ರಮೇಶ್ ಅರವಿಂದ ನಾಯಕರಾಗಿ ನಟಿಸಿರುವ ಮರ್ಡರ್ ಮಿಸ್ಟರಿ ಸಿನಿಮಾ 'ಶಿವಾಜಿ ಸುರತ್ಕಲ್' ಮುಂದಿನ ಶನಿವಾರ ನಿಮ್ಮ ನೆಚ್ಚಿನ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರ ಕಾಣಲಿದೆ.
ಈ ಸಿನಿಮಾ ಈಗಾಗಲೇ ಒಟಿಟಿಯಲ್ಲಿ ಬಿಡುಗಡೆಯಾಗಿದ್ದು ಮುಂದಿನ ವಾರಾಂತ್ಯದಲ್ಲಿ ಕಿರುತೆರೆಯಲ್ಲಿ ಪ್ರಸಾರವಾಗಲಿದೆ. ಚಂದನವನದ ಹ್ಯಾಂಡ್ಸಮ್‌ ನಟ ರಮೇಶ್ ಅರವಿಂದ್ ಅಭಿನಯದ 101ನೇ ಸಿನಿಮಾ ಶಿವಾಜಿ ಸುರತ್ಕಲ್ ಆಗಿದ್ದು ವಿಭಿನ್ನ ರೀತಿಯ ತಿರುವುಗಳು ಸಿನಿಪ್ರಿಯರಿಗೆ ಮನರಂಜನೆ ನೀಡುವುದಂತೂ ಗ್ಯಾರಂಟಿ.
ಸಚಿವರೊಬ್ಬರ ಪುತ್ರ ಕಾಡಿನ ನಡುವಿನ ರಣಗಿರಿಯ ಹೋಟೆಲ್ವೊಂದರ ಈಜುಕೊಳದ ಸಮೀಪ ಶವವಾಗಿ ಪತ್ತೆಯಾಗುತ್ತಾನೆ. ಇದು ಕೊಲೆಯೇ ಅಥವಾ ಆತ್ಮಹತ್ಯೆಯೇ ಎಂಬುದನ್ನು ಪತ್ತೆ ಹಚ್ಚಲು ಬರುವ ಅಧಿಕಾರಿ ಶಿವಾಜಿ ಸುರತ್ಕಲ್ ಯಾವ ರೀತಿಯಲ್ಲಿ ಈ ಕಗ್ಗಂಟನ್ನು ಬೇಧಿಸುತ್ತಾನೆ? ಅನ್ನೋದು ಚಿತ್ರದ ತಿರುಳು.
ಆಕಾಶ್ ಶ್ರೀವತ್ಸ ನಿರ್ದೇಶನದ ಈ ಸಿನಿಮಾದಲ್ಲಿ ನಾಯಕರಾಗಿ ರಮೇಶ್ ಅರವಿಂದ್ ಕಾಣಿಸಿಕೊಂಡಿದ್ದಾರೆ. ಅವರ ಮಡದಿಯಾಗಿ ರಾಧಿಕಾ ನಾರಾಯಣ್ ನಟಿಸಿದ್ದಾರೆ. ಮನೋವೈದ್ಯೆಯಾಗಿ ಆರೋಹಿ ನಾರಾಯಣ್ ಹಾಗೂ ವಿಲನ್ ಪಾತ್ರದಲ್ಲಿ ಕಿರುತೆರೆಯ ಜನಪ್ರಿಯ ನಟ ವಿನಯ್ ಗೌಡ ಅಭಿನಯಿಸಿದ್ದಾರೆ.
