Asia Cup ಕ್ರಿಕೆಟ್‌ ಲೆಕ್ಕಾಚಾರ: ಹೀಗಾದ್ರೆ ಮಾತ್ರ ಟೀಂ ಇಂಡಿಯಾ ಫೈನಲ್​​ಗೆ ಲಗ್ಗೆ ಹಾಕಬಹುದು!

ಏಷ್ಯಾ ಕಪ್​​ 2022 ಟೂರ್ನಮೆಂಟ್​​ನಲ್ಲಿ ಟೀಂ ಇಂಡಿಯಾ ಹೀನಾಯ ಪ್ರದರ್ಶನ ನೀಡಿದೆ. ಲೀಗ್​ ಹಂತದಲ್ಲಿ ಆಡಿರುವ ಎಲ್ಲ ಪಂದ್ಯಗಳಲ್ಲಿ ಗೆದ್ದಿದ್ದ ತಂಡ, ತದನಂತರ ಸೂಪರ್​ ಪೋರ್​​​ನ ಎರಡೂ ಪಂದ್ಯಗಳಲ್ಲಿಯೂ ಸೋಲು ಕಂಡಿದೆ. ಹೀಗಾಗಿ, ಫೈನಲ್​ ಆಸೆ ಬಹುತೇಕ ಕಮರಿದೆ.

ದುಬೈ(ಯುಎಇ):ಏಷ್ಯಾ ಕಪ್​​ ಸೂಪರ್​ 4 ಹಂತದ 'ಮಾಡು ಇಲ್ಲವೇ ಮಡಿ' ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಸೋಲು ಕಂಡಿರುವ ಟೀಂ ಇಂಡಿಯಾ ಫೈನಲ್​​​ನಿಂದ ಬಹುತೇಕ ಹೊರಬಿದ್ದಿದೆ. ಆದರೆ, ಟೂರ್ನಿಯ ಮುಂದಿನ ಪಂದ್ಯಗಳಲ್ಲಿ ಪವಾಡ ನಡೆದರೆ, ರೋಹಿತ್ ಸಾರಥ್ಯದ ತಂಡ​ ಪ್ರಶಸ್ತಿ ಸುತ್ತಿಗೆ ಪ್ರವೇಶ ಪಡೆಯುವ ಅವಕಾಶ ಗಿಟ್ಟಿಸಿಕೊಳ್ಳಬಹುದು.

ಏಷ್ಯಾ ಕಪ್​​​ ಸೂಪರ್​ 4 ಹಂತದಲ್ಲಿ ಟೀಂ ಇಂಡಿಯಾ ನಾಳೆ ಅಫ್ಘಾನಿಸ್ತಾನದ ಸವಾಲು ಎದುರಿಸಲಿದೆ. ಈ ಪಂದ್ಯದಲ್ಲಿ ಭರ್ಜರಿ ಗೆಲುವು ದಾಖಲು ಮಾಡುವುದು ಭಾರತದ ಮುಂದಿರುವ ಮೊದಲ ಸವಾಲು. ಉಳಿದಂತೆ, ಇತರೆ ತಂಡಗಳ ಫಲಿತಾಂಶದ ಮೇಲೆ ಭಾರತದ ಭವಿಷ್ಯ ಅಡಗಿದೆ.

ಹೀಗಾದ್ರೆ ಮಾತ್ರ ಟೀಂ ಇಂಡಿಯಾ ಫೈನಲ್‌ಗೆ:

• ಮುಂದಿನ ಪಂದ್ಯದಲ್ಲಿ ಟೀಂ ಇಂಡಿಯಾ ಅಫ್ಘಾನಿಸ್ತಾನ ವಿರುದ್ಧ ಭರ್ಜರಿ ಗೆಲುವು ದಾಖಲಿಸಬೇಕು.
• ಪಾಕಿಸ್ತಾನ ತಂಡ ಶ್ರೀಲಂಕಾ ಹಾಗೂ ಅಫ್ಘಾನಿಸ್ತಾನ ವಿರುದ್ಧ ಸೋಲು ಅನುಭವಿಸಬೇಕು.

ಈ ಎರಡೂ ಪವಾಡಗಳು ನಡೆದಾಗ ಮಾತ್ರ ಟೀಂ ಇಂಡಿಯಾ ನೆಟ್​ ರನ್​​ರೇಟ್​ ಆಧಾರದ ಮೇಲೆ ಮುಂದಿನ ಹಂತಕ್ಕೆ ತಲುಪುವ ಸಾಧ್ಯತೆ ಇದೆ.

ಪಾಕಿಸ್ತಾನ ಮುಂದಿನ ಎರಡು ಪಂದ್ಯಗಳಲ್ಲಿ ಸೋಲುಂಡಾಗ ಪಾಯಿಂಟ್​​​ ಸಮಗೊಳ್ಳಲಿದ್ದು, ಉತ್ತಮ ರನ್​​​ರೇಟ್​ ಗಳಿಸಿದ್ರೆ ಭಾರತದ ಫೈನಲ್​ ಹಾದಿ ಸುಗಮ ಆಗಬಹುದು. ಒಂದು ವೇಳೆ ಪಾಕ್ ತಂಡ ಮುಂದಿನ ಎರಡು ಪಂದ್ಯಗಳ ಪೈಕಿ ಒಂದರಲ್ಲಿ ಗೆದ್ದರೂ, ಭಾರತ ಏಷ್ಯಾ ಕಪ್​​ನಿಂದ ಅಧಿಕೃತವಾಗಿ ಹೊರಬೀಳಲಿದೆ.