ಕಾಬೂಲ್, ಅಫ್ಘಾನಿಸ್ತಾನ:ಏಷ್ಯಾ ಕಪ್ ಸೂಪರ್ 4 ಪಂದ್ಯದಲ್ಲಿ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನ ಆಟಗಾರರ ಮಧ್ಯೆ ಘರ್ಷಣೆ ಸಂಭವಿಸಿತ್ತು. ಇದು ಮೈದಾನದ ಹೊರಗೂ ಪ್ರತಿಬಿಂಬಿಸಿ ಉಭಯ ರಾಷ್ಟ್ರಗಳ ಅಭಿಮಾನಿಗಳು ಹೊಡೆದಾಡಿಕೊಂಡು, ಶಾರ್ಜಾ ಕ್ರೀಡಾಂಗಣದ ಕುರ್ಚಿಗಳನ್ನು ಧ್ವಂಸ ಮಾಡಿದ್ದರು. ಇದೀಗ ಫೈನಲ್ ಪಂದ್ಯದಲ್ಲಿ ಸೋಲುಂಡ ಪಾಕಿಸ್ತಾನವನ್ನು ಆಫ್ಘನ್ ಅಭಿಮಾನಿಗಳು ಗೇಲಿ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಅವ್ಯಾಹತವಾಗಿ ಟೀಕೆ ಮಾಡುತ್ತಿದ್ದಾರೆ.
ಶ್ರೀಲಂಕಾದ ಏಷ್ಯಾ ಕಪ್ ಗೆಲುವನ್ನು ತಮ್ಮದೇ ಗೆಲುವು ಎಂಬಂತೆ ರಸ್ತೆಗಳಲ್ಲಿ ಕುಣಿದು ಕುಪ್ಪಳಿಸುತ್ತಿದ್ದಾರೆ. ಹಾದಿಗಳಲ್ಲಿ ಪಟಾಕಿ ಸಿಡಿಸಿ ಸಂಭ್ರಮಾಚರಣೆ ಮಾಡುತ್ತಿದ್ದಾರೆ. ಆಫ್ಘನ್ ಅಭಿಮಾನಿಗಳು ಇಷ್ಟೆಲ್ಲ ಮಾಡುತ್ತಿರುವುದು ಪಾಕಿಸ್ತಾನವನ್ನು ಉರಿಸಲು ಅನ್ನೋದು ಸತ್ಯ.
ಭಾನುವಾರ ದುಬೈನಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಶ್ರೀಲಂಕಾದ ಆಟಗಾರರು ಯುವಶಕ್ತಿಯ ಸಾಮರ್ಥ್ಯ ಸಾಬೀತು ಮಾಡಿದರು. ಆರಂಭದಲ್ಲಿ ಪಟಪಟನೇ ವಿಕೆಟ್ ಕಳೆದುಕೊಂಡರೂ ಬಳಿಕ ಬನುಕಾ ರಾಜಪಕ್ಸೆ ಹೋರಾಟದ ಫಲದಿಂದ 170 ರನ್ ಬಾರಿಸಿತು. ಬಳಿಕ ಬೌಲಿಂಗ್ನಲ್ಲೂ ಮಿಂಚಿದ ಲಂಕಾ ಪಡೆ ಪಾಕಿಸ್ತಾನವನ್ನು 147 ರನ್ಗಳಿಗೆ ಬಗ್ಗು ಬಡಿದು 6ನೇ ಬಾರಿಗೆ ಪ್ರಶಸ್ತಿಯನ್ನು ಎತ್ತಿ ಹಿಡಿಯಿತು.
ಶ್ರೀಲಂಕಾದ ಈ ವಿಕ್ರಮವನ್ನು ಆಫ್ಘನ್ ಅಭಿಮಾನಿಗಳು ತಮ್ಮ ದೇಶದ ತಂಡವೇ ಟ್ರೋಫಿ ಗೆದ್ದಂತೆ ಸಂಭ್ರಮಾಚರಣೆ ಮಾಡಿದ್ದಾರೆ. ಹರ್ಷೋದ್ಗಾರಗಳೊಂದಿಗೆ, ಕುಣಿದು ಕುಪ್ಪಳಿಸುತ್ತಿರುವ ಜನಸಮೂಹದ ವಿಡಿಯೋವನ್ನು ಅಫ್ಘಾನಿಸ್ತಾನದ ಪತ್ರಕರ್ತ ಅಬ್ದುಲ್ಹಕ್ ಒಮೆರಿ ಅವರು ಟ್ವಿಟ್ಟರ್ನಲ್ಲಿ ಹಂಚಿಕೊಂಡಿದ್ದಾರೆ.
ಇದಲ್ಲದೇ, ಶ್ರೀಲಂಕಾ ತಂಡಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ಸಾಲು ಸಾಲಾಗಿ ಗೆಲುವಿನ ಶುಭಾಶಯ ತಿಳಿಸಿದ್ದಲ್ಲದೇ, ಪಂದ್ಯದಲ್ಲಿ ಪಾಕಿಸ್ತಾನ ತಂಡದ ಕಳಪೆ ಫೀಲ್ಡಿಂಗ್ ಅನ್ನು ಗೇಲಿ ಮಾಡಿದ ಫೋಟೋವನ್ನು ಹರಿಬಿಟ್ಟಿದ್ದಾರೆ.
ಪಾಕ್ಗೆ ಆಫ್ಘನ್ ಅಭಿಮಾನಿಗಳ ಚಾಟಿ ಹೀಗಿದೆ:
ಪಾಕ್ಗೆ ಅಫ್ಘನ್ ಅಭಿಮಾನಿಗಳ ಚಾಟಿ 1) "ಏಷ್ಯಾ ಕಪ್ ಗೆದ್ದ ಶ್ರೀಲಂಕಾಗೆ ಅಭಿನಂದನೆಗಳು. ಮಿಗಿಲಾಗಿ ನಮ್ಮನ್ನು ತುಂಬಾ ಸಂತೋಷಪಡಿಸಿದ್ದಕ್ಕಾಗಿ ಧನ್ಯವಾದಗಳು. ನಿಮ್ಮ ಗೆಲುವನ್ನು ಅಫ್ಘಾನಿಸ್ತಾನ ಸಂಭ್ರಮಿಸುತ್ತಿದೆ" ಎಂದು ಬಳಕೆದಾರನೊಬ್ಬ ಟ್ವೀಟ್ ಮಾಡಿದ್ದಾನೆ.
ಶ್ರೀಲಂಕಾ ಗೆಲುವು ಸಂಭ್ರಮಿಸಿದ ಅಫ್ಘನ್ ಅಭಿಮಾನಿಗಳು 2) ಶ್ರೀಲಂಕಾ ವಿಜಯದ ಫೋಟೋವನ್ನು ಐಸಿಸಿ ಪೋಸ್ಟ್ ಮಾಡಿದ ಚಿತ್ರಕ್ಕೆ ಕೊಂಡಿಯಾಗಿ "ಚಾಂಪಿಯನ್ ತಂಡದೆದುರು ನೀವು 2 ಬಾರಿ ಸೋತಿರಿ, ನಾವು 1 ಬಾರಿ ಗೆದ್ದಿದ್ದೇವೆ" ಎಂದು ಗೇಲಿ ಮಾಡಲಾಗಿದೆ.
ಶ್ರೀಲಂಕಾ ಗೆಲುವು ಸಂಭ್ರಮಿಸಿದ ಅಫ್ಘನ್ ಅಭಿಮಾನಿಗಳು 3) ಮತ್ತೊಬ್ಬ ಬಳಕೆದಾರ ಅಫ್ಘಾನಿಸ್ತಾನದ ಅಭಿಮಾನಿಗಳು ಬೀದಿಗಳಲ್ಲಿ ನೃತ್ಯ ಮಾಡುವ ಮೂಲಕ ಶ್ರೀಲಂಕಾ ಗೆಲುವನ್ನು ಸಂಭ್ರಮಿಸುತ್ತಿರುವ ವಿಡಿಯೋವನ್ನು ಪೋಸ್ಟ್ ಮಾಡಿದ್ದಾರೆ. ಇದಕ್ಕೆ ಅಡಿ ಬರಹವಾಗಿ "ಅಫ್ಘಾನಿಸ್ತಾನದ ಜನರು ಶ್ರೀಲಂಕಾದ ವಿಜಯವನ್ನು ಹೀಗೆ ಆಚರಿಸುತ್ತಾರೆ. #AsiaCup2022," ಅವರು ಟ್ವೀಟ್ ಮಾಡಿದ್ದಾರೆ.
ಶ್ರೀಲಂಕಾ ಗೆಲುವು ಸಂಭ್ರಮಿಸಿದ ಅಫ್ಘನ್ ಅಭಿಮಾನಿಗಳು 4) ಪಾಕಿಸ್ತಾನದ ಮಾಜಿ ಆಟಗಾರ ಶೋಯೆಬ್ ಅಖ್ತರ್ ಪೋಸ್ಟ್ ಮಾಡಿದ ವಿಡಿಯೋದ ಕಾಮೆಂಟ್‌ಗಳಲ್ಲಿ ರೀಪೋಸ್ಟ್ ಮಾಡಿದ ಫೋಟೋದಲ್ಲಿ ಅಫ್ಘಾನಿಸ್ತಾನದ ಅಭಿಮಾನಿಯೊಬ್ಬರು ಪಾಕಿಸ್ತಾನದ ಫೀಲ್ಡಿಂಗ್ ಬಗ್ಗೆ ತಮಾಷೆ ಮಾಡಿದ್ದಾರೆ.
ಶ್ರೀಲಂಕಾ ಗೆಲುವು ಸಂಭ್ರಮಿಸಿದ ಅಫ್ಘನ್ ಅಭಿಮಾನಿಗಳು 5) ಫೈನಲ್‌ನಲ್ಲಿ ಪಾಕಿಸ್ತಾನ ಸೋತದ್ದನ್ನು ವ್ಯಂಗ್ಯವಾಗಿ ಚಿತ್ರಿಸಿದ ಬಳಕೆದಾರ "ಪಾಕಿಸ್ತಾನದ ಅವನತಿಯೇ ನನ್ನ ಸಂತೋಷ" ಎಂದು ಟ್ವೀಟ್ ಮಾಡಿದ್ದಾನೆ.
ಶಾರ್ಜಾದಲ್ಲಿ ನಡೆದಿದ್ದ ಸೂಪರ್ ಫೋರ್ ಹಂತದ ಪಂದ್ಯದಲ್ಲಿ ಪಾಕಿಸ್ತಾನ ಕೊನೇ ಓವರಿನಲ್ಲಿ ಅಪ್ಘಾನಿಸ್ತಾನವನ್ನು ಸೋಲಿಸಿತ್ತು. ಪಾಕ್ನ ಆಸಿಫ್ ಅಲಿ ಅಫ್ಘನ್ ಬೌಲರ್ ಅನ್ನು ಕೆಣಕಿ ಬ್ಯಾಟ್ನಿಂದ ಹೊಡೆಯಲು ಹೋಗಿದ್ದರು. ಇದು ಮೈದಾನದ ಹೊರಗಿನ ಅಭಿಮಾನಿಗಳಲ್ಲಿ ಕ್ರೋಧ ಉಂಟು ಮಾಡಿತ್ತು. ಪಂದ್ಯದ ಬಳಿಕ ಬಡಿದಾಡಿಕೊಂಡ ಉಭಯ ತಂಡಗಳ ಆಟಗಾರರು ಪ್ರೇಕ್ಷಕರ ಗ್ಯಾಲರಿಯ ಕುರ್ಚಿಗಳನ್ನು ಕಿತ್ತು ಒಬ್ಬರ ಮೇಲೊಬ್ಬರು ಎಸೆದಿದ್ದರು.
ಏಷ್ಯಾ ಕಪ್ನ ಆರಂಭದ ಪಂದ್ಯದಲ್ಲಿಯೇ ಶ್ರೀಲಂಕಾವನ್ನು ಮಣಿಸಿದ್ದ ಅಫ್ಘಾನಿಸ್ತಾನ ಸಾಮರ್ಥ್ಯ ಸಾಬೀತು ಮಾಡಿತ್ತು. ಗ್ರೂಪ್ ಹಂತದ 2ನೇ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು ಸೋಲಿಸಿ ಸೂಪರ್ 4 ಹಂತಕ್ಕೆ ಲಗ್ಗೆ ಇಟ್ಟಿತ್ತು. ಇದಾದ ಬಳಿಕ ಸೂಪರ್ ಫೋರ್ನಲ್ಲಿ ಶ್ರೀಲಂಕಾ, ಪಾಕಿಸ್ತಾನ ಮತ್ತು ಭಾರತದ ವಿರುದ್ಧ ಸತತವಾಗಿ ಸೋಲುವ ಮೂಲಕ ಟೂರ್ನಿಯಿಂದ ಹೊರಬಿದ್ದಿತ್ತು.
ಓದಿ:ಕ್ಯಾಚ್‌ ಬಿಟ್ಟು ಮ್ಯಾಚ್‌ ಕಳೆದುಕೊಂಡರೇ ಪಾಕ್ ಆಟಗಾರರು? ಸಿಕ್ಕಾಪಟ್ಟೆ ಟ್ರೋಲ್‌
