ಲಂಡನ್: ಇಂಗ್ಲೆಂಡ್ ಟೆಸ್ಟ್ ನಾಯಕ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಆಲ್‌ರೌಂಡರ್ ಬೆನ್ ಸ್ಟೋಕ್ಸ್ ಈ ವರ್ಷದ ಕೊನೆಯಲ್ಲಿ ನಡೆಯುವ ಆಶಸ್ ಕದನದತ್ತ ಚಿತ್ತ ಹರಿಸಿದ್ದಾರೆ. 8 ಜನ ವೇಗದ ಬೌಲರ್ಗಳನ್ನು ತಂಡದಲ್ಲಿ ಹೊಂದುವ ಬಗ್ಗೆ ಮಾತನಾಡಿದ್ದಾರೆ. ಕಳೆದ ಬಾರಿ ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾ ನೀಡಿದ್ದ ಆಘಾತಕ್ಕೆ ಉತ್ತರ ನೀಡಲು ಸ್ಟೋಕ್ಸ್ ಬಯಸಿದ್ದು, ತವರಿನಲ್ಲಿ ನಡೆಯುವ ಪಂದ್ಯದಲ್ಲಿ ವೇಗಿಗಳ ಸಹಾಯದಿಂದ ಕಾಂಗರೂಗಳನ್ನು ಕಟ್ಟಿಹಾಕಲು ಚಿಂತಿಸಿದ್ದಾರೆ.
ಇಂಗ್ಲೆಂಡ್ಗೆ ನೂತನ ಕೋಚ್ ಆಗಿ ಬ್ರೆಂಡನ್ ಮೆಕಲಮ್ ಸೇರಿಸಿಕೊಂಡಿದ್ದಾರೆ. ನಂತರ ತಂಡದಲ್ಲಿ ಕೆಲ ಬದಲಾವಣೆಯ ಗಾಳಿ ಬೀಸಿದೆ. ಅದರ ಜೊತೆಗೆ ನಾಯಕನ ಸ್ಥಾನವನ್ನು ಸ್ಟೋಕ್ಸ್ಗೆ ನೀಡಿದ ನಂತರ ಆಂಗ್ಲರ ಟೆಸ್ಟ್ ಪ್ರದರ್ಶನ ಉತ್ತಮವಾಗಿದೆ. ಬ್ರೆಂಡನ್ ಮೆಕಲಮ್ ಅವರ ನೇತೃತ್ವದಲ್ಲಿ ಇಂಗ್ಲೆಂಡ್ ತಂಡ ಆಡಿದ 12 ಟೆಸ್ಟ್‌ಗಳಲ್ಲಿ 10 ಪಂದ್ಯಗಳನ್ನು ಗೆದ್ದುಕೊಂಡಿದ್ದಾರೆ.
"ನಾನು 20 ಜನರ ತಂಡವನ್ನು ಮಾಡುವ ಉತ್ಸಾಹದಲ್ಲಿದ್ದೇನೆ. ನಮಗೆ ಆಯ್ಕೆ ಮಾಡಲು ಎಂಟು ಬೌಲರ್ಗಳನ್ನು ನೀಡುವಂತೆ ನಾನು ವೈದ್ಯಕೀಯ ತಂಡವನ್ನು ಕೇಳಿದ್ದೇವೆ. ಈ ವರ್ಷದ ಆಟ ಹೆಚ್ಚು ಕುತೂಹಲದಿಂದ ಕೂಡಿರಲಿದೆ. ಹೀಗಾಗಿ ಪ್ರತೀ ಪಂದ್ಯದಲ್ಲೂ ಸರಿಯಾಗಿ ಆಟಗಾರರನ್ನು ಬಳಸುವ ಬಗ್ಗೆ ನಾನು ಚಿಂತಿಸುತ್ತಿದ್ದೇನೆ" ಎಂದು ಸ್ಟೋಕ್ಸ್ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಹೇಳಿಕೊಂಡಿದ್ದಾರೆ.
31 ವರ್ಷದ ಸ್ಟೋಕ್ಸ್ ಸದ್ಯ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕಾಗಿ ಆಡುತ್ತಿದ್ದು, ಕಾಲು ಬೆರಳಿನ ಗಾಯಕ್ಕೆ ತುತ್ತಾಗಿದ್ದಾರೆ. ಈ ಕಾರಣದಿಂದ ಅವರು ಕಳೆದ ಎರಡು ಪಂದ್ಯಗಳಲ್ಲಿ ಕಾಣಿಸಿಕೊಂಡಿಲ್ಲ. ಇಂದು ರಾಜಸ್ಥಾನದ ಮೇಲೆ ಚೆನ್ನೈ ಕಣಕ್ಕಿಳಿಯುತ್ತಿದ್ದು, ಇಂದು ಆಡುವುದು ಅನುಮಾನವಾಗಿದೆ. ಐಪಿಎಲ್ ಮುಗಿದ ಬೆನ್ನಲ್ಲೇ ಆಶಸ್ ಸರಣಿ ಇರುವುದರಿಂದ ನಾಯಕ ಸ್ಟೋಕ್ಸ್ ಈಗಾಗಲೇ ಆಡುವ ಬಳಗದ ಬಗ್ಗೆ ಚಿಂತಿಸುತ್ತಿದ್ದಾರೆ.