ನವದೆಹಲಿ:ಪಾಕಿಸ್ತಾನ ತಂಡದಲ್ಲಿ ಸ್ಟಾರ್ ಆಟಗಾರರಿಲ್ಲ. ಅದೊಂದು 'ಸಾಧಾರಣ ತಂಡ' ಎಂದು ಟೀಕಿಸಿದ್ದ ಮಾಜಿ ವೇಗದ ಬೌಲರ್ ಶೋಯಬ್ ಅಖ್ತರ್ ಕಮೆಂಟ್ಗೆ ಪ್ರತಿಕ್ರಿಯಿಸಿರುವ ನಾಯಕ ಬಾಬರ್ ಅಜಮ್, ಯಾರು ಸ್ಟಾರ್ ಆಟಗಾರರು, ಯಾರು ಅಲ್ಲ ಎಂಬುದನ್ನು ಅವರ ಬಳಿ ನೀವೇ ಕೇಳಿ? ಎಂದು ತಿರುಗೇಟು ನೀಡಿದ್ದಾರೆ.
ಮಂಗಳವಾರ ನಡೆದ ಪಂದ್ಯದಲ್ಲಿ 331 ರನ್ ಗಳಿಸಿಯೂ ಇಂಗ್ಲೆಂಡ್ ದ್ವಿತೀಯ ದರ್ಜೆ ತಂಡದ ವಿರುದ್ಧ ಪಾಕಿಸ್ತಾನ ಸೋಲು ಕಂಡಿದೆ. ವೇಗದ ಬೌಲರ್ಗಳನ್ನು ಸೃಷ್ಟಿಸುವಲ್ಲಿ ಮುಂಚೂಣಿ ತಂಡವೆನಿಸಿಕೊಂಡಿರುವ ಪಾಕಿಸ್ತಾನ ಬಿ ತಂಡದ ಬ್ಯಾಟ್ಸ್ಮನ್ಗಳ ವಿರುದ್ಧ ಕಳಪೆ ಪ್ರದರ್ಶನ ತೋರಿ ಮಾಜಿ ಕ್ರಿಕೆಟಿಗರ ಆಕ್ರೋಶಕ್ಕೆ ತುತ್ತಾಗಿದ್ದಾರೆ.
ನಿನ್ನೆಯ ಪಂದ್ಯ ಮುಗಿಯುತ್ತಿದ್ದಂತೆ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಪಾಕಿಸ್ತಾನ ತಂಡದ ಪ್ರದರ್ಶನವನ್ನು ಕಟುವಾಗಿ ಟೀಕಿಸಿದ್ದ ಅಖ್ತರ್, ಇದು ಅವಮಾನಕರ ಪ್ರದರ್ಶನ, ನಮ್ಮದೊಂದು ಸಾಧಾರಣ ಮಂಡಳಿ, ಅದಕ್ಕೆ ಸಾಧಾರಣ ಜನರನ್ನೇ ಕರೆತರುತ್ತಿದೆ. ಹಾಗಾಗಿ ಸರಾಸರಿ ತಂಡವನ್ನು ಕಟ್ಟಿದೆ. ನೀವು ಇಂತಹ ಜನರಿಂದ ಅಸಾಧಾರಣ ಪ್ರದರ್ಶನವನ್ನು ನಿರೀಕ್ಷಿಸುವ ಹಾಗಿಲ್ಲ. ಈ ತಂಡದಲ್ಲಿ ಯಾವುದೇ ಸ್ಟಾರ್ ಯುವ ಆಟಗಾರನಿಲ್ಲ ಎಂದು ಕಿಡಿಕಾರಿದ್ದರು.