ಸ್ಟಾರ್ ಡೈರೆಕ್ಟರ್ ರಾಜಮೌಳಿಗೆ ಬ್ರಿಟನ್ ಬ್ಯೂಟಿ ಡೈಸಿ ಎಡ್ಗರ್ ಜೋನ್ಸ್ ಶಾಕ್ ನೀಡಿದ್ದಾರೆ. 'RRR' ಚಿತ್ರಕ್ಕೆ ಬೆನ್ನು ತೋರಿಸಿ ಬೈ ಬೈ ಹೇಳಿ ಹೊರ ನಡೆದಿದ್ದಾರೆ.
ಹೌದು, ಭಾರತೀಯ ಚಿತ್ರರಂಗದ ಟ್ಯಾಲೆಂಟೆಡ್ ನಿರ್ದೇಶಕ ರಾಜಮೌಳಿ 'RRR' ಚಿತ್ರದಲ್ಲಿ ಬ್ಯುಸಿಯಾಗಿದ್ದಾರೆ. ಕಳೆದ ತಿಂಗಳು ಮಾಧ್ಯಮಗಳ ಎದುರು ಹಾಜರಾಗಿ, ತಮ್ಮ ಪರಿವಾರ( ಸ್ಟಾರ್ಕಾಸ್ಟ್)ದ ಮಾಹಿತಿ ಹಂಚಿಕೊಂಡು, ಮತ್ತೇ ಶೂಟಿಂಗ್ ಸೆಟ್ ಸೇರಿಕೊಂಡಿದ್ದರು. ಎಲ್ಲವೂ ಸರಾಗವಾಗಿ ನಡೆಯುತ್ತಿದೆ ಎನ್ನುವಷ್ಟರಲ್ಲಿಯೇ ಈ ಚಿತ್ರದಲ್ಲಿ ನಟಿಸಬೇಕಿದ್ದ ಬ್ರಿಟನ್ ನಟಿ ಡೈಸಿ ತಮ್ಮ ಮನಸ್ಸು ಬದಲಿಸಿಕೊಂಡಿದ್ದಾರೆ. 'RRR' ಚಿತ್ರದಲ್ಲಿ ನಾನು ನಟಿಸೋಲ್ಲ ಎಂದು ಅಧಿಕೃತವಾಗಿ ಹೇಳಿಕೊಂಡಿದ್ದಾರೆ.
ನಿನ್ನೆ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಡೈಸಿ 'ಕೆಲವು ಪರಿಹರಿಸಲಾಗದ ಕೌಟುಂಬಿಕ ಕಾರಣಗಳಿಂದ 'RRR' ಚಿತ್ರದಲ್ಲಿ ನಟಿಸುತ್ತಿಲ್ಲ. ಚಿತ್ರದ ಸ್ಕ್ರಿಪ್ಟ್ ಅದ್ಭುತವಾಗಿದೆ. ನನ್ನ ಪಾತ್ರವೂ ಕೂಡ ಅಷ್ಟೆ ಗಟ್ಟಿತನದಿಂದ ಕೂಡಿತ್ತು. ಈ ಚಿತ್ರತಂಡಕ್ಕೆ ಒಳ್ಳೆಯದಾಗಲಿ' ಎಂದು ಹರಿಸಿದ್ದಾರೆ. 'RRR' ತಂಡ ಕೂಡ ಈ ವಿಷಯನ್ನು ಕನ್ಫರ್ಮ್ ಮಾಡಿದೆ. ಅವರ ಭವಿಷ್ಯ ಉಜ್ವಲವಾಗಲಿ ಎಂದು ವಿಶ್ ಮಾಡಿದೆ.
ಈ ಸುದ್ದಿ ಟಾಲಿವುಡ್ ಸಿನಿರಸಿಕರಲ್ಲಿ ದಿಗಿಲು ಮೂಡಿಸಿದೆ. ಇಂಗ್ಲೆಂಡ್ ಚೆಲುವೆಯನ್ನು ಕಣ್ತುಂಬಿಕೊಳ್ಳಲು ಕಾತರದಿಂದ ಕಾಯುತ್ತಿದ್ದ ಅಭಿಮಾನಿಗಳಿಗೆ ನಿರಾಸೆಯಾಗಿದೆ.
ಇನ್ನು 'RRR' ಚಿತ್ರದಲ್ಲಿ ಜ್ಯೂನಿಯರ್ ಎನ್ಟಿಆರ್, ರಾಮ್ ಚರಣ್, ಬಾಲಿವುಡ್ ನಟ ಅಜಯ್ ದೇವಗನ್, ನಟಿ ಆಲಿಯಾ ಭಟ್ ನಟಿಸುತ್ತಿದ್ದಾರೆ. ಇದು ಸ್ವಾತಂತ್ರ್ಯ ಹೋರಾಟಗಾರ ಕೋಮರಾಮ್ ಭೀಮ ಹಾಗೂ ಸೀತರಾಮರಾಜು ಅವರ ಕುರಿತಾದ ಚಿತ್ರ. 2020 ಜುಲೈ 30 ಈ ಸಿನಿಮಾ ಬಿಡುಗಡೆಯಾಗಲಿದೆ.