ಕನ್ನಡದ 'ವೀಕೆಂಡ್ ವಿಥ್ ರಮೇಶ್' ಕಾರ್ಯಕ್ರಮಕ್ಕೆ ಕ್ರಿಕೆಟಿಗ ರಾಹುಲ್ ದ್ರಾವಿಡ್ ಬರಬೇಕು ಅನ್ನೋದು ಕನ್ನಡಿಗರ ಒತ್ತಾಸೆ. ಮೊದಲ ಸೀಸನ್ನಿಂದಲೂ 'ರಾಹುಲ್ ಕರೆತನ್ನಿ' ಎನ್ನುವ ಕೂಗು ಝೀ ವಾಹಿನಿಯ ಕದ ತಟ್ಟುತ್ತಲೇ ಇದೆ.
ಶುರುವಾಯಿತು 'ಎಲ್ಲಿದ್ದೀರಾ ರಾಹುಲ್ ದ್ರಾವಿಡ್'...'ಕ್ರಿಕೆಟ್ ವಾಲ್' ಕರೆತರಲು ಭಾರೀ ಕಸರತ್ತು
ರಾಹುಲ್ ದ್ರಾವಿಡ್ ಅವರನ್ನು ಕನ್ನಡದ ವೀಕೆಂಡ್ ವಿಥ್ ರಮೇಶ್ ಕಾರ್ಯಕ್ರಮಕ್ಕೆ ಕರೆತರಲು ಸೋಷಿಯಲ್ ಮೀಡಿಯಾ ಅಭಿಯಾನ ಶುರುವಾಗಿದೆ. ಫೇಸ್ಬುಕ್, ಟ್ವಿಟ್ಟರ್, ವಾಟ್ಸಾಪ್ಗಳಲ್ಲಿ #WWRDravid (we want Rahul Dravid) ಹ್ಯಾಷ್ ಟ್ಯಾಗ್ನಡಿ ಪೋಸ್ಟ್ಗಳು ರಾರಾಜಿಸುತ್ತಿವೆ.
ಚಿತ್ರಕೃಪೆ : Zee kannada Facebook
ಕಾರ್ಯಕ್ರಮದ ತಂಡ ಕೂಡ 'ಕ್ರಿಕೆಟ್ ವಾಲ್'ಗೆ ಪತ್ರ ಬರೆದು ಆಹ್ವಾನ ನೀಡಿದೆ. ಆದರೆ, ಈ ಬಗ್ಗೆ ದ್ರಾವಿಡ್ ಅವರಿಂದ ಯಾವ ರಿಯಾಕ್ಷನ್ ಕೂಡ ಬಂದಿಲ್ಲ. ಈಗಾಗಲೇ ಪ್ರಾರಂಭವಾಗಿರುವ ನಾಲ್ಕನೇ ಸೀಸನ್ಗಾದ್ರೂ ರಾಹುಲ್ ಅವರನ್ನು ಸಾಧಕರ ಸೀಟ್ ಮೇಲೆ ಕೂರಿಸಲೇ ಬೇಕು ಅನ್ನೋ ಸಂಕಲ್ಪ ತೊಟ್ಟಿರುವ ವಾಹಿನಿ ಹೊಸ ಮಾರ್ಗ ಕಂಡುಕೊಂಡಿದೆ. ಸೋಷಿಯಲ್ ಮೀಡಿಯಾದಲ್ಲಿ #WWRDravid (we want Rahul Dravid) ಹ್ಯಾಷ್ ಟ್ಯಾಗ್ನಡಿ ಅಭಿಯಾನ ಪ್ರಾರಂಭಿಸಿದೆ.
#WWRDravid ಎಂದು ಎಲ್ಲರೂ ತಮ್ಮ ಫೇಸ್ಬುಕ್ನಲ್ಲಿ ಪೋಸ್ಟ್ ಮಾಡಿ. ದ್ರಾವಿಡ್ ಅವರಿಗೆ ಟ್ಯಾಗ್ ಮಾಡಿ. ಈ ಮಾಡುವ ಮೂಲಕ ಅವರನ್ನು ಸಾಧಕರ ಸೀಟ್'ಗೆ ಕರೆತರುವ ಪ್ರಯತ್ನ ಮಾಡೋಣ ಎಂದು zee kannada ವಾಹಿನಿ ಕೇಳಿಕೊಂಡಿದೆ. ಅವರ ಈ ನೂತನ ಪ್ರಯತ್ನಕ್ಕೆ ಭಾರೀ ರೆಸ್ಪಾನ್ಸ್ ಸಿಕ್ಕಿದೆ. ನಿನ್ನೆಯಿಂದ ನಾಲ್ಕು ಸಾವಿರಕ್ಕೂ ಹೆಚ್ಚು ಜನರು ವಾಹಿನಿಯ ಅಧಿಕೃತ ಪೇಜ್ನ ಪೋಸ್ಟ್ ಶೇರ್ ಮಾಡಿದ್ದಾರೆ. 600 ಕ್ಕೂ ಹೆಚ್ಚು ಜನರು ಕಾಮೆಂಟ್ ಮಾಡಿ, ಲೆಜೆಂಡ್ ತಾರೆ ಕಾರ್ಯಕ್ರಮಕ್ಕೆ ಬರಬೇಕು ಎಂದು ಕೇಳಿಕೊಂಡಿದ್ದಾರೆ. ವಾಟ್ಸಾಪ್ ಸ್ಟೇಟಸ್ನಲ್ಲಿಯೂ we want Rahul Dravid ಪೋಸ್ಟ್ಗಳು ಹರಿದಾಡುತ್ತಿವೆ. ವಾಹಿನಿಯ ಈ ಪ್ರಯತ್ನ ಸಫಲವಾಗುತ್ತಾ ಎಂಬುದನ್ನು ಕಾದು ನೋಡಬೇಕಾಗಿದೆ.