ನ್ಯೂಜಿಲ್ಯಾಂಡ್-​ ಶ್ರೀಲಂಕಾ ಪಂದ್ಯದಲ್ಲಿ ವಿಕೆಟ್​ಗಳ ಕಿರಿಕ್​: ದೀಪ ಉರಿಯದೇ ಆಟಗಾರರು ನಾಟೌಟ್​!

ಶ್ರೀಲಂಕಾ-ನ್ಯೂಜಿಲ್ಯಾಂಡ್​ ಏಕದಿನ ಪಂದ್ಯದಲ್ಲಿ ಕೆಲವು ವಿಚಿತ್ರ ಘಟನೆಗಳು ಸಂಭವಿಸಿವೆ. ವಿಕೆಟ್​ ಬೇಲ್ಸ್​ಗಳ ದೀಪ ಉರಿಯದ ಕಾರಣ ಉಭಯ ತಂಡಗಳಿಗೆ ಜೀವದಾನ ಲಭಿಸಿದೆ.

ಆಕ್ಲಂಡ್​(ನ್ಯೂಜಿಲ್ಯಾಂಡ್​):ಶ್ರೀಲಂಕಾ ಮತ್ತು ನ್ಯೂಜಿಲೆಂಡ್​ ನಡುವಿನ ಮೊದಲ ಏಕದಿನ ಕ್ರಿಕೆಟ್ ಪಂದ್ಯದಲ್ಲಿ ಕೆಲ ಅಸಾಮಾನ್ಯ ಘಟನೆಗಳು ನಡೆದವು. ವಿಕೆಟ್​ ಬೇಲ್ಸ್ ಬೆಳಗದೇ, ಕೆಳಕ್ಕೂ ಬೀಳದೇ ಕಿರಿಕ್​ ಮಾಡಿದರೆ, ಆತಿಥೇಯ ಲಂಕಾ ತಂಡ 198 ರನ್​ಗಳ ಹೀನಾಯ ಸೋಲು ಕಂಡಿತು. ಇದು ತಂಡದ ಎರಡನೇ ಅತ್ಯಧಿಕ ಅಂತರದ ಸೋಲಾಗಿದೆ.

ಶನಿವಾರ ನಡೆದ ಪಂದ್ಯದಲ್ಲಿ ಬ್ಯಾಟರ್​ಗಳ ಸಂಪೂರ್ಣ ವೈಫಲ್ಯದಿಂದ ಲಂಕಾ ದಯನೀಯವಾಗಿ ಸೋಲೊಪ್ಪಿಕೊಂಡಿತು. 8 ಬ್ಯಾಟರ್​ಗಳು ಒಂದಕಿಂಗೆ ವಿಕೆಟ್​ ನೀಡಿದರೆ, ಇಬ್ಬರು ಮಾತ್ರ ಎರಡಂಕಿ ಮುಟ್ಟಿದರು. ಸವಾಲಿನ ಪಿಚ್​ನಲ್ಲಿ ಕಿವೀಸ್​ ಕೂಡ ಎಲ್ಲ ವಿಕೆಟ್​ ಕಳೆದುಕೊಂಡು 274 ರನ್​ಗಳ ಸವಾಲು ನೀಡಿ ಆಲೌಟ್ ಆಯಿತು.

ವಿಕೆಟ್​ ಬೇಲ್ಸ್​ಗಳ ಕಿರಿಕ್​:ಪಂದ್ಯ ಈ ಎಲ್ಲದಕ್ಕಿಂತಲೂ ವಿಕೆಟ್​ಗಳಿಂದಲೇ ಹೆಚ್ಚು ಗಮನ ಸೆಳೆಯಿತು. ಉಭಯ ತಂಡಗಳಿಗೂ ವಿಕೆಟ್​ ವರದಾನವಾಯಿತು. ಲಂಕಾದ ಕಸುನ್​ ರಜಿತಾ ಎಸೆದ 4 ನೇ ಓವರ್​ನಲ್ಲಿ ಕಿವೀಸ್​ ಆರಂಭಿಕ ಆಟಗಾರ ಫಿನ್​ ಅಲೆನ್​ ಕಣ್ತಪ್ಪಿಸಿ ಚೆಂಡು ವಿಕೆಟ್​ಗೆ ಬಡಿಯಿತು. ಆದರೆ, ಅದರ ಬೇಲ್ಸ್​ ಮಾತ್ರ ಉರುಳಿಬೀಳಲಿಲ್ಲ. ವಿಕೆಟ್​ ಅಂಚಿಗೆ ತಾಗಿದ ಕಾರಣ ಬೇಲ್ಸ್​ ಬೆಳಗದೆ, ಬೀಳಲೂ ಇಲ್ಲ. ಇದು ಅಲ್ಲಿದ್ದ ಎಲ್ಲರನ್ನೂ ಅಚ್ಚರಿಗೆ ದೂಡಿತು. ವಿಕೆಟ್​ ಬೀಳದ ಕಾರಣ ಫಿನ್​ ಅಲೆನ್​ ಔಟಾಗುವ ಪ್ರಮೇಯ ಬರಲಿಲ್ಲ.

ವಿಕೆಟ್​ಗೆ ಚೆಂಡು ಬಡಿದರೂ ಅದೃಷ್ಟ ಎಂಬಂತೆ ಬೇಲ್ಸ್​ ಬೀಳದ ಕಾರಣ ಫಿನ್​ ಅಲೆನ್​ ಆಟ ಮುಂದುವರಿಸಿದರು. ಭರ್ಜರಿ ಬ್ಯಾಟ್​ ಬೀಸಿ ಅರ್ಧಶತಕ ಗಳಿಸಿದರು. ವಿಕೆಟ್​ಗೆ ಚೆಂಡು ಬಡಿದಿದ್ದನ್ನು ಲಂಕಾ ನಾಯಕ, ಆಟಗಾರರು ಅಂಪೈರ್​ಗೆ ಮನವಿ ಮಾಡಿದರು. ಆದರೆ, ಬೇಲ್ಸ್​ ಉರುಳಿ ಬೀಳದೇ ಔಟ್​ ಸಿಗಲಿಲ್ಲ.

ಬೇಲ್ಸ್ ದೀಪ​ ಉರಿಯದೇ ರನೌಟ್​ ಮಿಸ್​:ಪಂದ್ಯದಲ್ಲಿ ಮತ್ತೊಂದು ವಿಚಿತ್ರ ಪ್ರಸಂಗ ಕೂಡ ನಡೆಯಿತು. ರನೌಟ್​ ಆಗಿದ್ದರೂ ವಿಕೆಟ್​ ದೀಪ ಹೊತ್ತಿಕೊಳ್ಳಲಿಲ್ಲ ಎಂಬ ಕಾರಣಕ್ಕೆ ಅಂಪೈರ್​ಗಳು ಔಟ್​ ನಿರಾಕರಿಸಿದರು. ಇದು ಸಾಮಾಜಿಕ ಜಾಲತಾಣದಲ್ಲಿ ಟೀಕೆಗೆ ಗುರಿಯಾಗಿದೆ. 18 ನೇ ಓವರ್​ನಲ್ಲಿ ಈ ಘಟನೆ ಸಂಭವಿಸಿತು. ಲಂಕಾದ ಕರುಣರತ್ನೆ ರನ್​ ಓಡುತ್ತಿದ್ದಾಗ ಕಿವೀಸ್​ನ ಟಿಕ್ನರ್​ ಚೆಂಡನ್ನು ಪಡೆದು ವಿಕೆಟ್​ಗೆ ತಗುಲಿಸಿದರು. ಆದರೆ, ವಿಕೆಟ್​ ದೀಪ ಉರಿಯಲಿಲ್ಲ. ಪರಿಶೀಲಿಸಿದಾಗ ಬ್ಯಾಟರಿ ಸಮಸ್ಯೆಯಿಂದಾಗಿ ಈ ರೀತಿ ನಡೆದಿರುವುದು ಗೊತ್ತಾಯಿತು.

ಕಿವೀಸ್​ ಆಟಗಾರರ ಮನವಿಯ ಮೇರೆಗೆ ವಿಡಿಯೋ ರಿಪ್ಲೈ ನೋಡಿದ ಮೂರನೇ ಅಂಪೈರ್​ ಚೆಂಡು ವಿಕೆಟ್​ಗೆ ತಾಗಿಸಿದ್ದರೂ ದೀಪ ಹೊತ್ತಿಕೊಳ್ಳದ ಕಾರಣ ನೌಟೌಟ್​ ಎಂದು ತೀರ್ಪು ನೀಡಿದರು. ವಿಕೆಟ್​ ಬೀಳುವ ಹೊತ್ತಿಗೆ ಕರುಣರತ್ನೆ ಕ್ರೀಸ್​ ತಲುಪಿದ್ದರು. ಈ ನಿರ್ಣಯ ವಿವಾದಕ್ಕೆ ಕಾರಣವಾಗಿ ಸಾಮಾಜಿಕ ಜಾಲತಾಣದಲ್ಲಿ ಟೀಕೆಗೂ ಗುರಿಯಾಗಿದೆ.

ಎರಡನೇ ಅತಿದೊಡ್ಡ ಸೋಲು:ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲೆಂಡ್ 274 ರನ್‌ಗಳ ಗುರಿ ನೀಡಿತು. 275 ರನ್‌ಗಳ ಗುರಿ ಬೆನ್ನತ್ತಿದ ಶ್ರೀಲಂಕಾ ಬ್ಯಾಟಿಂಗ್​ ವೈಫಲ್ಯ ಮತ್ತು ಹೆನ್ರಿ ಶಿಪ್ಲಿ ವೇಗಕ್ಕೆ ಕುಸಿದು 76 ರನ್‌ಗಳಿಗೆ ಆಲೌಟ್​ ಆಯಿತು. ಶಿಪ್ಲಿ 5 ವಿಕೆಟ್​ಗಳ ಗೊಂಚಲು ಪಡೆದರು. ನ್ಯೂಜಿಲೆಂಡ್ ವಿರುದ್ಧ ಇದು ಅತ್ಯಧಿಕ ರನ್​ಗಳ ಸೋಲಾದರೆ, ಐದನೇ ಐದನೇ ಬಾರಿಗೆ ಕಡಿಮೆ ರನ್​ಗೆ ಲಂಕಾ ಔಟ್​ ಆಯಿತು. ಇದಕ್ಕೂ ಮೊದಲು ತಿರುವನಂತಪುರಂನಲ್ಲಿ ನಡೆದ ಭಾರತ ವಿರುದ್ಧದ ಪಂದ್ಯದಲ್ಲಿ ಶ್ರೀಲಂಕಾ ವಿಶ್ವದಾಖಲೆಯ 317 ರನ್‌ಗಳ ಸೋಲು ಕಂಡಿದೆ.

ಇದನ್ನೂ ಓದಿ:ವಿಶ್ವ ಬಾಕ್ಸಿಂಗ್ ಚಾಂಪಿಯನ್‌ಶಿಪ್‌: ಐತಿಹಾಸಿಕ ಚಿನ್ನದ ಪದಕ ಗೆದ್ದ ನಿತು - ಸ್ವೀಟಿ ಬೂರಾ