ಇತ್ತೀಚೆಗೆ ತಯಾರಾಗುತ್ತಿರುವ ಸಿನಿಮಾ ಟೈಟಲ್ಗಳು ಇದೊಂದು ಸಿನಿಮಾ ಹೆಸರಾ ಎಂದು ಯೋಚಿಸುವ ಪರಿಸ್ಥಿತಿ ಬಂದಿದೆ. ಪ್ರತಿನಿತ್ಯ ಮಾತನಾಡುವ ಪದಗಳೇ ಸಿನಿಮಾ ಟೈಟಲ್ ಆಗಿಹೋಗಿದೆ. ದಿನನಿತ್ಯದ ಬೈಗುಳಗಳೇ ಚಿತ್ರಗಳ ಶೀರ್ಷಿಕೆ ಆಗಿದೆ. ಅದರಲ್ಲೂ ಈಗಿನ ಸಿನಿಮಾ ನಿರ್ದೇಶಕ, ನಿರ್ಮಾಪಕರು ಟೈಟಲ್ನಿಂದಲೇ ಹೆಚ್ಚು ಪಬ್ಲಿಸಿಟಿ ಗಿಟ್ಟಿಸಿಕೊಳ್ಳುತ್ತಿದ್ದಾರೆ. ಡಿಚ್ಕಿ ಡಿಸೈನ್, ಫುಲ್ ಟೈಟ್ ಪ್ಯಾತೆ, ಎಂಆರ್ಪಿ ಜರ್ಕ್, ಹಫ್ತಾ, ಸೈನೆಡ್ ಮಲ್ಲಿಕಾ, ಟ್ರಂಕ್, ಸವರ್ಣದೀರ್ಘ ಸಂಧಿ, ದಯವಿಟ್ಟು ಗಮನಿಸಿ, ಕನ್ನಡಕ್ಕಾಗಿ ಒಂದನ್ನು ಒತ್ತಿ, ಬಿಎಂಡಬ್ಯ್ಲೂ, ನೀವು ಕರೆ ಮಾಡಿದ ಚಂದಾದಾರರು ಬ್ಯುಸಿಯಾಗಿದ್ದಾರೆ, ಒಂದು ಮೊಟ್ಟೆಯ ಕಥೆ, ನನ್ನ ಪ್ರಕಾರ, ಗುಬ್ಬಿ ಮೇಲೆ ಬ್ರಹ್ಮಾಸ್ತ್ರ ಹೀಗೆ ನೂರಾರು ಚಿತ್ರಗಳ ಟೈಟಲ್ಗಳು ವಿಭಿನ್ನವಾಗಿವೆ.
ಸ್ಯಾಂಡಲ್ವುಡ್ನಲ್ಲಿ ವಿಚಿತ್ರ ಹೆಸರಿನ ಸಿನಿಮಾಗಳ ದರ್ಬಾರ್...ಈ ಬಗ್ಗೆ ಏನು ಹೇಳುತ್ತೆ ಫಿಲ್ಮ್ ಚೇಂಬರ್...? - Sose tanda sowbhagya
ಅದೊಂದು ಕಾಲವಿತ್ತು. ಸಿನಿಮಾ ಟೈಟಲ್ ಅಂದ್ರೆ ಅಣ್ಣಾವ್ರ ಬಂಗಾರದ ಮನುಷ್ಯ, ತಂದೆಗೆ ತಕ್ಕ ಮಗ, ದೇವತಾ ಮನುಷ್ಯ, ವಿಷ್ಣುವರ್ಧನ್ ಅವರ ಸೊಸೆ ತಂದ ಸೌಭಾಗ್ಯ, ಗಲಾಟೆ ಸಂಸಾರ, ಸೂರ್ಯವಂಶ ಹೀಗೆ ಹೇಳ್ತಾ ಹೋದ್ರೆ ನೂರಾರು ಟೈಟಲ್ಗಳು ನೆನಪಿಗೆ ಬರುತ್ತದೆ.
ವಿಚಿತ್ರ ಹೆಸರಿನ ಸಿನಿಮಾಗಳ ದರ್ಬಾರ್
ಸಿನಿಮಾ ಟೈಟಲ್ಗಳ ಹೆಸರನ್ನು ಆಯ್ಕೆ ಮಾಡುವುದು ನಿರ್ಮಾಪಕ ಹಾಗೂ ನಿರ್ದೇಶಕರ ಸ್ವತಃ ನಿರ್ಧಾರ. ಆದರೆ ಸಿನಿಮಾಗಳ ಟೈಟಲ್ಗಳು ಫಿಲ್ಮ್ ಚೇಂಬರ್ನಲ್ಲಿ ಯಾವ ಆಧಾರದ ಮೇಲೆ ರಿಜಿಸ್ಟರ್ ಆಗಲಿದೆ ಎಂಬುದರ ಬಗ್ಗೆ ಫಿಲ್ಮ್ ಚೇಂಬರ್ ಅಧ್ಯಕ್ಷ ಗುಬ್ಬಿ ಜೈರಾಜ್ ಕಾರಣ ನೀಡುತ್ತಾರೆ. ಹೊಸ ಟೈಟಲ್ ನೋಂದಣಿಗೆ ಮೊದಲು 2000 ಸಾವಿರ ರೂಪಾಯಿ ನೀಡಬೇಕು. ಒಂದು ವರ್ಷದ ಬಳಿಕ ಆ ಟೈಟಲ್ಗೆ 200 ರೂಪಾಯಿ ಕೊಟ್ಟು ರಿನಿವಲ್ ಮಾಡಬೇಕು. ನಂತರ ಈ ಟೈಟಲನ್ನು ಚಿತ್ರತಂಡಕ್ಕೆ ಕೋಡಬೇಕಾ, ಬೇಡವಾ ಎಂಬುದರ ಬಗ್ಗೆ ಫಿಲ್ಮ್ ಚೇಂಬರ್, ಟೈಟಲ್ ಕಮಿಟಿಯಲ್ಲಿ ಹಿರಿಯ ನಿರ್ಮಾಪಕರು, ನಿರ್ದೇಶಕರು, ಅಧ್ಯಕ್ಷರು, ಉಪಾಧ್ಯಕ್ಷರು, ಗೌರವ ಕಾರ್ಯದರ್ಶಿ ಸೇರಿದಂತೆ ಎಲ್ಲರ ಸಮ್ಮುಖದಲ್ಲಿ ಚರ್ಚೆ ಮಾಡಲಾಗುವುದು. ಒಳ್ಳೆ ಕಥೆ, ಆಡುಭಾಷೆಯ ಟೈಟಲ್ಗಳನ್ನು ಇಟ್ಟುಕೊಂಡು ಬಂದ ಸಿನಿಮಾಗಳ ಪೈಕಿ ಕೆಲವು ಚಿತ್ರಗಳು ಸೂಪರ್ ಹಿಟ್ ಆಗಿವೆ. ಅದರಲ್ಲಿ ಬೆಲ್ ಬಾಟಂ, ಗೋಧಿ ಬಣ್ಣ ಸಾಧಾರಣ ಮೈಕಟ್ಟು, ಯೂ ಟರ್ನ್ ಅಂತಹ ಸಿನಿಮಾಗಳು ಯಶಸ್ಸು ಕಂಡಿವೆ. ಈ ಸಿನಿಮಾಗಳಲ್ಲಿ ಟೈಟಲ್ ಮುಖ್ಯ ಆಗುವುದಿಲ್ಲ. ಕಥೆ ಮುಖ್ಯವಾಗುತ್ತದೆ ಎಂದು ಜೈರಾಜ್ ಹೇಳುತ್ತಾರೆ.
ಇದು ಒಂದು ವರ್ಗದ ಸಿನಿಮಾ ಟೈಟಲ್ಗಳಾದ್ರೆ ಸಮಾಜಕ್ಕೆ ಹಾಗೂ ಒಬ್ಬ ವ್ಯಕ್ತಿಯ ಹೆಸರಿನ ಮೇಲೆ ಸಿನಿಮಾ ಟೈಟಲ್ಗಳು ಬಂದಿವೆ. ದಂಡುಪಾಳ್ಯ, ವೀರಪ್ಪನ್ ಅಟ್ಟಹಾಸ, ಸೈನೆಡ್ ಮಲ್ಲಿಕಾ , ಇಂತಹ ರಿಯಲ್ ಸ್ಟೋರಿಗಳು ಸಿನಿಮಾ ಆದಾಗ ಆ ವ್ಯಕ್ತಿ ಹೆಸರು ಅಥವಾ ಘಟನೆಯ ಟೈಟಲ್ ಇಡಬೇಕಾಗುತ್ತದೆ ಎನ್ನುತ್ತಾರೆ ನಿರ್ಮಾಪಕ ಉಮೇಶ್ ಬಣಕಾರ್. ಒಟ್ಟಾರೆ ಕನ್ನಡ ಚಿತ್ರರಂಗದಲ್ಲಿ ಭಿನ್ನ, ವಿಭಿನ್ನವಾಗಿ ಟೈಟಲ್ ಇಡೋದು ಆ ನಿರ್ದೇಶಕರು ಹಾಗೂ ನಿರ್ಮಾಪಕರಿಗೆ ಬಿಟ್ಟ ವಿಚಾರ. ಫಿಲ್ಮ್ ಚೇಂಬರ್ ಆಗಲೀ ಟೈಟಲ್ ಕಮಿಟಿ ಆಗಲಿ, ನಾವು ಅಂತಹ ಟೈಟಲ್ ಇಡಬೇಡಿ ಎಂದು ಹೇಳಲು ಯಾವುದೇ ಕಾರಣಕ್ಕೂ ನಮಗೆ ರೈಟ್ಸ್ ಇಲ್ಲ ಅನ್ನೋದು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಮಾತು.