Abu Dhabi T10: ಬಾಂಗ್ಲಾ ಟೈಗರ್ಸ್ ಅಬ್ಬರಕ್ಕೆ ಮಂಕಾದ ನಾರ್ದರ್ನ್ ವಾರಿಯರ್ಸ್​​

ಅಬುಧಾಬಿ ಟಿ10(Abu Dhabi T10) ಟೂರ್ನಿಯ ಪಂದ್ಯದಲ್ಲಿ ಬಾಂಗ್ಲಾ ಟೈಗರ್ಸ್ ತಂಡವು ನಾರ್ದರ್ನ್ ವಾರಿಯರ್ಸ್​​ಗೆ 5 ವಿಕೆಟ್‌ಗಳ ಸೋಲುಣಿಸಿದೆ.

ಅಬುಧಾಬಿ:ವಿಲ್ ಜಾಕ್ಸ್((Will Jacks) ಅವರ ಬಿರುಸಿನ ಅರ್ಧಶತಕ ಹಾಗೂ ಬೆನ್ನಿ ಹಾವೆಲ್ ​(11 ಎಸೆತಗಳಲ್ಲಿ 35*)​ ಅಬ್ಬರದ ಬ್ಯಾಟಿಂಗ್​ ನೆರವಿನಿಂದ ಅಬುಧಾಬಿ ಟಿ-10(Abu Dhabi T10) ಟೂರ್ನಿಯಲ್ಲಿ ನಾರ್ದರ್ನ್ ವಾರಿಯರ್ಸ್ ತಂಡವನ್ನು 5 ವಿಕೆಟ್‌ಗಳಿಂದ ಸೋಲಿಸಿದ ಬಾಂಗ್ಲಾ ಟೈಗರ್ಸ್ ಮೊದಲ ಜಯ ದಾಖಲಿಸಿದೆ.

ಭಾನುವಾರ ರಾತ್ರಿ ನಡೆದ ಪಂದ್ಯದಲ್ಲಿ ಟಾಸ್​ ಗೆದ್ದ ಟೈಗರ್ಸ್(Bangla Tigers) ಮೊದಲು ಕ್ಷೇತ್ರ ರಕ್ಷಣೆ ಆಯ್ಕೆ ಮಾಡಿಕೊಂಡಿತು. ನಾರ್ದರ್ನ್ ವಾರಿಯರ್ಸ್​ಗೆ(Northern Warriors) ನಾಯಕ ರೊವ್ಮಾನ್​ ಪೊವೆಲ್​ ಭರ್ಜರಿ ಅರ್ಧಶತಕ(27 ಎಸೆತಗಳಲ್ಲಿ 63) ಸಿಡಿಸಿ ಬೃಹತ್​ ಮೊತ್ತಕ್ಕೆ ನೆರವಾದರು.

ಅಲ್ಲದೇ, ಮೊಯಿನ್​ ಅಲಿ 24 ಹಾಗೂ ಸಮಿತ್​ ಪಟೇಲ್​ 21 ರನ್​ಗಳ ಕಾಣಿಕೆ ನೀಡಿದರು. 10 ಓವರ್​ಗಲ್ಲಿ ವಾರಿಯರ್ಸ್​ 4 ವಿಕೆಟ್​ಗೆ 126 ರನ್​ ಪೇರಿಸಿತು. ಟೈಗರ್ಸ್ ಪರ ಲುಕ್​ ವುಡ್​, ಫೌಲ್ಕ್​ನರ್​, ಉದಾನಾ ಹಾಗೂ ಕರೀಮ್​ ಜನತ್​ ತಲಾ ಒಂದು ವಿಕೆಟ್​ ಪಡೆದರು.

ಬಳಿಕ 127 ರನ್​ಗಳ ಗುರಿ ಬೆನ್ನಟ್ಟಿದ ಟೈಗರ್ಸ್​ ತಂಡ ವಿಲ್ ಜಾಕ್ಸ್ (57*) ಹಾಗೂ ಬೆನ್ನಿ ಹಾವೆಲ್ (35*) ಅಜೇಯ ಆಟದಿಂದ 19.1ನೇ ಓವರ್​ನಲ್ಲೇ 5 ವಿಕೆಟ್​​ ನಷ್ಟಕ್ಕೆ ಗೆಲುವಿನ ನಗೆ ಬೀರಿತು. 58 ರನ್​ಗೆ 5 ವಿಕೆಟ್​ ಕಳೆದುಕೊಂಡರೂ ಈ ಇಬ್ಬರೂ ದಾಂಡಿಗರು ಅಬ್ಬರದ ಬ್ಯಾಟಿಂಗ್​ ಮೂಲಕ ತಂಡಕ್ಕೆ ಜಯ ತಂದಿತ್ತರು.

ಇನ್ನುಳಿದಂತೆ ಆರಂಭಿಕ ಆಟಗಾರ ಝಾಝೈ 17, ಜನತ್​ 16 ರನ್​ ಬಾರಿಸಿ ತಂಡಕ್ಕೆ ನೆರವಾದರು. ವಾರಿಯರ್ಸ್ ಪರ ತಾಹಿರ್​, ಸಮಿತ್​ ಪಟೇಲ್​, ಅಭಿಮನ್ಯು ಮಿಥುನ್(​Abhimanyu Mithun), ಎಮ್ರಿಟ್​ ಹಾಗೂ ಉಮೈರ್​ ಅಲಿ ತಲಾ ಒಂದು ವಿಕೆಟ್​ ಕಬಳಿಸಿದರು. ಅಜೇಯ ಅರ್ಧಶತಕ ಬಾರಿಸಿ ಗೆಲುವಿನ ರೂವಾರಿಯಾದ ವಿಲ್ ಜಾಕ್ಸ್ ಪಂದ್ಯಪುರುಷ ಪ್ರಶಸ್ತಿಗೆ ಭಾಜನರಾದರು.

ಇದನ್ನೂ ಓದಿ:NZ VS IND: ಹರ್ಷಲ್​, ವೆಂಕಟೇಶ್​ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ ನಾಯಕ ರೋಹಿತ್​