ಆ ಬೇಸರದಿಂದ ತಾತ್ಕಾಲಿಕವಾಗಿ ಚಿತ್ರೀಕರಣ ನಿಲ್ಲಿಸಿದ 'ಪ್ರೇಮಲೋಕ' ಧಾರಾವಾಹಿ ತಂಡ

'ಪ್ರೇಮಲೋಕ' ಧಾರಾವಾಹಿಯಲ್ಲಿ ನಟಿಸುತ್ತಿದ್ದ ಹಿರಿಯ ನಟ ಹುಲಿವಾನ್ ಗಂಗಾಧರಯ್ಯ ಕೋರೊನಾ ಸೋಂಕಿನ ಕಾರಣ ಕೆಲವು ದಿನಗಳ ಹಿಂದೆ ನಿಧನರಾಗಿದ್ದರು. ನಂತರ ಅವರ ಪಾತ್ರ ಮಾಡುತ್ತಿದ್ದ ಸಿದ್ದರಾಜ ಕಲ್ಯಾಣ್​​​ಕರ್ ಕೂಡಾ ಸೆಪ್ಟೆಂಬರ್ 7ರಂದು ನಿಧನರಾಗಿದ್ದರು. ಈ ಬೇಸರದಿಂದ ಧಾರಾವಾಹಿ ತಂಡ ತಾತ್ಕಾಲಿಕವಾಗಿ ಚಿತ್ರೀಕರಣ ನಿಲ್ಲಿಸಿದೆ.

ಸೆಪ್ಟೆಂಬರ್​ 7 ರಂದು ಬೆಳಗ್ಗೆ 60 ನೇ ವರ್ಷದ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದ ಹಿರಿಯ ನಟ ಸಿದ್ದರಾಜ ಕಲ್ಯಾಣ್​ಕರ್ ಅಂದು ರಾತ್ರಿ ಹೃದಯಾಘಾತದಿಂದ ನಿಧನರಾಗಿದ್ದರು. ಈ ಬೇಸರಿಂದ ಇದೀಗ 'ಪ್ರೇಮಲೋಕ' ಧಾರಾವಾಹಿ ತಂಡ ತಾತ್ಕಾಲಿಕವಾಗಿ ಚಿತ್ರೀಕರಣ ನಿಲ್ಲಿಸಿದೆ.

'ಪ್ರೇಮಲೋಕ' ಧಾರಾವಾಹಿ ತಂಡ

'ಪ್ರೇಮಲೋಕ'ದಲ್ಲಿ ನಾಯಕನ ಅಜ್ಜನಾಗಿ ಅಭಿನಯಿಸಿದ್ದ ಸಿದ್ದರಾಜ್ ಕಲ್ಯಾಣ್​​​ಕರ್​ ಕಿರುತೆರೆ ಮಾತ್ರವಲ್ಲದೆ ಬೆಳ್ಳಿತೆರೆಯಲ್ಲಿಯೂ ಹೆಸರು ಮಾಡಿದ್ದರು. ನಿಧನರಾಗುವ ದಿನ ಬೆಳಗ್ಗೆ ಧಾರಾವಾಹಿ ಸೆಟ್​​​​​​ನಲ್ಲಿ ತಮ್ಮ 60 ನೇ ವರ್ಷದ ಹುಟ್ಟುಹಬ್ಬ ಕೂಡಾ ಆಚರಿಸಿಕೊಂಡಿದ್ದರು. ಸಿದ್ದರಾಜ್ ಅವರಿಗೂ ಮುನ್ನ ಆ ಧಾರಾವಾಹಿಯಲ್ಲಿ ಅದೇ ಪಾತ್ರ ನಿರ್ವಹಿಸುತ್ತಿದ್ದ ಹುಲಿವಾನ್ ಗಂಗಾಧರಯ್ಯ ಅವರು ಕೂಡಾ ಕೋವಿಡ್ - 19 ಕಾರಣದಿಂದ ಮೃತಪಟ್ಟಿದ್ದರು. ಧಾರಾವಾಹಿಯ ಸದಸ್ಯರು ಮಂಗಳವಾರ ಸೆಟ್​​​​​​ಗೆ ಬಂದಾಗ ಕಲ್ಯಾಣ್​​​​​​​​​​​​​​​​​​​​​​ಕರ್ ಅವರು ಇನ್ನಿಲ್ಲ ಎಂಬ ಕಹಿಸುದ್ದಿ ಕೇಳಿದಾಕ್ಷಣ ಶಾಕ್ ಆಗಿದ್ದಾರೆ.

ಹುಲಿವಾನ್ ಗಂಗಾಧರಯ್ಯ

ಆ ದಿನ ಕಲ್ಯಾಣ್​​ಕರ್ ಶೂಟಿಂಗ್​ ಸೆಟ್​​ಗೆ ಬರುವಾಗ ಸ್ವಲ್ಪ ಆರೋಗ್ಯ ಸರಿ ಇರಲಿಲ್ಲವಾದ್ದರಿಂದ ವೈದ್ಯರ ಬಳಿ ಹೋಗಿ ಚಿಕಿತ್ಸೆ ಪಡೆದಿದ್ದರು. ಆದರೂ ನಮ್ಮೊಂದಿಗೆ ಶೂಟಿಂಗ್​​​​​​​​​​​​​​​​​ನಲ್ಲಿ ಉತ್ಸಾಹದಿಂದ ಪಾಲ್ಗೊಂಡಿದ್ದರು. ನಮ್ಮ ಧಾರಾವಾಹಿಯಲ್ಲಿ ನಟಿಸುತ್ತಿದ್ದ ಹುಲಿವಾನ್ ಗಂಗಾಧರಯ್ಯ ಹಾಗೂ ಸಿದ್ದರಾಜ್ ಕಲ್ಯಾಣ್​​​​​​​ಕರ್​​ನಂತ ಇಬ್ಬರು ಹಿರಿಯ ಕಲಾವಿದರನ್ನು ಕಳೆದುಕೊಂಡಿರುವುದು ದುರಾದೃಷ್ಟಕರ. ನೀನಾಸಂನಲ್ಲಿ ತರಬೇತಿ ಪಡೆದಿದ್ದ ಸಿದ್ದರಾಜ್ ಹೊಸಬರಿಗೆ ತಮಗೆ ತಿಳಿದ ವಿಚಾರಗಳನ್ನು ಹೇಳಿಕೊಡುತ್ತಿದ್ದರು. ಅವರು ಇನ್ನಿಲ್ಲ ಎಂಬ ವಿಚಾರ ಕೇಳಿ ಎಲ್ಲರಿಗೂ ಶಾಕ್ ಆಗಿದೆ ಎನ್ನುತ್ತಾರೆ ನಾಯಕಿ ಅಂಕಿತನವ್ಯಾ ಗೌಡ.

ಸಿದ್ದರಾಜ ಕಲ್ಯಾಣ್​​ಕರ್

ಸಿದ್ದರಾಜ್​​ ಕಲ್ಯಾಣ್​​​​​​​ಕರ್ ನಟಿಸುತ್ತಿದ್ದ ಪಾತ್ರಕ್ಕೆ ಧಾರಾವಾಹಿ ತಂಡ ಸೂಕ್ತ ಹಿರಿಯ ಕಲಾವಿದರನ್ನು ಹುಡುಕುತ್ತಿದ್ದು ಕೆಲವು ದಿನಗಳವರೆಗೂ ತಾತ್ಕಾಲಿಕವಾಗಿ ಶೂಟಿಂಗ್ ಸ್ಥಗಿತಗೊಳಿಸಿದೆ.

ಅಂಕಿತ, ವಿಜಯ್ ಸೂರ್ಯ