡೆಸಿದ ಪರೀಕ್ಷೆಯಲ್ಲಿ ಸೀಫರ್ಟ್ ಮತ್ತು ಪ್ರಸಿಧ್ ಕೃಷ್ಣಗೂ ಕೊರೊನಾ ದೃಢಪಟ್ಟಿತ್ತು.
ಇದನ್ನು ಓದಿ:ಇಂಗ್ಲೆಂಡ್ ಪ್ರವಾಸ: ಭಾರತದ ಮಹಿಳಾ-ಪುರುಷ ತಂಡಗಳಿಗೆ ಕಠಿಣ ಕ್ವಾರಂಟೈನ್
