ಇದೀಗ ಸ್ಯಾಂಡಲ್ವುಡ್ ಬದಲಾಗಿದೆ. ಇಡೀ ಭಾರತೀಯ ಚಿತ್ರರಂಗವೇ ತನ್ನತ್ತ ನೋಡುವಂತೆ ಮಾಡಿದೆ. ಬಾಕ್ಸ್ ಆಫೀಸ್ ಕೊಳ್ಳೆ ಹೊಡೆದ ಕೆಲವೊಂದು ಕನ್ನಡ ಸಿನಿಮಾಗಳನ್ನು ಪರಭಾಷೆ ನಿರ್ದೇಶಕ, ನಿರ್ಮಾಪಕರು ರೀಮೇಕ್ ಮಾಡುತ್ತಿರುವುದೇ ಇದಕ್ಕೆ ಸಾಕ್ಷಿ.
ಇನ್ನು ಇತ್ತೀಚೆಗೆ ಕನ್ನಡ ಸಿನಿಮಾಗಳಲ್ಲಿ ಸ್ಟಾರ್ ನಟರ ಹೆಸರು ಬ್ರ್ಯಾಂಡ್ ಆಗುತ್ತಿದೆ. ಅದಕ್ಕೆ ತಾಜಾ ಉದಾಹರಣೆ ಅಂದ್ರೆ ಈ ಸ್ಟಾರ್ ನಟರ ಸಿನಿಮಾಗಳಲ್ಲಿ, ಈಗ ಕೌಂಟ್ರು ಡೈಲಾಗ್ಗಳಿಗಿಂತ ಈ ನಟರ ನೇಮ್ ಬ್ರ್ಯಾಂಡ್ ಟ್ರೆಂಡ್ ಹೆಚ್ಚಾಗುತ್ತಿದೆ.
ನ್ಯಾಷನಲ್ ಲೆವೆಲ್ನಲ್ಲಿ ಸೌಂಡ್ ಮಾಡಿದ 'ರಾಕಿ ಬಾಯ್'
ಈ ಸಾಲಿನಲ್ಲಿ ಕೆಜಿಎಫ್ ಸಿನಿಮಾ ಮೂಲಕ ರಾಕಿಂಗ್ ಸ್ಟಾರ್ ಯಶ್ ಮುಂಚೂಣಿಯಲ್ಲಿದ್ದಾರೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಕೆಜಿಎಫ್ ಸಿನಿಮಾದಲ್ಲಿ, ಬೈಕ್ ಮೇಲೆ ಯಶ್ ನೇಮ್ ಬ್ರ್ಯಾಂಡ್ ಬಳಸಲಾಗಿತ್ತು. ಕೆಜಿಎಫ್ ಸಿನಿಮಾದಲ್ಲಿ ಯಶ್ , ಸೂಪರ್ ಹೀರೋ ತರ, ಓಡಿಸುವ ಆ ಬೈಕ್ ಪೆಟ್ರೋಲ್ ಟ್ಯಾಂಕ್ ಮೇಲೆ 'ರಾಕಿ' ಎಂದು ಬರೆಸಲಾಗಿತ್ತು.ಈ ಹೆಸ್ರು ಯಶ್ ಅವ್ರ ರಾಕಿಂಗ್ ಸ್ಟಾರ್ ನೇಮ್ ಬ್ರ್ಯಾಂಡ್ ಆಗಿತ್ತು ಅನ್ನೋದು ಅಚ್ಚರಿ ವಿಷಯ.
'ಪೈಲ್ವಾನ್'ಚಿತ್ರದಲ್ಲಿದೆ 'K' ಎಂಬ ಕಿಚ್ಚ ನೇಮ್ ಬ್ರ್ಯಾಂಡ್
ಸ್ಯಾಂಡಲ್ವುಡ್ ಮಾತ್ರವಲ್ಲದೆ ದಕ್ಷಿಣ ಸಿನಿಮಾ ಇಂಡಸ್ಟ್ರಿಯಲ್ಲೇ ತನ್ನ ಟ್ಯಾಲೆಂಟ್ ತೋರಿಸಿರುವ , ಕಿಚ್ಚ ಸುದೀಪ್ ಮೊದಲ ಬಾರಿಗೆ ಪೈಲ್ವಾನ್ ಚಿತ್ರದಲ್ಲಿ ತಮ್ಮ ನೇಮ್ ಬ್ರ್ಯಾಂಡ್ ಬಳಸಿದ್ದಾರೆ. ಇತ್ತೀಚೆಗೆ ಬಿಡುಗಡೆಯಾದ 'ಪೈಲ್ವಾನ್' ಚಿತ್ರದ ಹೊಸ ಪೋಸ್ಟರ್ನಲ್ಲಿ ಬಾಕ್ಸಿಂಗ್ ಬೆಲ್ಟ್ ಮೇಲೆ ಕಿಚ್ಚ ಸುದೀಪ್ ಹೆಸರಿನ 'K' ಎಂಬ ಹೆಸರು ಬಳಸಲಾಗಿದೆ. ಇದು ನಿರ್ದೇಶಕ ಕೃಷ್ಣ ಅವರ ಕಲ್ಪನೆಯೋ ಏನೋ ಗೊತ್ತಿಲ್ಲ. ಆದರೆ ಈ 'K' ಹೆಸರು ಕಿಚ್ಚ ಸುದೀಪ್ ನೇಮ್ ಬ್ರ್ಯಾಂಡ್ ಅಂತ ಇಡೀ ಭಾರತೀಯ ಚಿತ್ರರಂಗಕ್ಕೆ ಸಾರಿ ಹೇಳುತ್ತಿದೆ.