ಏಕದಿನ ಪಂದ್ಯದಲ್ಲಿ 195 ರನ್​ ಚೇಸ್‌ಗೆ​ ಹೆಣಗಾಡಿದ ಕಿವೀಸ್: ಸರಣಿ ಗೆದ್ದ ಆಸೀಸ್

ನ್ಯೂಜಿಲ್ಯಾಂಡ್​ ವಿರುದ್ಧ ನಡೆದ ಎರಡನೇ ಏಕದಿನ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಭರ್ಜರಿ ಗೆಲುವು ದಾಖಲಿಸಿತು. ಈ ಮೂಲಕ ಮೂರು ಪಂದ್ಯಗಳ ಸರಣಿಯನ್ನು 2-0 ಅಂತರದಿಂದ ಕೈವಶ ಮಾಡಿಕೊಂಡಿದೆ.

ಕೈರ್ನ್ಸ್​​(ಆಸ್ಟ್ರೇಲಿಯಾ​​): ಪ್ರವಾಸಿ ನ್ಯೂಜಿಲ್ಯಾಂಡ್ ತಂಡದ ವಿರುದ್ಧ ನಿನ್ನೆ ನಡೆದ ಏಕದಿನ ಪಂದ್ಯದಲ್ಲಿ 113 ರನ್​​​ಗಳ ಭರ್ಜರಿ ಗೆಲುವು ದಾಖಲು ಮಾಡಿರುವ ಆಸ್ಟ್ರೇಲಿಯಾ ತಂಡ ಒಂದು ಪಂದ್ಯ ಬಾಕಿ ಇರುವಾಗಲೇ ಸರಣಿ ಗೆದ್ದುಕೊಂಡಿತು.

ಗುರುವಾರ ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾ 50 ಓವರ್​​​ಗಳಲ್ಲಿ 9 ವಿಕೆಟ್ ​​ನಷ್ಟಕ್ಕೆ 195 ರನ್​​ಗಳಿಸಿದರೆ, ನ್ಯೂಜಿಲ್ಯಾಂಡ್ 33 ಓವರ್​​ಗಳಲ್ಲಿ ಕೇವಲ 82 ರನ್​​​ಗಳಿಗೆ ಆಲೌಟ್​ ಆಯಿತು. ಲೆಗ್​​ಸ್ಪಿನ್ನರ್ ಜಂಪಾ ಕೈಚಳಕದ ಮುಂದೆ ಕಿವೀಸ್ ಆಟ ನಡೆಯಲಿಲ್ಲ.

ಟಾಸ್​ ಸೋತು ಮೊದಲು ಬ್ಯಾಟಿಂಗ್​ ನಡೆಸಿದ ಆಸ್ಟ್ರೇಲಿಯಾದ ಮಾಜಿ ಕ್ಯಾಪ್ಟನ್​ ಸ್ಟೀವ್ ಸ್ಮಿತ್ ​(61), ಸ್ಟಾರ್ಕ್ಸ್​​(38) ಹಾಗೂ ಹ್ಯಾಜಲ್​​​ವುಡ್ ​​​(23) ನೆರವಿನಿಂದ ನಿಗದಿತ 50 ಓವರ್​​​​​ಗಳಲ್ಲಿ 9 ವಿಕೆಟ್ ​ನಷ್ಟಕ್ಕೆ 195 ರನ್​​​ಗಳಿಕೆ ಮಾಡಿತ್ತು. ನ್ಯೂಜಿಲ್ಯಾಂಡ್​​ ತಂಡದ ಮಾರಕ ಬೌಲಿಂಗ್ ದಾಳಿಗೆ ತತ್ತರಿಸಿದ ವಾರ್ನರ್ ​​(5), ಫಿಂಚ್ ​​(0), ಸ್ಟೋಯ್ನಿಸ್ ​​(0),ಲಾಬುಶೇನ್(5), ಅಲೆಕ್ಸ್ ಕ್ಯಾರಿ(12) ವಿಕೆಟ್ ಒಪ್ಪಿಸಿದರು.

ಬೌಲಿಂಗ್​ನಲ್ಲಿ ಮಿಂಚಿದ ಬೌಲ್ಟ್​​ 4 ವಿಕೆಟ್​, ಮ್ಯಾಟ್​ ಹೆನ್ರಿ 3, ಸೌಥಿ ಹಾಗೂ ಸ್ಯಾಟ್ನರ್​​ 1 ವಿಕೆಟ್ ಪಡೆದುಕೊಂಡರು.

196 ರನ್​​ಗಳ ಗುರಿ ಬೆನ್ನತ್ತಿದ ನ್ಯೂಜಿಲ್ಯಾಂಡ್ ತಂಡ ಕಾಂಗರೂ ಬೌಲಿಂಗ್ ದಾಳಿಗೆ ತತ್ತರಿಸಿ ಹೋಯಿತು. ಹೀಗಾಗಿ, 33 ಓವರ್​​​ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು ಕೇವಲ 82 ರನ್​​​ಗಳಿಗೆ ಆಲೌಟ್​ ಆಯಿತು. ತಂಡದ ಪರ ನಾಲ್ವರು ಬ್ಯಾಟರ್​ಗಳು ಮಾತ್ರ ಎರಡಂಕಿ ರನ್​​ಗಳಿಸಿದರೆ, ಉಳಿದಂತೆ ಯಾರೊಬ್ಬರೂ 10ರ ಗಡಿ ದಾಟಲು ಸಾಧ್ಯವಾಗಲಿಲ್ಲ.

ಗಪ್ಟಿಲ್​​(2), ಕಾನ್ವೆ(5), ವಿಲಿಯಮ್ಸನ್​(17), ಲಾಥಮ್​(0), ಮಿಚೆಲ್​​(10), ಬ್ರಾಚೆಲ್​​​(12), ನೀಶಮ್​(2), ಸ್ಯಾಂಟ್ನರ್​(16), ಸೌಥಿ(2), ಹೆನ್ರಿ (5) ಹಾಗೂ ಬೌಲ್ಟ್​ ​(9) ರನ್​​​ಗಳಿಸಿದರು.

ಆಸ್ಟ್ರೇಲಿಯಾ ತಂಡದ ಪರ ಮಿಂಚಿದ ಆ್ಯಂಡಂ ಜಂಪಾ 5 ವಿಕೆಟ್ ಪಡೆದುಕೊಂಡರೆ, ಸೇನ್​ ಅಂಬಾರ್ಟ್​,ಮಿಚೆಲ್​ ಸ್ಟಾರ್ಕ್​ 2 ವಿಕೆಟ್​ ಹಾಗೂ ಸ್ಟೋಯ್ನಿಸ್ 1 ವಿಕೆಟ್ ಕಿತ್ತರು. ಮೊದಲ ಪಂದ್ಯದಲ್ಲೂ ಗೆಲುವಿನ ನಗೆ ಬೀರಿದ್ದ ಆಸ್ಟ್ರೇಲಿಯಾ ಇದೀಗ ಎರಡನೇ ಪಂದ್ಯದಲ್ಲೂ ಗೆದ್ದು ಸರಣಿ ಕೈವಶ ಮಾಡಿಕೊಂಡಿದೆ.