ಹಿಂದೂ ನಟಿಯರೂ 'ಜೈರಾ'ಳನ್ನು ಅನುಸರಿಸಲಿ: ಸ್ವಾಮಿ ಚಕ್ರಪಾಣಿ

ದಂಗಲ್ ಚಿತ್ರದ ನಟಿ ಜೈರಾ ವಾಸಿಂ ಚಿತ್ರರಂಗದಿಂದ ನಿವೃತ್ತಿಗೊಂಡಿದ್ದಾರೆ. ಕೇವಲ 5 ವರ್ಷಗಳ ಕಾಲ ಚಿತ್ರರಂಗದಲ್ಲಿ ಕೆಲಸ ಮಾಡಿ ಹೊರನಡೆದಿದ್ದಾರೆ. ಅವರ ಈ ನಿರ್ಧಾರಕ್ಕೆ ಸಾಕಷ್ಟು ಜನರು ಬೆಂಬಲ ಸೂಚಿಸಿದ್ದಾರೆ.

ಮುಂಬೈ: ಎಲ್ಲ ಹಿಂದೂ ನಟಿಯರು ಜೈರಾ ವಾಸಿಂ ಅವರಿಂದ ಸ್ಫೂರ್ತಿಗೊಳ್ಳಲೇಬೇಕೆಂದು ಅಖಿಲ ಭಾರತೀಯ ಹಿಂದು ಮಹಾಸಭಾ ಅಧ್ಯಕ್ಷ ಸ್ವಾಮಿ ಚಕ್ರಪಾಣಿ ಹೇಳಿದ್ದಾರೆ.

ಧರ್ಮದ ಕಾರಣ ನೀಡಿ ಚಿತ್ರರಂಗಕ್ಕೆ ವಿದಾಯ ಹೇಳಿರುವ ಜೈರಾ ವಾಸಿಂ ಅವರಿಗೆ ಬೆಂಬಲಿಸಿರುವ ಸ್ವಾಮಿ, ಹಿಂದೂ ನಟಿಯರು ಕೂಡ ಇವರನ್ನು ಅನುಸರಿಸಬೇಕು ಎಂದಿದ್ದಾರೆ. ಈ ಬಗ್ಗೆ ಇಂದು ಟ್ವೀಟ್ ಮಾಡಿರುವ ಅವರು, ಅಭಿನಯದಿಂದ ಹಿಂದಕ್ಕೆ ಸರಿಯುತ್ತಿರುವ ನಟಿ ಜೈರಾ ನಿರ್ಧಾರ ಪ್ರಶಂಸನೀಯ. ಇವರಿಂದ ಹಿಂದೂ ನಟಿಯರು ಕೂಡ ಸ್ಫೂರ್ತಿಗೊಳ್ಳಬೇಕು ಎಂದಿದ್ದಾರೆ.

ದಂಗಲ್ ಚಿತ್ರದ ಮೂಲಕ ಬಾಲಿವುಡ್​​ಗೆ ಪ್ರವೇಶಿಸಿದ ಈ ಚೆಲುವೆ, ಐದು ವರ್ಷಗಳ ನಂತರ ಸಿನಿರಂಗದಿಂದ ವಿಮುಖಗೊಂಡಿದ್ದಾರೆ. ಕೈತುಂಬಾ ಅವಕಾಶಗಳು ಇರುವಾಗಲೇ ಅಭಿನಯಕ್ಕೆ ಬೈ ಬೈ ಹೇಳಿ ಹೊರನಡೆದಿದ್ದಾರೆ. ತಮ್ಮ ಈ ದಿಢೀರ್ ತೀರ್ಮಾನಕ್ಕೆ ಧರ್ಮದ ಕಾರಣ ಹೇಳಿರುವ ಅವರು, ಇನ್ಮುಂದೆ ನಾನು ನಟನೆಯಲ್ಲಿ ಮುಂದುವರೆಯುವುದಿಲ್ಲ ಎಂದು ಇನ್​ಸ್ಟಾಗ್ರಾಂ, ಟ್ವಿಟರ್​ನಲ್ಲಿ ಹೇಳಿಕೊಂಡಿದ್ದಾರೆ.