'ನೈಟ್​​ ವಾಚ್​ಮ್ಯಾನ್​ ಕೆಲಸ ಸರಿಯಾಗಿ ಮಾಡಿದ್ದಾರೆ'...ರಹಾನೆ ಕಾಲೆಳೆದ ಕ್ರಿಕೆಟ್​​ ಪ್ರೇಮಿಗಳು!

ಟೀಂ ಇಂಡಿಯಾ ಟೆಸ್ಟ್​​ ಉಪನಾಯಕ ಅಜಿಂಕ್ಯ ರಹಾನೆ ಬ್ಯಾಟಿಂಗ್​ನಲ್ಲಿ ಮೇಲಿಂದ ಮೇಲೆ ವೈಫಲ್ಯ ಅನುಭವಿಸುತ್ತಿದ್ದು, ಇದೇ ವಿಷಯವನ್ನಿಟ್ಟುಕೊಂಡು ಕ್ರಿಕೆಟ್ ಪ್ರೇಮಿಗಳು ಟ್ರೋಲ್ ಮಾಡಿದ್ದಾರೆ.

ಲಾರ್ಡ್ಸ್​​(ಲಂಡನ್​):ಆತಿಥೇಯ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯಲ್ಲೂ ಉಪನಾಯಕ ಅಜಿಂಕ್ಯಾ ರಹಾನೆ ಬ್ಯಾಟಿಂಗ್​​ ವೈಫಲ್ಯ ಮುಂದುವರೆದಿದೆ. ಲಾರ್ಡ್ಸ್​​ ಮೈದಾನದಲ್ಲಿ ನಡೆದ ಎರಡನೇ ಟೆಸ್ಟ್​​ ಪಂದ್ಯದ ಮೊದಲ ಇನ್ನಿಂಗ್ಸ್​​ನಲ್ಲಿ 23 ಎಸೆತಗಳಲ್ಲಿ ಕೇವಲ 1ರನ್​ಗಳಿಕೆ ಮಾಡಿ ವಿಕೆಟ್​ ಒಪ್ಪಿಸಿದರು. ಇವರ ವೈಫಲ್ಯಕ್ಕೆ ನೆಟ್ಟಿಗರು ಆಕ್ರೋಶಗೊಂಡಿದ್ದಾರೆ.

ಬ್ಯಾಟಿಂಗ್​​ನಲ್ಲಿ ರಹಾನೆ ವೈಫಲ್ಯ

ಮೊದಲ ಟೆಸ್ಟ್​​ ಪಂದ್ಯದಲ್ಲೂ ಕೇವಲ 5ರನ್​ಗಳಿಕೆ ಮಾಡಿದ್ದ ವೇಳೆ ರನೌಟ್ ಬಲೆಗೆ ಬಿದ್ದು ನಿರಾಸೆಗೊಳಗಾಗಿದ್ದ ರಹಾನೆ, ಎರಡನೇ ಟೆಸ್ಟ್​​ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ 1ರನ್​ಗಳಿಸಿ ಪೆವಿಲಿಯನ್​ ಸೇರಿಕೊಂಡರು. ಇದಕ್ಕೆ ಕ್ರಿಕೆಟ್​ ಪ್ರೇಮಿಗಳು ಸಾಮಾಜಿಕ ಜಾಲತಾಣದಲ್ಲಿ ರಹಾನೆ 'ನೈಟ್​ ವಾಚ್​ಮ್ಯಾನ್​​' ಕೆಲಸ ಸರಿಯಾಗಿ ಮಾಡಿದ್ದಾರೆಂದು ಕಾಲೆಳೆಯುತ್ತಿದ್ದಾರೆ.

42ರನ್​ಗಳಿಕೆ ಮಾಡಿದ್ದ ವಿರಾಟ್​ ವಿಕೆಟ್​ ಪತನಗೊಳ್ಳುತ್ತಿದ್ದಂತೆ ನೈಟ್​ ವಾಚ್​ಮ್ಯಾನ್​ ಆಗಿ ಮೈದಾನಕ್ಕಿಳಿದಿದ್ದ ರಹಾನೆ, ನಿನ್ನೆ 21 ಎಸೆತಗಳಲ್ಲಿ 1ರನ್​ಗಳಿಕೆ ಮಾಡಿ ಅಜೇಯರಾಗಿ ಉಳಿದಿದ್ದರು. ಇಂದು ಬ್ಯಾಟಿಂಗ್ ಮಾಡಲು ಮೈದಾನಕ್ಕೆ ಬಂದ ಉಪನಾಯಕ ತಾವು ಎದುರಿಸಿದ ಎರಡನೇ ಎಸೆತದಲ್ಲೇ ವಿಕೆಟ್ ಒಪ್ಪಿಸಿದರು. ಹೀಗಾಗಿ ಅವರ ವಿರುದ್ಧ ಕ್ರಿಕೆಟ್​ ಪ್ರೇಮಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕಳೆದ ಎರಡು ವರ್ಷಗಳಿಂದ ರಹಾನೆ ಹೇಳಿಕೊಳ್ಳುವಂತಹ ಪ್ರದರ್ಶನ ಏನು ನೀಡಿಲ್ಲ. 2020ರಲ್ಲಿ 4 ಟೆಸ್ಟ್​ ಪಂದ್ಯಗಳಿಂದ 272ರನ್​ಗಳಿಸಿರುವ ಈ ಕ್ರಿಕೆಟಿಗ 2021ರಲ್ಲಿ ಆಡಿರುವ 9 ಟೆಸ್ಟ್​​ ಪಂದ್ಯಗಳ 14 ಇನ್ನಿಂಗ್ಸ್​ಗಳಿಂದ 269ರನ್​ ಗಳಿಸಿದ್ದಾರೆ. ಆದರೆ, 2014ರಲ್ಲಿ 10 ಪಂದ್ಯಗಳಿಂದ 809 ರನ್​ಗಳಿಸಿದ್ದರು. ಇನ್ನು ಟೀಂ ಇಂಡಿಯಾದ ಮತ್ತೊಬ್ಬ ಆಟಗಾರ ಚೇತೇಶ್ವರ್ ಪೂಜಾರ ಕೂಡಾ ಮೇಲಿಂದ ಮೇಲೆ ವೈಫಲ್ಯ ಅನುಭವಿಸುತ್ತಿದ್ದು, ಎರಡನೇ ಟೆಸ್ಟ್​ನ ಮೊದಲ ಇನ್ನಿಂಗ್ಸ್​​ನಲ್ಲೂ 9ರನ್​ಗಳಿಕೆ ಮಾಡಿ ನಿರಾಸೆಗೊಳಗಾಗಿದ್ದಾರೆ.