ಭಾರತ-ಪಾಕ್ ರೋಚಕ ಪಂದ್ಯದ ವೇಳೆ ಮಹಮ್ಮದ್ ರಿಜ್ವಾನ್ ತಬ್ಬಿ ಕ್ರೀಡಾಸ್ಫೂರ್ತಿ ಮೆರೆದ ಹಾರ್ದಿಕ್

ಏಷ್ಯಾ ಕಪ್ ಕ್ರಿಕೆಟ್ ಟೂರ್ನಿಯಲ್ಲಿ ನಿನ್ನೆ ನಡೆದ ಪಂದ್ಯ ಸಾಕಷ್ಟು ರೋಚಕತೆಯಿಂದ ತುಂಬಿತ್ತು. ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ ಜಿದ್ದಾಜಿದ್ದಿನಿಂದ ಹೋರಾಡಿದ ಭಾರತ ರೋಚಕ ಗೆಲುವು ದಾಖಲಿಸಿದೆ. ಈ ಪಂದ್ಯ ಹಲವು ಕುತೂಹಲಕರ ಸನ್ನಿವೇಶಗಳಿಗೂ ಸಾಕ್ಷಿಯಾಯಿತು.

ದುಬೈ(ಯುಎಇ): ಏಷ್ಯಾ ಕಪ್ 2022 ಟೂರ್ನಿಯ ಎರಡನೇ ಪಂದ್ಯದಲ್ಲಿ ನಿನ್ನೆ ಸಾಂಪ್ರದಾಯಿಕ ಎದುರಾಳಿ ಭಾರತ ಮತ್ತು ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಿದ್ದವು. ಈ ರಣರೋಚಕ ಪಂದ್ಯವನ್ನು ವಿಶ್ವದೆಲ್ಲೆಡೆ ಕೋಟ್ಯಂತರ ಕ್ರೀಡಾಪ್ರೇಮಿಗಳು ವೀಕ್ಷಿಸಿ ಖುಷಿಪಟ್ಟಿದ್ದಾರೆ. ಪಂದ್ಯದ ಕೊನೆಯವರೆಗೂ ಉಭಯ ತಂಡಗಳ ಗೆಲುವು ಸಂಭವನೀಯತೆ ಶೇ 50-50 ಯಂತೆ ಸಾಗಿದ್ದು ಅಭಿಮಾನಿಗಳು ಹಲ್ಲು ಕಚ್ಚಿಕೊಂಡು ಪಂದ್ಯ ನೋಡಿದ್ದಾರೆ.

ಪಾಕ್‌ ನೀಡಿದ ಸರಳ ಗುರಿ ಬೆನ್ನತ್ತುವಾಗ ಭಾರತ ರೋಹಿತ್ ಶರ್ಮಾ, ಕೆ ಎಲ್ ರಾಹುಲ್, ಸೂರ್ಯ ಕುಮಾರ್ ಯಾದವ್ ಹಾಗು ಕೊಹ್ಲಿ ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಈ ಸಂದರ್ಭದಲ್ಲಿ ತಂಡಕ್ಕೆ ಆಸರೆಯಾದವರು ಹಾರ್ದಿಕ್ ಪಾಂಡ್ಯ. ಬೌಲಿಂಗ್‌ನಲ್ಲಿ ಪಾಕ್‌ ಆಟಗಾರರಿಗೆ ನಡುಕ ಹುಟ್ಟಿಸಿ ಬ್ಯಾಟಿಂಗ್‌ನಲ್ಲೂ ಲೀಲಾಜಾಲ ಪ್ರದರ್ಶನ ನೀಡಿದ ಪಾಂಡ್ಯ ಪಂದ್ಯವನ್ನು ಸಿಕ್ಸರ್‌ ಮೂಲಕವೇ ಮುಗಿಸಿ ಭಾರತಕ್ಕೆ ಅಭೂತಪೂರ್ವ ಗೆಲುವು ತಂದಿತ್ತರು.

ಆದ್ರೆ ಒಂದೆಡೆ ಅವರು ಪಂದ್ಯ ಗೆಲ್ಲಿಸಿಕೊಡುವ ಒತ್ತಡದಲ್ಲಿದ್ದರೆ ಮತ್ತೊಂದೆಡೆ ಪಾಂಡ್ಯಾ ಕ್ರೀಡಾಸ್ಪೂರ್ತಿಯನ್ನೂ ಮೆರೆದಿದ್ದು ಕಂಡುಬಂತು. ಸಾಂಪ್ರದಾಯಿಕ ಬದ್ಧ ವೈರಿಗಳ ಕದನವಾದರೂ ಅವರು ಎದುರಾಳಿ ತಂಡದ ವಿಕೆಟ್‌ ಕೀಪರ್‌ ಮಹಮ್ಮದ್ ರಿಜ್ವಾನ್ ಅವರನ್ನು ತಬ್ಬಿಕೊಂಡರು. ಪಾಂಡ್ಯಾರ ಈ ನಡೆ ಭಾರತ-ಪಾಕಿಸ್ತಾನದ ಅಭಿಮಾನಿಗಳ ಖುಷಿ ಹೆಚ್ಚಿಸಿತು. ಈ ಫೋಟೋ ಸಾಮಾಜಿಕ ಜಾಲತಾಣದಲ್ಲೂ ಸಿಕ್ಕಾಪಟ್ಟೆ ವೈರಲ್ ಆಗಿದೆ.