18 ಎಸೆತಗಳಲ್ಲಿ ದಾಖಲೆಯ 58 ರನ್ ಸಿಡಿಸಿದ ಸ್ಟೊಯಿನಿಸ್!​ ಶ್ರೀಲಂಕಾ ವಿರುದ್ಧ ಆಸೀಸ್‌ಗೆ ಗೆಲುವು

ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ ನ್ಯೂಜಿಲ್ಯಾಂಡ್​ ವಿರುದ್ಧ ಸೋತಿದ್ದ ಆಸ್ಟ್ರೇಲಿಯಾ​ ಸೆಮಿಫೈನಲ್​ ರೇಸ್​ನಲ್ಲಿ ಉಳಿಯಲು ಗೆಲ್ಲಲೇಬೇಕಾದ ಪಂದ್ಯದಲ್ಲಿ ಲಂಕಾವನ್ನು ಬಗ್ಗುಬಡಿಯಿತು.

ಪರ್ತ್(ಆಸ್ಟ್ರೇಲಿಯಾ):ಟಿ20 ವಿಶ್ವಕಪ್​ ಆತಿಥ್ಯ ವಹಿಸಿರುವ ಆಸ್ಟ್ರೇಲಿಯಾ ಗೆಲ್ಲಬೇಕಾದ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ. ಆಸೀಸ್​ ಆಲ್​​ರೌಂಡರ್​ ಮಾರ್ಕಸ್​ ಸ್ಟೊಯಿನಿಸ್​ರ ಬಿರುಗಾಳಿಯ ಬ್ಯಾಟಿಂಗ್​ಗೆ ಲಂಕಾ ಸೊಲ್ಲೆತ್ತದೆ ಸೋಲೊಪ್ಪಿಕೊಂಡಿತು.

ಸ್ಟೊಯಿನಿಸ್ ​ಅತಿವೇಗದ ಅರ್ಧಶತಕ ದಾಖಲೆ:ಮೊದಲು ಬ್ಯಾಟ್​ ಮಾಡಿದ ಶ್ರೀಲಂಕಾ 20 ಓವರ್​ಗಳಲ್ಲಿ 6 ವಿಕೆಟ್​​ಗೆ 157 ರನ್​ ಬಾರಿಸಿತು. ಗುರಿ ಬೆನ್ನತ್ತಿದ ಕಾಂಗರೂ ಪಡೆ ಮಾರ್ಕಸ್​ ಸ್ಟೊಯಿನಿಸ್​ರ ಅತಿ ವೇಗದ ಅರ್ಧಶತಕ ಮತ್ತು ನಾಯಕ ಆ್ಯರೋನ್​ ಫಿಂಚ್​ರ ತಾಳ್ಮೆಯ ಆಟದಿಂದ ಗೆಲವು ಸಾಧಿಸಿತು.

ತಂಡ ಗೆಲ್ಲಲು 69 ರನ್​ ಇದ್ದಾಗ ಮೈದಾನಕ್ಕೆ ಬಂದ ಮಾರ್ಕಸ್​​ ಸ್ಟೊಯಿನಿಸ್​ ಲಂಕಾ ದಹನ ಮಾಡಿದರು. 6 ಸಿಕ್ಸರ್​, 4 ಬೌಂಡರಿ ಸಮೇತ 18 ಎಸೆತಗಳಲ್ಲಿ 59 ರನ್​ ಗಳಿಸಿದರು. ಉಳಿದ 10 ರನ್​ಗಳು ಮಾತ್ರ ಆ್ಯರೋನ್ ಫಿಂಚ್ ಗಳಿಸಿದರು.

17 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿ ಟಿ20 ವಿಶ್ವಕಪ್​ನಲ್ಲಿ ಅತಿವೇಗದ ಫಿಫ್ಟಿ ಬಾರಿಸಿದ ಜಂಟಿ 2ನೇ ಆಟಗಾರ ಎಂಬ ದಾಖಲೆಯನ್ನೂ ಅವರು ಬರೆದರು. ಯುವರಾಜ್​ ಸಿಂಗ್​ 2007 ರಲ್ಲಿ 12 ಎಸೆತಗಳಲ್ಲಿ ಅರ್ಧಶತಕ ಬಾರಿಸಿ ಮೊದಲ ಸ್ಥಾನದಲ್ಲಿದ್ದರೆ, ಡಚ್​ ಕ್ರಿಕೆಟಿಗ ಸ್ಟೀಫನ್​ ಮೈಬರ್ಗ್​ 17 ಎಸೆತಗಳಲ್ಲಿ 50 ರನ್​ ಸಿಡಿಸಿದ್ದರು.

ನಾಯಕ ಆ್ಯರೋನ್​ ಫಿಂಚ್​ ನೆಲಕಚ್ಚಿ ಬ್ಯಾಟ್​ ಮಾಡಿ 42 ಎಸೆತಗಳಲ್ಲಿ ಔಟಾಗದೇ 31, ಮಿಚೆಲ್​ ಮಾರ್ಷ್​ 17, ಡೇವಿಡ್​ ವಾರ್ನರ್​ 11, ಗ್ಲೆನ್​ ಮ್ಯಾಕ್ಸವೆಲ್​ 23 ರನ್​ ಗಳಿಸಿದರು.

ಲಂಕಾಗೆ ನಿಸ್ಸಂಕಾ, ಅಸಲಂಕಾ ನೆರವು:ಟಾಸ್​ ಸೋತು ಮೊದಲು ಬ್ಯಾಟ್​ ಮಾಡಿದ ಸಿಂಹಳೀಯರ ಆರಂಭವೂ ಉತ್ತಮವಾಗಿರಲಿಲ್ಲ. ಟಿ20 ಪ್ಲೇಯರ್​ ಕುಸಾಲ್​ ಮೆಂಡಿಸ್​ 5 ರನ್​ಗೆ ಔಟಾಗಿ ನಿರಾಸೆ ಮೂಡಿಸಿದರು. ಬಳಿಕ ಜೊತೆಗೂಡಿದ ಪಥುಮ್​ ನಿಸ್ಸಂಕಾ 40, ಧನಂಜಯ್​ ಡಿ ಸಿಲ್ವಾ 26 ರನ್​ ಮಾಡಿದರೆ, ಚರಿತಾ ಅಸಲಂಕಾ 38, ರನ್​ ಗಳಿಸಿದರು. ಇದಾದ ಬಳಿಕ ಬ್ಯಾಟಿಂಗ್​ ವೈಫಲ್ಯ ಅನುಭವಿಸಿ 157 ರನ್​ಗಳ ಸಾಧಾರಣ ಮೊತ್ತ ಗಳಿಸಿತು.

ಶ್ರೀಲಂಕಾ 2 ಪಂದ್ಯಗಳಲ್ಲಿ 1 ಗೆದ್ದು 1 ಸೋತರೆ, ಆಸ್ಟ್ರೇಲಿಯಾ ಕೂಡ ತಲಾ 1 ಸೋತು, ಗೆದ್ದಿದೆ.

ಇದನ್ನೂ ಓದಿ:ಟಿ20 ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾಗೆ ಲಂಕಾ ಸವಾಲು; ಆತ್ಮವಿಶ್ವಾಸದಲ್ಲಿ ಶನಕಾ ಬಳಗ