ವೀಕ್ಷಕರನ್ನು ಮನರಂಜಿಸಲು ಬರುತ್ತಿದೆ ಮತ್ತೊಂದು ಪೌರಾಣಿಕ ಧಾರಾವಾಹಿ

ಕನ್ನಡ ಕಿರುತೆರೆಯಲ್ಲಿ ಪ್ರತಿದಿನ ಹೊಸ ಹೊಸ ಡಬ್ಬಿಂಗ್ ಧಾರಾವಾಹಿಗಳು ಪ್ರಸಾರವಾಗುತ್ತಿವೆ. ಇದೀಗ ಮತ್ತೊಂದು ಡಬ್ಬಿಂಗ್ ಧಾರಾವಾಹಿ 'ಪರಮಾವತಾರಿ ಶ್ರೀಕೃಷ್ಣ' ಜೂನ್ 22 ರಿಂದ ಪ್ರಸಾರ ಕಾಣಲಿದೆ.

ಕಿರುತೆರೆಯಲ್ಲಿ ಮತ್ತೆ ಪೌರಾಣಿಕ ಧಾರಾವಾಹಿಗಳ ಅಬ್ಬರ ಆರಂಭವಾಗಿವೆ. ಇದೀಗ ಜೀ ಕನ್ನಡ ವಾಹಿನಿಯಲ್ಲಿ 'ಪರಮಾವತಾರಿ ಶ್ರೀಕೃಷ್ಣ' ಎಂಬ ಧಾರಾವಾಹಿ ಆರಂಭವಾಗುತ್ತಿದೆ. ಈ ಧಾರಾವಾಹಿ ಶ್ರೀ ಕೃಷ್ಣನ ಲೀಲೆಗಳನ್ನು ಕನ್ನಡ ಕಿರುತೆರೆ ವೀಕ್ಷಕರಿಗೆ ಉಣಬಡಿಸಲಿದೆ.

ಜೂನ್ 22 ರಿಂದ ಸಂಜೆ 6-7ರವರೆಗೆ ಸೋಮವಾರದಿಂದ ಶನಿವಾರದವರೆಗೆ ಈ ಧಾರಾವಾಹಿ ಪ್ರಸಾರವಾಗಲಿದೆ. ಈ ಬಗ್ಗೆ ಜೀ ಕನ್ನಡ ವಾಹಿನಿಯ ಬ್ಯುಸ್ನೆಸ್​​​​​​​​​​​ ಹೆಡ್ ರಾಘವೇಂದ್ರ ಹುಣಸೂರು ಮಾತನಾಡಿ 'ಕನ್ನಡ ವೀಕ್ಷಕರು ಪೌರಾಣಿಕ ಧಾರಾವಾಹಿಗಳನ್ನು ಬಹಳ ಇಷ್ಟಪಟ್ಟು ವೀಕ್ಷಿಸುತ್ತಾರೆ. ಜೀ ಕನ್ನಡ ವಾಹಿನಿಯು ವೀಕ್ಷಕರ ಅಭಿರುಚಿಯನ್ನು ಅರಿತು ಅದಕ್ಕೆ ತಕ್ಕಂತೆ ಕಾರ್ಯಕ್ರಮಗಳನ್ನು ರೂಪಿಸುತ್ತಾ ಬಂದಿದೆ. ಈ ಸಾಲಿಗೆ 'ಪರಮಾವತಾರಿ ಶ್ರೀಕೃಷ್ಣ' ಕೂಡಾ ಸೇರ್ಪಡೆಯಾಗಿದೆ.

'ಪರಮಾವತಾರಿ ಶ್ರೀಕೃಷ್ಣ' (ಫೋಟೋ ಕೃಪೆ: ಜೀ ಕನ್ನಡ)

ಶ್ರೀಕೃಷ್ಣನ ಬಾಲ್ಯ, ಕೌಮಾರ್ಯ, ಯೌವನ ಹಾಗೂ ಕುರುಕ್ಷೇತ್ರದಲ್ಲಿ ಹೋರಾಟ, ಸೋದರ ಪ್ರೇಮ, ರಾಧೆಯ ಪ್ರೀತಿ ಎಲ್ಲವೂ ಈ ಧಾರಾವಾಹಿಯಲ್ಲಿ ಇರಲಿದೆ. ಈ ಮೂಲಕ ಜೀ ಕನ್ನಡ ವಾಹಿನಿಯು ವೀಕ್ಷಕರನ್ನು ಮನರಂಜನೆಯ ತುತ್ತ ತುದಿಗೆ ಕೊಂಡೊಯ್ಯುವುದರಲ್ಲಿ ಅನುಮಾನವಿಲ್ಲ' ಎಂದು ರಾಘವೇಂದ್ರ ಹುಣಸೂರು ಹೇಳುತ್ತಾರೆ.

ಇದೂ ಕೂಡಾ ಡಬ್ಬಿಂಗ್ ಧಾರಾವಾಹಿಯಾಗಿದ್ದು ಜೀ ಹಿಂದಿ ವಾಹಿನಿಯಲ್ಲಿ 2017 ರಲ್ಲಿ ಆರಂಭವಾಗಿ ಮೂರು ವರ್ಷಗಳ ಕಾಲ ಪ್ರಸಾರ ಕಂಡಿತ್ತು. ಇದೀಗ ಈ ಧಾರಾವಾಹಿ ಕನ್ನಡಕ್ಕೆ ಡಬ್ ಆಗಿ ಬರುತ್ತಿದೆ.