ಹಳ್ಳಿಮೇಷ್ಟ್ರೇ..ಹಳ್ಳಿಮೇಷ್ಟ್ರೇ..ಹಾಡು ಕೇಳಿದೊಡನೆ ಕಣ್ಣ ಮುಂದೆ ಬರುವುದು ಸಿಲ್ಕ್ಸ್ಮಿತಾ. ಗ್ಲಾಮರ್ ಹಾಗೂ ತನ್ನ ಮಾದಕ ಕಣ್ಣುಗಳಿಂದಲೇ ಹುಡುಗರ ತಲೆ ಕೆಡಿಸಿದ್ದ ಸಿಲ್ಕ್ಸ್ಮಿತಾ ಅಲಿಯಾಸ್ ವಿಜಯಲಕ್ಷ್ಮಿ 90 ರ ದಶಕದಲ್ಲಿ ಚಿತ್ರರಂಗದಲ್ಲಿ ಹೆಸರು ಮಾಡಿದ ನಟಿ.
ಇನ್ನು ಮಲಯಾಳಂ ನಟಿ ಶಕೀಲಾ ಕೂಡಾ ಯಾರಿಗೆ ಗೊತ್ತಿಲ್ಲ..? ಬಿ ಗ್ರೇಡ್ ಸಿನಿಮಾಗಳಿಂದ ಹೆಸರಾಗಿದ್ದ ಶಕೀಲಾ ಸಿನಿಮಾಗಳು ರಿಲೀಸ್ ಆಗುತ್ತಿವೆ ಎಂದರೆ ಸ್ಟಾರ್ಗಳಾದ ಮೋಹನ್ ಲಾಲ್, ಮುಮ್ಮುಟಿ ಸಿನಿಮಾ ನಿರ್ಮಾಪಕರು ತಮ್ಮ ಸಿನಿಮಾಗಳ ಬಿಡುಗಡೆ ದಿನಾಂಕವನ್ನು ಮುಂದೂಡುತ್ತಿದ್ದರಂತೆ. ಈ ನಟಿಯರಿಬ್ಬರೂ ಒಂದೇ ಸಿನಿಮಾದಲ್ಲಿ ನಟಿಸುವ ಸಂದರ್ಭ ಬಂದಾಗ ಶಕೀಲಾಗೆ ಎಂದೂ ಮರೆಯದ ಅನುಭವ ಉಂಟಾಯ್ತಂತೆ. ಅದು ಶಕೀಲಾಗೆ ಮೊದಲ ಸಿನಿಮಾ. ಆ ಸಿನಿಮಾದಲ್ಲಿ ಸಿಲ್ಕ್ಸ್ಮಿತಾ ತಂಗಿ ಪಾತ್ರದಲ್ಲಿ ಶಕೀಲಾ ನಟಿಸಬೇಕಿದ್ದು ಸ್ಮಿತಾ ತನ್ನ ತಂಗಿಗೆ ಕಪಾಳಕ್ಕೆ ಹೊಡೆಯುವ ದೃಶ್ಯ ಇತ್ತಂತೆ. ಈ ದೃಶ್ಯಕ್ಕಾಗಿ ರಿಹರ್ಸಲ್ ಮಾಡೋಣವೇ ಎಂದು ಶಕೀಲಾ ಕೇಳಿದಾಗ ಟೇಕ್ನಲ್ಲಿ ಓಕೆ ಮಾಡಬಹುದು ಡೋಂಟ್ ವರಿ ಎಂದರಂತೆ ಸಿಲ್ಕ್ಸ್ಮಿತಾ.
ಇನ್ನು ಕ್ಯಾಮರಾ ಮುಂದೆ ಬಂದು ನಿಂತಾಗ ಸಿಲ್ಕ್ಸ್ಮಿತಾ ಶಕೀಲಾ ಕೆನ್ನೆಗೆ ಜೋರಾಗಿ ಬಾರಿಸಿದರಂತೆ. ಟೇಕ್ ಓಕೆ ಆದರೂ ಆ ನೋವನ್ನು ತಾಳಲಾರದೆ ಶಕೀಲಾ ಅಲ್ಲಿ ನಿಲ್ಲದೆ ಅಳುತ್ತಾ ಮನೆಗೆ ಬಂದರಂತೆ. ಆದರೆ ಎರಡು ದಿನಗಳ ಕಾಲ ಶೂಟಿಂಗ್ಗೆ ಹೋಗದೆ ಅದೇ ವಿಷಯ ನೆನಪಿಸಿಕೊಂಡು ಅಳುತ್ತಾ ಕುಳಿತಿದ್ದರಂತೆ. ಆದರೆ ಚಿತ್ರದ ನಿರ್ಮಾಪಕ ಶಕೀಲಾಗೆ ಕರೆ ಮಾಡಿ ಇನ್ನೆಂದೂ ಈ ರೀತಿ ಆಗುವುದಿಲ್ಲ ಎಂದು ಭರವಸೆ ಕೊಟ್ಟ ಬಳಿಕ ಶೂಟಿಂಗ್ ಹೋದರಂತೆ. ಶೂಟಿಂಗ್ ಜಾಗದಲ್ಲಿ ಸಿಲ್ಕ್ಸ್ಮಿತಾರನ್ನು ನೋಡಿದ ಶಕೀಲಾ ಅವರ ಬಳಿ ಹೋಗದೆ ಒಂದೆಡೆ ಕುಳಿತಿದ್ದರಂತೆ. ಆಗ ಶಕೀಲಾ ಬಳಿ ಬಂದ ಸಿಲ್ಕ್, ಆಕೆಗೆ ಚಾಕೊಲೇಟ್ , ಬಿಸ್ಕೆಟ್ ಬಾಕ್ಸ್ ನೀಡಿ 'ಅಳಬೇಡ, ಸೀನ್ ನೈಜವಾಗಿ ಬರಲೆಂದು ನಿನಗೆ ಹಾಗೆ ಹೊಡೆದದ್ದು' ಎಂದರಂತೆ.
ಈ ಘಟನೆಯನ್ನು ಸಂದರ್ಶನವೊಂದರಲ್ಲಿ ಹೇಳಿಕೊಂಡಿರುವ ಶಕೀಲಾ, ಸಿಲ್ಕ್ಸ್ಮಿತಾ ನನಗೆ ಹೊಡೆಯಲು ಕಾರಣ ಏನು ಎಂಬುದು ಇನ್ನೂ ತಿಳಿದಿಲ್ಲ. ಸೀನ್ ನೈಜವಾಗಿ ಬರಲು ಯಾರೂ ಅಷ್ಟು ಜೋರಾಗಿ ಹೊಡೆಯುವುದಿಲ್ಲ. ಬಹುಶ: ನಾನು ಸಿನಿಮಾ ಇಂಡಸ್ಟ್ರಿಯಲ್ಲಿ ಅವರಿಗಿಂತ ಹೆಸರು ಮಾಡಿ ಎತ್ತರಕ್ಕೆ ಬೆಳೆಯಬಹುದೆಂಬ ಭಯಕ್ಕೆ ಹಾಗೆ ಮಾಡಿರಬಹುದು ಎಂದು ಹೇಳಿಕೊಂಡಿದ್ದಾರೆ.
