ಪುರುಷರಿಗೆ ಯಾವುದಾದರೂ ಒಂದು ಕೆಲಸ ಇರಲೇಬೇಕು. ಆಗಲೇ ಆತನ ಜೀವನಕ್ಕೊಂದು ಬೆಲೆ ಬರುತ್ತದೆ. ಈ ಕಾರಣದಿಂದಲೇ 'ಉದ್ಯೋಗಂ ಪುರುಷ ಲಕ್ಷಣಂ' ಎಂಬ ಮಾತನ್ನು ಹೇಳುವುದು. ಈಗ ಈ ನಾಣ್ಣುಡಿಯನ್ನೇ ಹೊಸಬರ ತಂಡವೊಂದು ಸಿನಿಮಾವಾಗಿ ಮಾಡಲು ಹೊರಟಿದೆ. ಈ ಚಿತ್ರಕ್ಕೆ ಸುಜಿತ್‍ಕುಮಾರ್ ಕೆ.ಎಂ. ಕುಡ್ಲೂರು ಕಥೆ, ಚಿತ್ರಕಥೆ ಹಾಗೂ ಸಂಭಾಷಣೆ ಬರೆದು ನಿರ್ದೇಶನ ಮಾಡಿದ್ದಾರೆ. ಈಗಾಗಲೇ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳನ್ನು ಮುಗಿಸಿಕೊಂಡು ಸಿನಿಮಾ ರಿಲೀಸ್‍ಗೆ ರೆಡಿಯಾಗಿದೆ.
ರಾಕೇಶ್ ಚೆಲುವರಾಜು ನಿರ್ಮಿಸಿರುವ ಈ ಚಿತ್ರದಲ್ಲಿ ರತ್ನಮಂಜರಿ ಖ್ಯಾತಿಯ ರಾಜ್‍ಚರಣ್, ರಿಧಿರಾವ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಚಿತ್ರದಲ್ಲಿ ಕೆಲಸ ಮಾಡುವವರೆಲ್ಲಾ ನಾಗತಿಹಳ್ಳಿ ಚಂದ್ರಶೇಖರ್ ಅವರ ಟೆಂಟ್ ಸಿನಿಮಾ ಶಾಲೆಯಲ್ಲಿ ಕಲಿತವರು ಎನ್ನುವುದು ವಿಶೇಷ. ಯಾವುದೇ ಕೆಲಸವಿದಲ್ಲದ ನಾಲ್ವರು ಯವಕರ ಕಥೆಯನ್ನು ಈ ಚಿತ್ರದಲ್ಲಿ ಹೇಳುವ ಪ್ರಯತ್ನ ಮಾಡಲಾಗಿದೆ. ಕಾಮಿಡಿ, ಸಸ್ಪೆನ್ಸ್ ಜೊತೆಗೆ ತ್ರಿಕೋನ ಪ್ರೇಮಕಥೆಯೂ ಈ ಚಿತ್ರದಲ್ಲಿದೆ. ಇತ್ತೀಚೆಗೆ ನಡೆದ ಪತ್ರಿಕಾಗೋಷ್ಟಿಯಲ್ಲಿ ಹಾಜರಿದ್ದ ಚಿತ್ರತಂಡ ಸಿನಿಮಾ ವಿಶೇಷತೆಗಳ ಕುರಿತಂತೆ ಮಾಹಿತಿ ಹಂಚಿಕೊಂಡಿತು. ನಟ ರಾಜ್‍ಚರಣ್ ಮಾತನಾಡಿ ಕಲಾವಿದನಾಗುವ ಕನಸಿಟ್ಟುಕೊಂಡು ಟೆಂಟ್ ಶಾಲೆಗೆ ಸೇರಿದ್ದೆ. ಕಿರುಚಿತ್ರವೊಂದರಲ್ಲಿ ನಟಿಸುವಾಗಲೇ ಸುಜಿತ್ ಈ ಚಿತ್ರದ ಬಗ್ಗೆ ಹೇಳಿದರು. ಇದೇ ಸಮಯದಲ್ಲಿ ರತ್ನಮಂಜರಿಯಲ್ಲೂ ಅವಕಾಶ ಸಿಕ್ಕಿತು. ಒಬ್ಬ ಲವರ್ ಬಾಯ್, ಫ್ಲರ್ಟಿ ಹುಡುಗನಾಗಿ ನಾನು ಈ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ. ಪ್ರೀತಿ ಎನ್ನುವುದು ಎಲ್ಲರಿಗೂ ಒಂದೇ ಎನ್ನುವುದನ್ನು ಚಿತ್ರದಲ್ಲಿ ಹೇಳಿದ್ದೇವೆ. ಇದೊಂದು ಕಾಮಿಡಿ ಲವ್‍ಸ್ಟೋರಿ ಎಂದು ಹೇಳಿದರು. ನಾಯಕಿ ರಿಧಿರಾವ್ ಮಾತನಾಡಿ, ಚಿತ್ರದಲ್ಲಿ ನನ್ನದು ಪೃಥ್ವಿ ಎನ್ನುವ ಪಾತ್ರ. ಈ ಭೂಮಿಯ ಹಾಗೆ ನಾನು ಇಬ್ಬರೂ ನಾಯಕರ ಭಾರವನ್ನು ಹೊತ್ತುಕೊಂಡಿರುತ್ತೇನೆ. ಒಬ್ಬ ಹುಡುಗನ ಮೇಲೆ ಲವ್ ಆಗುತ್ತದೆ. ಕೊನೆಗೆ ನಾನು ಯಾರಿಗೆ ಸಿಗುತ್ತೇನೆ ಎನ್ನುವುದೇ ಸಸ್ಪೆನ್ಸ್ ಎಂದು ಹೇಳಿಕೊಂಡರು.ಚಿತ್ರದಲ್ಲಿ ಸಾವನ್ ಸಿಂಗ್ ಎಂಬ ಮತ್ತೊಬ್ಬ ಪ್ರತಿಭೆ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.