ಅಲ್ ಅಮೆರಾತ್: ಪಿಎನ್ಜಿ(ಪಪುವಾ ನ್ಯೂ ಗಿನಿ) ವಿರುದ್ಧ ಆಲ್ರೌಂಡ್ ಪ್ರದರ್ಶನ ತೋರಿದ ಸ್ಕಾಟ್ಲೆಂಡ್ ವಿಶ್ವಕಪ್ ಕ್ವಾಲಿಫೈಯರ್ನಲ್ಲಿ ಸತತ ಎರಡನೇ ಜಯ ಸಾಧಿಸಿ ಸೂಪರ್ 12ಕ್ಕೆ ಮತ್ತಷ್ಟು ಹತ್ತಿರವಾಗಿದೆ.
ಮಂಗಳವಾರ ಅಲ್ ಅಮೆರಾತ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ನಡೆಸಿದ ಸ್ಕಾಟ್ಲೆಂಡ್ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 165 ರನ್ಗಳಿಸಿತ್ತು. ರಿಚಿ ಬ್ಯಾರಿಂಗ್ಟನ್ 49 ಎಸೆತಗಳಲ್ಲಿ 6 ಬೌಂಡರಿ ಮತ್ತು 3 ಸಿಕ್ಸರ್ಗಳ ನೆರವಿನಿಂದ 70 ರನ್ಗಳಿಸಿದರೆ, ವಿಕೆಟ್ ಕಿಪರ್ ಮ್ಯಾಟ್ ಕ್ರಾಸ್ 36 ಎಸೆತಗಳಲ್ಲಿ ತಲಾ 2 ಬೌಂಡರಿ ಮತ್ತು ಸಿಕ್ಸರ್ಗಳ ನೆರವಿನಿಂದ 45 ರನ್ಗಳಿಸಿ ತಂಡದ ಮೊತ್ತವನ್ನು ಹೆಚ್ಚಿಸಿದರು.
ಇವರಿಬ್ಬರನ್ನು ಹೊರತುಪಡಿಸಿದರೆ ಉಳಿದ ಬ್ಯಾಟರ್ಗಳು ಅಲ್ಪಮೊತ್ತಕ್ಕೆ ವಿಕೆಟ್ ಒಪ್ಪಿಸಿದರು. ಮುನ್ಸಿ 15, ಕೊಯೆಟ್ಜರ್ 6, ಮ್ಯಾಕ್ಲಿಯೋಡ್ 10, ಲೀಸ್ಕ್ 9, ಕ್ರಿಸ್ ಗ್ರೀವ್ಸ್ 2 ರನ್ಗೆ ವಿಕೆಟ್ ಒಪ್ಪಿಸಿದರು.
ಪಿಎನ್ಜಿ ಪರ ಕಬುವಾ ಮೊರೆಯಾ 31ಕ್ಕೆ4, ಚಾಡ್ ಸೋಪರ್ 24ಕ್ಕೆ 3 ವಿಕೆಟ್ ಪಡೆದಿದ್ದರು. 166 ರನ್ಗಳ ಸ್ಪರ್ಧಾತ್ಮಕ ಗುರಿ ಬೆನ್ನಟ್ಟಿದ ಪಿಎನ್ಜಿ 19.3 ಓವರ್ಗಳಲ್ಲಿ 148ರನ್ಗಳಿಗೆ ಆಲೌಟ್ ಆಗುವ ಮೂಲಕ 17ರನ್ಗಳ ಸೋಲು ಕಂಡಿತು.
ನಾರ್ಮನ್ ವನುವಾ 37 ಎಸೆತಗಳಲ್ಲಿ ತಲಾ 2 ಸಿಕ್ಸರ್ ಮತ್ತು ಬೌಂಡರಿ ಸಹಿತ 47ರನ್ ಮತ್ತು ಸೇಸೆ ಬಾವ್ 24 ರನ್ಗಳಿಸಿದ್ದು, ಬಿಟ್ಟರೆ ಬೇರೆ ಯಾವ ಬ್ಯಾಟರ್ 20ರ ಗಡಿ ದಾಟಲು ವಿಫಲರಾದರು. ಸ್ಕಾಟ್ಲೆಂಡ್ನ ಜೋಶ್ ಡೇವಿ 18ರನ್ ನೀಡಿ 4 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.
