ಬಾಂಗ್ಲಾ ವಿರುದ್ಧ ಟೆಸ್ಟ್‌ ಸರಣಿ ಗೆದ್ದ ಭಾರತ; 2ನೇ ಟೆಸ್ಟ್‌ನಲ್ಲಿ ಅಶ್ವಿನ್‌, ಅಯ್ಯರ್‌ ಬ್ಯಾಟಿಂಗ್‌ ಬಲ

ಬಾಂಗ್ಲಾದೇಶ ವಿರುದ್ಧದ 2ನೇ ಟೆಸ್ಟ್​ ಪಂದ್ಯವನ್ನು 3 ವಿಕೆಟ್​ಗಳಿಂದ ಗೆಲ್ಲುವ ಮೂಲಕ ಭಾರತ ಸರಣಿಯನ್ನು 2-0 ಅಂತರದಲ್ಲಿ ಕ್ಲೀನ್​ಸ್ವೀಪ್​ ಮಾಡಿತು. ಮೊದಲ ಟೆಸ್ಟ್​ ಗೆಲ್ಲುವ ಕನಸಿನಲ್ಲಿದ್ದ ಬಾಂಗ್ಲಾಗೆ ನಿರಾಸೆಯಾಗಿದೆ.

ಢಾಕಾ (ಬಾಂಗ್ಲಾದೇಶ):ಬಾಂಗ್ಲಾದೇಶದ ವಿರುದ್ಧ ಏಕದಿನ ಸರಣಿ ಸೋತು ಅವಮಾನಕ್ಕೀಡಾಗಿದ್ದ ಭಾರತ ಕ್ರಿಕೆಟ್‌ ತಂಡ ಟೆಸ್ಟ್​ ಸರಣಿಯನ್ನು ಕೈವಶ ಮಾಡಿಕೊಂಡಿದೆ. ಶೇರ್​ ಎ ಬಾಂಗ್ಲಾ ಮೈದಾನದಲ್ಲಿ ನಡೆದ 2ನೇ ಟೆಸ್ಟ್​ ಅನ್ನು ಭಾರತ 3 ವಿಕೆಟ್​ಗಳಿಂದ ಗೆಲ್ಲುವ ಮೂಲಕ 2-0 ಅಂತರದಲ್ಲಿ ಸರಣಿ ಗೆದ್ದು ಬೀಗಿತು.

ಪಂದ್ಯ ಗೆಲ್ಲಲು 100 ರನ್​ ಅಗತ್ಯದೊಂದಿಗೆ ನಾಲ್ಕನೇ ದಿನದಾಟ ಮುಂದುವರಿಸಿದ ಭಾರತಕ್ಕೆ ಆರಂಭದಲ್ಲೇ ವಿಘ್ನ ಉಂಟಾಯಿತು. ರಾತ್ರಿ ಕಾವಲುಗಾರನಾಗಿ ಬಂದಿದ್ದ ಜಯದೇವ್​ ಉನದ್ಕಟ್​, ಉತ್ತಮವಾಗಿ ಆಡುತ್ತಿದ್ದ ಅಕ್ಷರ್​ ಪಟೇಲ್​ 34 ರನ್​ಗೆ ಔಟಾದರು. ಇದರ ಬೆನ್ನಲ್ಲೇ ರಿಷಬ್​ ಪಂತ್​ 9 ರನ್​ಗೆ ವಿಕೆಟ್​ ನೀಡಿದರು. ಇದು ಭಾರತದ ಗೆಲುವಿಗೆ ಒತ್ತಡ ಹೆಚ್ಚಿಸಿತು.

ಆದರೆ, ಶ್ರೇಯಸ್​ ಅಯ್ಯರ್​ ಮತ್ತು ರವಿಚಂದ್ರನ್​ ಅಶ್ವಿನ್​ ಮುರಿಯದ 8ನೇ ವಿಕೆಟ್​ಗೆ ದಾಖಲೆಯ 71 ರನ್​ ಗಳಿಸಿ ಗೆಲುವಿನ ದಡ ಮುಟ್ಟಿಸಿದರು. ಶ್ರೇಯಸ್​ ಅಯ್ಯರ್​ (29), ಅಶ್ವಿನ್​ (42) 4ನೇ ದಿನದಾಟದಲ್ಲಿ 8 ನೇ ವಿಕೆಟ್​ಗೆ ದಾಖಲಾದ 2ನೇ ಅತ್ಯಧಿಕ ಮೊತ್ತವಾಗಿದೆ. ಇದಕ್ಕೂ ಮೊದಲು 1932 ರಲ್ಲಿ ಅಮರ್​ನಾಥ್​ ಮತ್ತು ಲಾಲ್​ ಸಿಂಗ್​ ಇಂಗ್ಲೆಂಡ್​ ವಿರುದ್ಧ 74 ರನ್​ ಗಳಿಸಿದ್ದರು.

ಬಾಂಗ್ಲಾದೇಶದ ವಿರುದ್ಧ ಭಾರತ 12 ಟೆಸ್ಟ್​ ಪಂದ್ಯಗಳನ್ನು ಆಡಿದ್ದು, 10 ರಲ್ಲಿ ಜಯ ಸಾಧಿಸಿದೆ. 2 ಪಂದ್ಯ ಡ್ರಾ ಕಂಡಿವೆ. ಮೊದಲ ಟೆಸ್ಟ್​ ಪಂದ್ಯ ಗೆಲ್ಲುವ ಧಾವಂತದಲ್ಲಿದ್ದ ಬಾಂಗ್ಲಾಗೆ ಅಯ್ಯರ್​ ಮತ್ತು ಅಶ್ವಿನ್​ ತಣ್ಣೀರೆರಚಿದರು. ಬಾಂಗ್ಲಾ ಪರವಾಗಿ ಮೆಹದಿ ಹಸನ್​ ಮಿರಾಜ್​ 5 ವಿಕೆಟ್​ ಕಿತ್ತರೆ, ಶಕೀಬ್​ ಅಲ್​ ಹಸನ್​ 2 ವಿಕೆಟ್​ ಪಡೆದರು.

ಪಂದ್ಯದ ವಿವರ:ಟಾಸ್​ ಗೆದ್ದು ಮೊದಲು ಬ್ಯಾಟ್​ ಆಯ್ದುಕೊಂಡ ಬಾಂಗ್ಲಾದೇಶಕ್ಕೆ ಭಾರತದ ವೇಗಿ ಉಮೇಶ್​ ಯಾದವ್​ ಮತ್ತು ಸ್ಪಿನ್ನರ್​ ಅಶ್ವಿನ್​ ಮಾರಕವಾದರು. ತಲಾ 4 ವಿಕೆಟ್​ ಉರುಳಿಸಿ ಇಬ್ಬರೂ ಬಾಂಗ್ಲಾ ಬ್ಯಾಟಿಂಗ್​ ಬೆನ್ನೆಲುಬು ಮುರಿದರು. ಮೊಮಿನುಲ್​ ಹಕ್​ರ 84 ರನ್​ ಬಾರಿಸಿ ಪ್ರತಿರೋಧ ಒಡ್ಡಿದರು. ನಜ್ಮುಲ್​ ಹೊಸೈನ್​ ಶ್ಯಾಂಟೊ 24, ಮುಶ್ಫೀಕರ್​ ರಹೀಮ್​ 26, ಲಿಟನ್​ ದಾಸ್​ 25 ರನ್​ ಗಳಿಸಿದ್ದರು. ತಂಡ 227 ರನ್​ಗೆ ಪತನ ಕಂಡಿತ್ತು. 12 ವರ್ಷಗಳ ಬಳಿಕ ಕಣಕ್ಕಿಳಿದ ಜಯದೇವ್​ ಉನಾದ್ಕಟ್​ 2 ವಿಕೆಟ್​ ಪಡೆದರು.

ಬಾಂಗ್ಲಾದ ಅಲ್ಪಮೊತ್ತ ಮೀರಿ ಬೃಹತ್​ ಗುರಿ ನೀಡಲು ಕಣಕ್ಕಿಳಿದ ಭಾರತ ಮೊದಲ ಇನಿಂಗ್ಸ್​ನಲ್ಲಿ 314 ರನ್​ ಮಾತ್ರ ಗಳಿಸಿತು. 94 ರನ್​ಗೆ 4 ವಿಕೆಟ್​ ಕಳೆದುಕೊಂಡು ಕುಸಿಯುತ್ತಿದ್ದ ತಂಡಕ್ಕೆ ರಿಷಬ್​ ಪಂತ್​ ಮತ್ತು ಶ್ರೇಯಸ್​ ಅಯ್ಯರ್​ ನೆರವಾದರು. ಪಂತ್​ 93 ರನ್​ ಮಾಡಿ ಶತಕದಿಂದ ವಂಚಿತರಾದರು. ಶ್ರೇಯಸ್​ ಅಯ್ಯರ್​ ಕೂಡ 87 ರನ್​ಗೆ ವಿಕೆಟ್​ ನೀಡಿ ಶತಕದ ಸಮೀಪ ಎಡವಿದರು. ಭಾರಿ ನಿರೀಕ್ಷೆ ಇರುವ ವಿರಾಟ್​ ಕೊಹ್ಲಿ 24 ರನ್​ಗೆ ಔಟಾದರು.

87 ರನ್​ ಹಿನ್ನಡೆಯ ಜೊತೆಗೆ 2ನೇ ಇನಿಂಗ್ಸ್​ಗಾಗಿ ಮೈದಾನಕ್ಕಿಳಿದ ಬಾಂಗ್ಲಾದೇಶ ಮತ್ತೊಮ್ಮೆ ಕುಸಿತ ಕಂಡಿತು. ಝಾಕೀರ್​ ಹಸನ್​ 51, ಲಿಟನ್​ ದಾಸ್​ 73, ನೂರುಲ್​ ಹಸನ್​ 31, ಟಸ್ಕಿನ್​ ಅಹ್ಮದ್​ 31 ರನ್​ ಗಳಿಸಿದರು. ಉಳಿದ ಬ್ಯಾಟರ್​ಗಳಿಂದ ರನ್​ ಬಾರದ ಕಾರಣ 231 ರನ್​ಗೆ ಆಲೌಟ್​ ಆಯಿತು. ಅಶ್ವಿನ್​, ಮೊಹಮದ್​ ಸಿರಾಜ್​ ತಲಾ 2, ಅಕ್ಷರ್​ ಪಟೇಲ್​ 3 ವಿಕೆಟ್​ ಪಡೆದರು.

ಸಾಧಾರಣ ಗುರಿ ಬೆನ್ನತ್ತಿ ತಿಣುಕಾಡಿದ ಭಾರತ: ಗೆಲ್ಲಲು 144 ರನ್​ಗಳ ಸಾಧಾರಣ ಗುರಿ ಬೆನ್ನತ್ತಿದ್ದ ಭಾರತ ತಂಡ ಪಟಪಟನೇ ವಿಕೆಟ್​ ಕಳೆದುಕೊಂಡಿತು. ಮೆಹದಿ ಹಸನ್​ ದಾಳಿಗೆ ಕಂಗಾಲಾದ ಬ್ಯಾಟರ್​ಗಳು ಪೆವಿಲಿಯನ್​ ಪರೇಡ್​ ನಡೆಸಿದರು. ಶುಭಮನ್​ ಗಿಲ್​ 7, ನಾಯಕ ಕೆಎಲ್​ ರಾಹುಲ್​ 2, ಚೇತೇಶ್ವರ್​ ಪೂಜಾರಾ 6, ವಿರಾಟ್​ ಕೊಹ್ಲಿ 1, ರಿಷಬ್​ ಪಂತ್​ 9 ರನ್​ಗೆ ಔಟಾದರು.

ಇದರಿಂದ ಭಾರತ ತಂಡ ಒತ್ತಡಕ್ಕೆ ಒಳಗಾಯಿತು. ಅಕ್ಷರ್​ ಪಟೇಲ್​, ಶ್ರೇಯಸ್​ ಅಯ್ಯರ್​ ಮತ್ತು ರವಿಚಂದ್ರನ್​ ಅಶ್ವಿನ್​ರ ಸೊಗಸಾದ ಆಟದಿಂದ ಇನ್ನೂ ಒಂದೂವರೆ ದಿನ ಬಾಕಿ ಇರುವಾಗಲೇ ಪಂದ್ಯವನ್ನು ಗೆದ್ದು ಸರಣಿ ಜಯಿಸಿತು. ಚೇತೇಶ್ವರ್​ ಪೂಜಾ ಸರಣಿಶ್ರೇಷ್ಠ ಪ್ರಶಸ್ತಿ ಜಯಿಸಿದರು.

ಇದನ್ನೂ ಓದಿ:ಬಾಂಗ್ಲಾ ವಿರುದ್ಧ ಟೆಸ್ಟ್​ ಸರಣಿ ಕ್ಲೀನ್​ ಸ್ವೀಪ್​ ಸಾಧಿಸುವತ್ತ ಟೀಂ ಇಂಡಿಯಾ