ಅಂಬಿ ಸ್ಮಾರಕ ವಿಚಾರವಾಗಿ ಹೆಚ್​ಡಿಕೆ ಕೋಪ: ಹಿರಿಯ ನಟ ಶಿವರಾಮ್ ಹೇಳಿದ್ದೇನು?

ಹಿರಿಯ ನಟ ಶಿವರಾಮ್ ದಿ.ಅಂಬರೀಶ್​ ಅವರ ಸ್ಮಾರಕದ ಬಗ್ಗೆ ಕುಮಾರಸ್ವಾಮಿ ಕೋಪಿಸಿಕೊಂಡಿದ್ದ ವಿಚಾರವಾಗಿ ದೊಡ್ಡಣ್ಣ ಮಾಡಿದ್ದ ಆರೋಪದ ವಿಚಾರವಾಗಿ ಪ್ರತಿಕ್ರಿಯಿಸಿದ್ದಾರೆ.

ಬೆಂಗಳೂರು: ನಾನು ಮತ್ತು ದೊಡ್ಡಣ್ಣ ಒಟ್ಟಿಗೆ ಅಂದಿನ ಸಿಎಂ ಕುಮಾರಸ್ವಾಮಿ ಭೇಟಿ ಮಾಡಿದ್ದೆವು. ಆದರೆ ಅವರು ಮತ್ತು ನಾನು ಇಬ್ಬರೂ ಬೇರೆ ಬೇರೆ ವಿಚಾರಕ್ಕೆ ಭೇಟಿ ಮಾಡಿದ್ದೆವು. ದೊಡ್ಡಣ್ಣ ಯಾವ ವಿಚಾರಕ್ಕೆ ಬಂದಿದ್ದರು‌ ಗೊತ್ತಿಲ್ಲ. ಆದರೆ ಸಿಎಂ ಆಗಿದ್ದ ಕುಮಾರಸ್ವಾಮಿಗೆ ದೊಡ್ಡಣ್ಣ ಯಾವುದೋ ಮನವಿ ನೀಡಿದ್ದರು ಎಂದು ಹಿರಿಯ ನಟ ಶಿವರಾಮ್ ಹೇಳಿದರು.

ಅದು ಅಂಬರೀಶ್ ಸ್ಮಾರಕದ ವಿಷಯ ಅನ್ನೋದು ಗೊತ್ತಿಲ್ಲ. ದೊಡ್ಡಣ್ಣ ಮನವಿಯನ್ನು ಹೆಚ್​ಡಿಕೆ ಪಕ್ಕದಲ್ಲಿ ಇಟ್ಟಿದ್ದರು. ಆದರೆ ಅಂಬರೀಶ್ ಸ್ಮಾರಕ‌ ಕುರಿತ ರಾಜಕೀಯ ಒಳ್ಳೆಯದಲ್ಲ. ಅಂಬರೀಶ್ ನಮ್ಮ ಹುಡುಗ. ನಾಗರಹಾವು ಸಿನಿಮಾದಲ್ಲಿ ನಾವೇ ಪಾತ್ರ ಕೊಟ್ಟಿದ್ದೆವು. ‌ಅಂಬರೀಶ್ ಸ್ಮಾರಕದಲ್ಲಿ ರಾಜಕೀಯ ಮಾಡಬಾರದು ಎಂದು ಅಂದಿನ ಸಿಎಂ ಕುಮಾರಸ್ವಾಮಿ ಕೋಪ ಮಾಡಿಕೊಂಡಿದ್ದು ನಿಜ ಎಂದು ಹಿರಿಯ ನಟ ಶಿವರಾಮ್ ಸ್ಪಷ್ಟಪಡಿಸಿದ್ದಾರೆ.

ಇದನ್ನೂಓದಿ: ಅಂಬರೀಶ್ ಸ್ಮಾರಕ ಮಾಡಿದ್ದು ಯಡಿಯೂರಪ್ಪ ಅಂತ ಎದೆತಟ್ಟಿ ಹೇಳಬಲ್ಲೆ: ಹಿರಿಯ ನಟ ದೊಡ್ಡಣ್ಣ

ಸುಮಲತಾ ಅಂಬರೀಶ್ ಹಾಗು ಮಾಜಿ ಸಿ‌‌ಎಂ‌ ಎಚ್.ಡಿ.ಕುಮಾರಸ್ವಾಮಿ ನಡುವಿನ ಮಾತಿನ ಜಟಾಪಟಿ ವಿಚಾರವಾಗಿ ಇಂದು ಮಾತನಾಡಿದ್ದ ಹಿರಿಯ ನಟ ದೊಡ್ಡಣ್ಣ, ಅಂಬರೀಶ್ ಸ್ಮಾರಕ‌ ಮಾಡಿದ್ದು ಕುಮಾರಸ್ವಾಮಿ ಅಲ್ಲ. ಈಗೀನ ಮುಖ್ಯಮಂತ್ರಿ ಯಡಿಯೂರಪ್ಪ ಅಂತ ಎದೆ ತಟ್ಟಿ ಹೇಳ್ತೀನಿ. ಸಿನಿಮಾದವರ ಬಗ್ಗೆ ತುಂಬಾ ಕೀಳಾಗಿ ಮಾತನಾಡಬೇಡಿ. ಸ್ಮಾರಕ ವಿಚಾರಕ್ಕೆ ಮನವಿ ಪತ್ರ ಕೋಡೋಕೆ ಹೋಗಿದ್ದು ನಿಜ. ಆಗ ಅದನ್ನು ನಮ್ಮ ಮುಖಕ್ಕೆ ಎಸೆದುಬಿಟ್ರು. ಈ ಸಮಯದಲ್ಲಿ ಹಿರಿಯ ನಟ ಶಿವರಾಮ್ ಕೂಡ ಇದ್ದರು ಎಂದು ಹೇಳಿದ್ದರು.