ಪೆಟ್ರೋಮ್ಯಾಕ್ಸ್ ಇದು ಸ್ಯಾಂಡಲ್ವುಡ್ನಲ್ಲಿ ಟೈಟಲ್ನಿಂದಲೇ ಸದ್ದು ಮಾಡುತ್ತಿರುವ ಸಿನಿಮಾ. ಪರಿಮಳ ಲಾಡ್ಜ್ ಸಿನಿಮಾ ರಿಲೀಸ್ ಮುನ್ನವೇ, ನೀನಾಸಂ ಸತೀಶ್ ಹಾಗೂ ನಿರ್ದೇಶಕ ವಿಜಯ್ ಪ್ರಸಾದ್ ಜೊತೆ ಪೆಟ್ರೋಮ್ಯಾಕ್ಸ್ ಚಿತ್ರವನ್ನು ಅನೌನ್ಸ್ ಮಾಡಿರೋದು ಗೊತ್ತಿರುವ ವಿಚಾರ.
ಈಗಾಗಲೇ ವಿಜಯ್ ಪ್ರಸಾದ್ ನಿರ್ದೇಶನದ ಪರಿಮಳ ಲಾಡ್ಜ್ ಚಿತ್ರದಲ್ಲಿ, ನೀನಾಸಂ ಸತೀಶ್ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆ ಚಿತ್ರ ಬಿಡುಗಡೆ ಮುನ್ನವೇ ವಿಜಯ್ ಪ್ರಸಾದ್ ಮತ್ತು ಸತೀಶ್ ನೀನಾಸಂ ಕಾಂಬಿನೇಷನ್ ಈ ಚಿತ್ರದ ಬಗ್ಗೆ ಸಾಕಷ್ಟು ಸಿದ್ಧತೆಗಳನ್ನು ಮಾಡುತ್ತಾ ಇದ್ದಾರೆ. ಈಗ ನಿರ್ದೇಶಕ ವಿಜಯ ಪ್ರಸಾದ್ ಹಾಗೂ ನೀನಾಸಂ ಸತೀಶ್ ಜೊತೆಗೂಡಿ, ಇಡೀ ಪೆಟ್ರೋಮ್ಯಾಕ್ಸ್ ಟೀಮ್ನೊಂದಿಗೆ ಸ್ಕ್ರಿಪ್ಟ್ ರೀಡಿಂಗ್ ಚರ್ಚೆ ಮಾಡಿದ್ದಾರೆ.
ಸತೀಶ್ ನೀನಾಸಂ ಪೆಟ್ರೋಮ್ಯಾಕ್ಸ್ ಚಿತ್ರದ ಸ್ಕ್ರಿಪ್ಟ್ ರೀಡಿಂಗ್ ಚರ್ಚೆ. ವಿಜಯ್ ಪ್ರಸಾದ್ ಚಿತ್ರದ ಡೈಲಾಗ್ ಸನ್ನಿವೇಶದ ಜೊತೆಗೆ ಹೇಳುವ ಶೈಲಿ ಸಖತ್ ತಮಾಷೆಯಾಗಿದೆ. ವಿಜಯ್ ಪ್ರಸಾದ್ ಒಂದೊಂದು ಸೀನ್ಗಳನ್ನು ಸ್ವಾರಸ್ಯಕರವಾಗಿ ಹೇಳುವುದನ್ನು ಸತೀಶ್ ನೀನಾಸಂ ಸಖತ್ ಎಂಜಾಯ್ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ನಿರ್ದೇಶಕ ವಿಜಯ್ ಪ್ರಸಾದ್, ನಿರ್ದೇಶನದ ತಂಡ, ಕ್ಯಾಮೆರಾಮ್ಯಾನ್, ಕಲಾವಿದ ನಾಗಭೂಷಣ್, ಸಂಗೀತ ನಿರ್ದೇಶಕ ಅನೂಪ್ ಸೀಳಿನ್ ಸೇರಿದಂತೆ ಪೆಟ್ರೋಮ್ಯಾಕ್ಸ್ ಚಿತ್ರತಂಡ ಈ ಸ್ಕ್ರಿಪ್ಟ್ ಚರ್ಚೆಯನ್ನು ಮಾಡಿದೆ.
ಸದ್ಯ ಎಲ್ಲಾ ಫೈನಲ್ ಆಗಿದ್ದು ಇದೇ ಅಕ್ಟೋಬರ್ 19ರಿಂದ ಮೈಸೂರಿನಲ್ಲಿ ಚಿತ್ರೀಕರಣ ಮಾಡಲು ಚಿತ್ರತಂಡ ಪ್ಲಾನ್ ಮಾಡಿದೆ. ನಿರ್ದೇಶಕ ವಿಜಯ್ ಪ್ರಸಾದ್ ಹಾಗೂ ಸತೀಶ್ ನೀನಾಸಂ ಆತ್ಮೀಯ ಗೆಳೆಯರಂತೆ. ಈ ಸ್ನೇಹಕ್ಕಾಗಿ ಈಗ ವಿಜಯ್ ಪ್ರಸಾದ್ ಸತೀಶ್ ಸಿನಿಮಾಗೆ ಆ್ಯಕ್ಷನ್ ಕಟ್ ಹೇಳಲು ರೆಡಿಯಾಗಿದ್ದಾರಂತೆ.
ಲಾಕ್ಡೌನ್ ಟೈಮಲ್ಲಿ ನೀನಾಸಂ ಸತೀಶ್, ನಿರ್ದೇಶಕ ವಿಜಯ್ ಪ್ರಸಾದ್ ಜೊತೆ ಸಾಕಷ್ಟು ಕಥೆಗಳನ್ನು ಚರ್ಚೆ ಮಾಡಿದ್ರಂತೆ. ಹತ್ತಾರು ಕಥೆಗಳಲ್ಲಿ ಒಂದು ಕಥೆಯನ್ನು ಫೈನಲ್ ಮಾಡಿ, ಈ ಚಿತ್ರಕ್ಕೆ ಪೆಟ್ರೋಮ್ಯಾಕ್ಸ್ ಅಂತಾ ಟೈಟಲ್ ಇಟ್ಟಿದ್ದಾರೆ. ಸದ್ಯ ಸತೀಶ್ ನೀನಾಸಂ ಮಾತ್ರ ಆಯ್ಕೆ ಆಗಿದ್ದು, ಹೀರೋಯಿನ್ ಯಾರು ಮತ್ತೆ ಯಾರೆಲ್ಲಾ ತಾರಾ ಬಳಗ ಇರುತ್ತೆ ಅನ್ನೋದು ಸದ್ಯದಲ್ಲೇ ಗೊತ್ತಾಗಲಿದೆ.
