ಇಂದಿನಿಂದ 'ಮಗಳು ಜಾನಕಿ' ಫ್ರೆಷ್ ಎಪಿಸೋಡ್​​​​​​​​​​​​​​​​​​​​​​​​​ ಆರಂಭ: ಜೊತೆಗೆ ಬೇಸರದ ಸುದ್ದಿಯೂ ಇದೆ..ಏನದು..?

ಟಿ.ಎನ್. ಸೀತಾರಾಮ್ ನಿರ್ದೇಶನದ 'ಮಗಳು ಜಾನಕಿ' ಧಾರಾವಾಹಿಯ ಫ್ರೆಷ್ ಎಪಿಸೋಡ್​​​​​ಗಳು ಇಂದಿನಿಂದ ಆರಂಭವಾಗಲಿದ್ದು ಎರಡು ವಾರಗಳ ನಂತರ ಧಾರಾವಾಹಿ ಪ್ರಸಾರ ನಿಲ್ಲಿಸಲಿದೆ. ಇದು ಧಾರಾವಾಹಿಪ್ರಿಯರಿಗೆ ಬೇಸರದ ಸಂಗತಿಯಾಗಿದೆ.

ಸುಮಾರು 2 ತಿಂಗಳಿಂದ ಪ್ರಸಾರವಾಗದ ಧಾರಾವಾಹಿಗಳು ಇಂದು ಮತ್ತೆ ಹೊಸ ಎಪಿಸೋಡ್​​​​ಗಳೊಂದಿಗೆ ಪ್ರಸಾರ ಆರಂಭಿಸಿವೆ. ಅದರಲ್ಲಿ ಟಿ.ಎನ್​​. ಸೀತಾರಾಮ್​​ ನಿರ್ದೇಶನದ 'ಮಗಳು ಜಾನಕಿ' ಕೂಡಾ ಒಂದು. ಇದು ವೀಕ್ಷಕರಿಗೆ ಸಂತೋಷದ ವಿಚಾರವಾದರೂ ಬೇಸರದ ಸುದ್ದಿಯೊಂದಿದೆ.

ಇಂದಿನಿಂದ 'ಮಗಳು ಜಾನಕಿ' ಪ್ರಸಾರ ಆರಂಭ

'ಮಗಳು ಜಾನಕಿ' ಇಂದಿನಿಂದ ಪ್ರಸಾರ ಆರಂಭಿಸಿದರೂ 2 ವಾರಗಳ ನಂತರ ಅಂತ್ಯ ಕಾಣಲಿದೆ. ಸಾವಿರಾರು ವೀಕ್ಷಕರ ಮನಗೆದ್ದ ಕಿರುತೆರೆ ಧಾರಾವಾಹಿಗಳಲ್ಲಿ 'ಮಗಳು ಜಾನಕಿ' ಕೂಡಾ ಒಂದು. ಉತ್ತಮ ಕಥಾಹಂದರ ಹೊಂದಿರುವ ಕೌಟುಂಬಿಕ ಧಾರಾವಾಹಿ 'ಮಗಳು ಜಾನಕಿ' ಪ್ರಸಾರ ನಿಲ್ಲಿಸುತ್ತಿರುವುದು ಟಿ.ಎನ್​​​​​​. ಸೀತಾರಾಮ್ ಅಭಿಮಾನಿಗಳಿಗೆ ಬಹಳ ಬೇಸರ ತಂದಿದೆ. ಮಾಯಾಮೃಗ, ಮನ್ವಂತರ, ಮಳೆಬಿಲ್ಲು, ಮುಕ್ತ, ಮುಕ್ತ ಮುಕ್ತ, ಮಹಾಪರ್ವದಂತಹ ಸೂಪರ್ ಹಿಟ್ ಧಾರಾವಾಹಿಗಳನ್ನು ಕಿರುತೆರೆ ಲೋಕಕ್ಕೆ ಕೊಡುಗೆಯಾಗಿ ನೀಡಿರುವ ಟಿ.ಎನ್​​​​​​. ಸೀತಾರಾಮ್, 'ಮಗಳು ಜಾನಕಿ' ಮೂಲಕ ಕೂಡಾ ಕಿರುತೆರೆ ಲೋಕದಲ್ಲಿ ಹೊಸ ಹವಾ ಸೃಷ್ಟಿಸಿದ್ದರು.

2 ವಾರಗಳು ಮಾತ್ರ ಪ್ರಸಾರವಾಗುವ 'ಮಗಳು ಜಾನಕಿ'

'ಮಗಳು ಜಾನಕಿ' ಧಾರಾವಾಹಿಯಲ್ಲಿ ಇಂದಿನ ಸಂಚಿಕೆ ಮುಗಿದರೆ ನಾಳೆ ಕಥೆ ಏನಿರಬಹುದು ಎಂದು ವೀಕ್ಷಕರು ಜಾತಕ ಪಕ್ಷಿಗಳಂತೆ ಕಾದು ನೋಡುತ್ತಿದ್ದರು. ಆದರೆ ಕಲರ್ಸ್ ಸೂಪರ್ ವಾಹಿನಿ ತಾತ್ಕಾಲಿಕವಾಗಿ ಪ್ರಸಾರ ನಿಲ್ಲಿಸುತ್ತಿರುವ ಕಾರಣ ಈ ಧಾರಾವಾಹಿ ಕೂಡಾ ಮುಕ್ತಾಯಗೊಳ್ಳುತ್ತಿದೆ. ಧಾರಾವಾಹಿಯನ್ನು ಬೇರೆ ಚಾನೆಲ್​​​​​ನಲ್ಲಿ ಮುಂದುವರಿಸಿ ಎಂದು ವೀಕ್ಷಕರು ಬೇಡಿಕೆಯಿಟ್ಟರೂ ಅದು ಸಾಧ್ಯವಿಲ್ಲ ಎಂದಿದ್ದಾರೆ ಸೀತಾರಾಮ್. ಈ ಧಾರಾವಾಹಿಯನ್ನು ಕಳೆದುಕೊಳ್ಳಲು ಮನಸ್ಸಿಲ್ಲದವರು 'ಮರಳಿ ಜಾನಕಿ' ಎಂಬ ಅಭಿಯಾನವನ್ನು ಕೂಡಾ ಸಾಮಾಜಿಕ ಜಾಲತಾಣದಲ್ಲಿ ಆರಂಭಿಸಿದ್ದರು. ಇದಕ್ಕೂ ನೂರಾರು ಜನ ವೀಕ್ಷಕರು ಬೆಂಬಲ ನೀಡಿದ್ದರು. ಇದರಿಂದ ಅವರಿಗೆ ಈ ಧಾರಾವಾಹಿ ಮೇಲಿದ್ದ ವ್ಯಾಮೋಹ ಎಷ್ಟು ಎಂದು ತಿಳಿಯುತ್ತದೆ. ಒಟ್ಟಿನಲ್ಲಿ ಬಹಳಷ್ಟು ವೀಕ್ಷಕರ ಮನ ಗೆದ್ದಿದ್ದ ಧಾರಾವಾಹಿ ಅರ್ಧಕ್ಕೆ ಪ್ರಸಾರ ನಿಲ್ಲಿಸುತ್ತಿರುವುದು ಬೇಸರದ ಸಂಗತಿ.

ನಿರ್ದೇಶಕ ಟಿ.ಎನ್. ಸೀತಾರಾಮ್