ನಿವೃತ್ತಿ ವಿಚಾರದಲ್ಲಿ ರಾಜಪಕ್ಷ ಯೂ ಟರ್ನ್​: ಮತ್ತೆ ಶ್ರೀಲಂಕಾ ಪರ ಆಡಲು ನಿರ್ಧಾರ

ತಮ್ಮ ರಾಜೀನಾಮೆಯನ್ನು ಹಿಂದಕ್ಕೆ ತೆಗೆದುಕೊಳ್ಳಲು ಶ್ರೀಲಂಕಾ ಕ್ರಿಕೆಟ್​ ಮಂಡಳಿಗೆ ಬರೆದ ಪತ್ರದಲ್ಲಿ, "ನಾನು ಪ್ರೀತಿಸುವ ಕ್ರೀಡೆಯನ್ನು ದೇಶದ ಪರ ಮತ್ತಷ್ಟು ವರ್ಷಗಳ ಕಾಲ ಆಡುವುದಕ್ಕೆ ಬಯಸುತ್ತೇನೆ" ಎಂದು ತಿಳಿಸಿದ್ದಾರೆ.

ಕೊಲಂಬೊ: ಕೌಟುಂಬಿಕ ಕಾರಣ ನೀಡಿ ದಿಢೀರ್ ನಿವೃತ್ತಿ ಘೋಷಿಸಿ ಅಚ್ಚರಿಗೆ ಕಾರಣರಾಗಿದ್ದ 30 ವರ್ಷದ ಭಾನುಕ ರಾಜಪಕ್ಷ ನಿವೃತ್ತಿ ವಾಪಸ್​ ಪಡೆದು ಯೂ ಟರ್ನ್​ ತೆಗೆದುಕೊಂಡಿದ್ದಾರೆ.

"ಶ್ರೀಲಂಕಾದ ಯುವ ಮತ್ತು ಕ್ರೀಡಾ ಸಚಿವ ನಮಲ್ ರಾಜಪಕ್ಷ ಅವರು ರಾಷ್ಟ್ರೀಯ ಆಯ್ಕೆಗಾರರೊಂದಿಗೆ ಚರ್ಚೆ ನಡೆಸಿದ ನಂತರ ಭಾನುಕ ರಾಜಪಕ್ಷ ಅವರು ಜನವರಿ 3ರಂದು ಶ್ರೀಲಂಕಾ ಕ್ರಿಕೆಟ್​ ಮಂಡಳಿಗೆ ಸಲ್ಲಿಸಿದ್ದ ನಿವೃತ್ತಿಯನ್ನು ತಕ್ಷಣಕ್ಕೆ ಜಾರಿಗೆ ಬರುವಂತೆ ವಾಪಸ್​ ಪಡೆಯಲು ಬಯಸುವುದಾಗಿ ಎಸ್​​ಎಲ್​ಸಿಗೆ ತಿಳಿಸಿದ್ದಾರೆ" ಎಂದು ಮಂಡಳಿ ಗುರುವಾರ ಪ್ರಕಟಣೆ ಹೊರಡಿಸಿದೆ.

ತಮ್ಮ ನಿವೃತ್ತಿಯನ್ನು ಹಿಂದಕ್ಕೆ ತೆಗೆದುಕೊಳ್ಳಲು ಶ್ರೀಲಂಕಾ ಕ್ರಿಕೆಟ್​ ಮಂಡಳಿಗೆ ಬರೆದ ಪತ್ರದಲ್ಲಿ, "ನಾನು ಪ್ರೀತಿಸುವ ಕ್ರೀಡೆಯನ್ನು ದೇಶದ ಪರ ಮತ್ತಷ್ಟು ವರ್ಷಗಳ ಕಾಲ ಆಡುವುದಕ್ಕೆ ಬಯಸುತ್ತೇನೆ" ಎಂದು ತಿಳಿಸಿದ್ದಾರೆ.

ಶ್ರೀಲಂಕಾ ಕ್ರಿಕೆಟ್‌ ಸಲಹಾ ಸಮಿತಿ ಕ್ರಿಕೆಟಿಗರ ಫಿಟ್ನೆಸ್‌ ನಿರ್ಧರಿಸಲು ಇದ್ದ ಯೋ ಯೋ ಟೆಸ್ಟ್‌ ಅನ್ನು ಕೈಬಿಟ್ಟು, 8 ನಿಮಿಷಗಳ ಒಳಗೆ 2 ಕಿ.ಮೀ. ಓಟ ಪೂರೈಸಬೇಕು ಎಂಬ ಹೊಸ ನಿಯಮ ಜಾರಿಗೆ ತಂದಿತ್ತು. ಒಂದು ವೇಳೆ ಈ ಪರೀಕ್ಷೆಯಲ್ಲಿ ಅನುತ್ತೀರ್ಣರಾಗುವ ಆಟಗಾರರ ವೇತನಕ್ಕೆ ಕತ್ತರಿ ಹಾಕುವುದಾಗಿಯೂ ಎಚ್ಚರಿಕೆ ನೀಡಿದ್ದರು. ಈ ನಿಯಮ ಜಾರಿಗೆ ಬರುತ್ತಿದ್ದಂತೆ ರಾಜಪಕ್ಷ ನಿವೃತ್ತಿ ಘೋಷಿಸಿದ್ದರು.

ರಾಜಪಕ್ಷ ಶ್ರೀಲಂಕಾ ಪರ 5 ಏಕದಿನ ಮತ್ತು 18 ಟಿ20 ಪಂದ್ಯಗಳನ್ನಾಡಿದ್ದು, ಕ್ರಮವಾಗಿ 89 ಮತ್ತು 320 ರನ್​ಗಳಿಸಿದ್ದಾರೆ.

ಇದನ್ನೂ ಓದಿ:ಯುಎಇ ಅಲ್ಲ, 2022ರ ಐಪಿಎಲ್ ಈ ದೇಶದಲ್ಲಿ ಆಯೋಜಿಸಲು ಬಿಸಿಸಿಐ ಚಿಂತನೆ!