ಕನ್ನಡ ಚಿತ್ರರಂಗದ ಜನಪ್ರಿಯ ಜೋಡಿಗಳ ಪೈಕಿ ದಿಗಂತ್ ಮತ್ತು ಐಂದ್ರಿತಾ ರೇ ಜೋಡಿ ಕೂಡಾ ಒಂದು. ಈ ಜೋಡಿ 'ಮನಸಾರೆ', 'ಪಾರಿಜಾತ' ಚಿತ್ರಗಳಲ್ಲಿ ಜೊತೆಯಾಗಿ ನಟಿಸಿದ್ದರು. ಆಗಲೇ ಅವರಿಬ್ಬರ ನಡುವೆ ಪ್ರೀತಿ ಚಿಗುರಿದ ವಿಚಾರ ಎಲ್ಲರಿಗೂ ಗೊತ್ತೇ ಇದೆ. ನಂತರ ಇಬ್ಬರೂ ಯಾವ ಸಿನಿಮಾಗಳಲ್ಲಿಕೂಡಾ ಜೊತೆಯಾಗಿ ನಟಿಸಲು ಸಾಧ್ಯವಾಗಿರಲಿಲ್ಲ. ಆದರೆ 7 ವರ್ಷಗಳ ನಂತರ ಅದಕ್ಕೆ ಕಾಲ ಕೂಡಿ ಬಂದಿದೆ.
'ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ' ಚಿತ್ರದ ಮೂಲಕ ಈ ಜೋಡಿ ಮತ್ತೆ ಜೊತೆಯಾಗುತ್ತಿದ್ದಾರೆ. ಈ ಕುರಿತು ಮಾತನಾಡಿರುವ ದಿಗಂತ್, "ನಾನು ಮತ್ತು ಐಂದ್ರಿತಾ ಜೊತೆಯಾಗಿ ನಟಿಸದೆ ಸಾಕಷ್ಟು ಸಮವಾಗಿತ್ತು. ನೀವಿಬ್ಬರೂ ಜೊತೆಯಾಗಿ ನಟಿಸಬೇಕು ಅಂತ ಎಲ್ಲರೂ ಹೇಳುತ್ತಲೇ ಇದ್ದರು. ನಾವು ಕೂಡಾ ಹಲವು ಕಥೆಗಳನ್ನು ಕೇಳಿದ್ದೆವು. ಆದರೆ, ಯಾಕೋ ಸೆಟ್ ಆಗಿರಲಿಲ್ಲ. ಈ ಚಿತ್ರದ ಕಥೆ ಕೇಳಿದಾಗ, ಅದರಲ್ಲಿನ ಒಂದು ಪಾತ್ರ ಆಕೆಗೆ ಪಕ್ಕಾ ಸೂಟ್ ಆಗುತ್ತದೆ ಎಂದೆನಿಸಿತು. ಹಾಗೆಯೇ ನಾವಿಬ್ಬರೂ ಜೊತೆಯಾಗಿ ನಟಿಸಿದರೆ ಇನ್ನೂ ಚೆನ್ನಾಗಿರುತ್ತದೆ ಎಂದು ಐಂದ್ರಿತಾಗೆ ಹೇಳಿದೆ. ಅವಳೂ ಒಪ್ಪಿಕೊಂಡು ಈ ಚಿತ್ರದಲ್ಲಿ ನಟಿಸಿದಳು. ಈ ಚಿತ್ರದಲ್ಲಿ ನಾನು ಮಲೆನಾಡಿನ ಹವ್ಯಕ ಮಾಣಿಯಾಗಿ ನಟಿಸಿದರೆ, ಅವಳು ಲಾಯರ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾಳೆ" ಎಂದು ವಿವರಿಸುತ್ತಾರೆ ದಿಗಂತ್.