ಆಸ್ಟ್ರೇಲಿಯಾ ಮಾರಕ ಬೌಲಿಂಗ್​ ದಾಳಿಗೆ ತತ್ತರಿಸಿ 73ಕ್ಕೆ ಸರ್ವಪತನಕಂಡ ಬಾಂಗ್ಲಾದೇಶ

ಆ್ಯಡಂ ಜಂಪಾ (19ಕ್ಕೆ 5), ಜೋಸ್ ಹೆಜಲ್​ವುಡ್​ (8ಕ್ಕೆ2), ಮಿಚೆಲ್ ಸ್ಟಾರ್ಕ್​ (21ಕ್ಕೆ2) ಮಾರಕ ಬೌಲಿಂಗ್ ದಾಳಿಗೆ ತತ್ತರಿಸಿದ ಬಾಂಗ್ಲಾದೇಸ 73ಕ್ಕೆ ಆಲೌಟ್ ಆಗಿದೆ.

ದುಬೈ: ಆಸ್ಟ್ರೇಲಿಯಾದ ಮಾರಕ ಬೌಲಿಂಗ್ ದಾಳಿಗೆ ಉತ್ತರಿಸಲಾಗದ ಬಾಂಗ್ಲಾದೇಶ ತಂಡ 15 ಓವರ್​ಗಳಲ್ಲಿ ಕೇವಲ 73 ರನ್​ಗಳಿಸಿ ಆಲೌಟ್ ಆಗಿದೆ.

ಟಾಸ್​ ಸೋತು ತನ್ನ ಕೊನೆಯ ಲೀಗ್ ಪಂದ್ಯದಲ್ಲಿ ಆಡಿದ ಬಾಂಗ್ಲಾದೇಶ ಹಿಂದಿನ ಪಂದ್ಯಗಳಂತೆ ಈ ಪಂದ್ಯದಲ್ಲೂ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿತು. ತಂಡದ ಯಾವೊಬ್ಬ ಬ್ಯಾಟರ್ ಕೂಡ 20ರ ಗಡಿದಾಟಲಿಲ್ಲ. ಅರಂಭಿಕ ಬ್ಯಾಟರ್​ ಮೊಹಮ್ಮದ್​ ನಯೀಮ್​ 17, ನಾಯಕ ಮಹಮುದುಲ್ಲಾ ಮತ್ತು ಶಮೀಮ್ ಹೊಸೈನ್​ 19 ರನ್​ಗಳಿಸಿ ಎರಡಂಕಿ ಮೊತ್ತ ದಾಖಲಿಸಿದರು. ಉಳಿದೆಲ್ಲಾ ಬ್ಯಾಟರ್​ಗಳು ಒಂದಂಕಿ ಮೊತ್ತಕ್ಕೆ ವಿಕೆಟ್ ಒಪ್ಪಿಸಿ ನಿರಾಶೆ ಮೂಡಿಸಿದರು.

ಲಿಟನ್ ದಾಸ್​ ತಾವೆದುರಿಸಿ ಮೊದಲ ಎಸೆತದಲ್ಲೇ ಸ್ಟಾರ್ಕ್​ ಬೌಲಿಂಗ್​ನಲ್ಲಿ ಕ್ಲೀನ್ ಬೌಲ್ಡ್ ಆದರು. ನಂತರ ಬಂದ ಸೌಮ್ಯ ಸರ್ಕಾರ್​ 5, ರಹೀಮ್​ 1, ಅಫೀಫ್​ ಹೊಸೈನ್ 0, ಮೆಹೆದಿ ಹಸನ್​ 0, ಮುಸ್ತಫಿಜುರ್ ರೆಹಮಾನ್ 4 ಮತ್ತು ಶಾರಿಫುಲ್ ಇಸ್ಲಾಮ್​ 0ಗೆ ವಿಕೆಟ್​ ಒಪ್ಪಿಸಿದರು.

ಆಸ್ಟ್ರೇಲಿಯಾ ಪರ ಆ್ಯಡಂ ಜಂಪಾ 19ಕ್ಕೆ 5, ಜೋಸ್ ಹೆಜಲ್​ವುಡ್​ 8ಕ್ಕೆ2, ಮಿಚೆಲ್ ಸ್ಟಾರ್ಕ್​ 21ಕ್ಕೆ2, ಗ್ಲೇನ್ ಮ್ಯಾಕ್ಸ್​ವೆಲ್​ 6ಕ್ಕೆ1 ವಿಕೆಟ್​ ಪಡೆದು ಬಾಂಗ್ಲಾದೇಶ ತಂಡವನ್ನು ಅಲ್ಪ ಮೊತ್ತಕ್ಕೆ ನಿಯಂತ್ರಿಸಿದರು.