ಭಾರತೀಯರಿಗಾಗಿ ಮಿಡಿದ ಮನ.. 'ಪಿಎಂ ಕೇರ್ಸ್​ ಫಂಡ್​'ಗೆ 37 ಲಕ್ಷ ರೂ.​ ದೇಣಿಗೆ ನೀಡಿದ ಕಮ್ಮಿನ್ಸ್​

ಡೆಡ್ಲಿ ವೈರಸ್ ಕೊರೊನಾ ಹಾವಳಿಯಿಂದ ಭಾರತ ತತ್ತರಿಸಿ ಹೋಗಿದ್ದು, ಇದೀಗ ಅನೇಕ ದೇಶಗಳು, ವ್ಯಕ್ತಿಗಳು ಭಾರತೀಯರ ಕಷ್ಟಕ್ಕೆ ಸ್ಪಂದಿಸುತ್ತಿದ್ದಾರೆ. ಆಸ್ಟ್ರೇಲಿಯಾದ ವೇಗದ ಬೌಲರ್​ ಕಮ್ಮಿನ್ಸ್​​ ಅವರು ಪಿಎಂ ಕೇರ್ಸ್​ ಫಂಡ್​ಗೆ 50 ಸಾವಿರ ಡಾಲರ್(37 ಲಕ್ಷ ರೂ)​​ ನೆರವು ನೀಡಿ ಉದಾರತೆ ಮೆರೆದಿದ್ದಾರೆ.

ಹೈದರಾಬಾದ್​: 2ನೇ ಹಂತದ ಮಹಾಮಾರಿ ಕೊರೊನಾ ವೈರಸ್ ಹಾವಳಿಗೆ ತುತ್ತಾಗಿರುವ ಭಾರತ ಸಂಕಷ್ಟಕ್ಕೆ ಸಿಲುಕಿದೆ. ಆಕ್ಸಿಜನ್​, ಬೆಡ್​ ಹಾಗೂ ಔಷಧಿ ಕೊರತೆಯಿಂದ ಸಮಸ್ಯೆ ಎದುರಿಸುತ್ತಿದೆ. ಈ ಮಧ್ಯೆ ಅನೇಕರು ಭಾರತೀಯರ ಕಷ್ಟಕ್ಕೆ ಸ್ಪಂದಿಸುತ್ತಿದ್ದಾರೆ.

ಇದೀಗ ಆಸ್ಟ್ರೇಲಿಯಾದ ವೇಗದ ಬೌಲರ್​​ ಪ್ಯಾಟ್​ ಕಮ್ಮಿನ್ಸ್​​​ ತಮ್ಮ ಕೈಲಾದ ಸಹಾಯ ಮಾಡಿ, ಭಾರತೀಯರಿಗೆ ಮತ್ತಷ್ಟು ಹತ್ತಿರವಾಗಿದ್ದಾರೆ. ಸದ್ಯ ಇಂಡಿಯನ್ ಪ್ರೀಮಿಯರ್​ ಲೀಗ್​ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್​ ತಂಡದ ಪರ ಆಡುತ್ತಿರುವ ವೇಗಿ 50 ಸಾವಿರ ಡಾಲರ್(37 ಲಕ್ಷ ರೂ)​ ನೆರವು ನೀಡುವುದಾಗಿ ಘೋಷಣೆ ಮಾಡಿದ್ದಾರೆ.

ಇದಕ್ಕೆ ಸಂಬಂಧಿಸಿಂತೆ ಟ್ವೀಟ್ ಮಾಡಿರುವ ವೇಗದ ಬೌಲರ್ ಕಮ್ಮಿನ್ಸ್​, ಪಿಎಂ ಕೇರ್ಸ್​ ಫಂಡ್​ಗೆ ಈ ಹಣ ದೇಣಿಗೆ ನೀಡುತ್ತಿರುವುದಾಗಿ ಹೇಳಿದ್ದು, ಆಕ್ಸಿಜನ್ ಖರೀದಿಗೆ ಬಳಸುವಂತೆ ಮನವಿ ಮಾಡಿದ್ದಾರೆ. ಇದರ ಜತೆಗೆ ಬೇರೆಯವರು ಸಹಾಯ ಮಾಡುವಂತೆ ಅವರು ಕೇಳಿಕೊಂಡಿದ್ದಾರೆ.

ಕಮ್ಮಿನ್ಸ್​ ಟ್ವೀಟ್ ಇಂತಿದೆ..

'ಭಾರತ ನಾನು ಅನೇಕ ವರ್ಷಗಳಿಂದ ಪ್ರೀತಿಸುವ ದೇಶವಾಗಿದೆ. ಇಲ್ಲಿನ ಜನರು ಅತ್ಯಂತ ದಯಾಳುಗಳು. ಆದರೆ ಸದ್ಯದ ಪರಿಸ್ಥಿತಿಯಲ್ಲಿ ಅವರು ಸಂಕಷ್ಟಕ್ಕೊಳಗಾಗಿದ್ದು, ಈ ವಿಷಯ ತಿಳಿದು ನನಗೆ ಬೇಸರವಾಗಿದೆ.

ಕೋವಿಡ್​-19 ಸೋಂಕಿನ ಪ್ರಮಾಣ ಹೆಚ್ಚಿರುವಾಗ ಐಪಿಎಲ್​ ಮುಂದುವರಿಸಬೇಕಾ ಎಂಬ ಚರ್ಚೆ ಸಹ ನಡೆಯುತ್ತಿವೆ. ಇದು ನಡೆಯಲಿದೆ ಎಂದು ಭಾರತ ಸರ್ಕಾರ ಹೇಳಿದೆ. ದೇಶದ ಕಷ್ಟಕರವಾದ ಸಮಯದಲ್ಲೂ ಪ್ರತಿದಿನ ಕೆಲವು ಗಂಟೆಗಳ ಕಾಲ ನಾವು ಸಂತೋಷ ಮತ್ತು ವಿಶ್ರಾಂತಿ ಪಡೆದುಕೊಳ್ಳಲು ಸಹಾಯ ಮಾಡಿದೆ. ಆಟಗಾರರಾಗಿ ನಾವು ಒಳ್ಳೆಯ ವಿಚಾರವನ್ನ ಲಕ್ಷಾಂತರ ಜನರಿಗೆ ತಲುಪಿಸಬಹುದು. ಇದನ್ನ ಗಮನದಲ್ಲಿಟ್ಟುಕೊಂಡು ನಾನು ಪಿಎಂ ಕೇರ್ಸ್​ ಫಂಡ್​ಗೆ ಕೊಡುಗೆ ನೀಡಿದ್ದೇನೆ' ಎಂದು ತಿಳಿಸಿದ್ದಾರೆ.

ಭಾರತದಲ್ಲಿ ಮಹಾಮಾರಿ ಕೊರೊನಾ ವೈರಸ್ ಹಾವಳಿ ಹೆಚ್ಚಾಗಿರುವ ಕಾರಣ ಆರ್​ಸಿಬಿ ತಂಡದ ಕೇನ್​ ರಿಚರ್ಡ್ಸನ್​, ಆ್ಯಡಂ ಜಂಪಾ ಹಾಗೂ ರಾಜಸ್ಥಾನ ರಾಯಲ್ಸ್​ ತಂಡದ ಆ್ಯಂಡ್ರ್ಯೂ ಟೈ ತವರಿಗೆ ಪ್ರಯಾಣ ಬೆಳೆಸಲು ಮುಂದಾಗಿದ್ದಾರೆ.