ಬೇರೆಯಾಗುವುದಾಗಿ ಘೋಷಿಸಿದ ಸಮಂತಾ-ನಾಗ ಚೈತನ್ಯ.. ದಾಂಪತ್ಯ ಮುರಿದುಬಿದ್ದಿರುವುದು ಅಧಿಕೃತ..

ಸಮಂತಾ ಹಾಗೂ ನಾಗ ಚೈತನ್ಯ ತಮ್ಮ ದಾಂಪತ್ಯ ಜೀವನಕ್ಕೆ ಫುಲ್​ ಸ್ಟಾಪ್​ ಇಟ್ಟಿದ್ದಾರೆ. ಈ ವಿಚಾರವನ್ನ ಇಬ್ಬರೂ ಸಾಮಾಜಿಕ ಜಾಲತಾಣಗಳಲ್ಲಿ ಸ್ಪಷ್ಟಪಡಿಸಿದ್ದಾರೆ..

ಹೈದರಾಬಾದ್​: ತೆಲುಗು ಮತ್ತು ತಮಿಳು ಸಿನಿಮಾಗಳಲ್ಲಿ ತನ್ನದೇ ಛಾಪು ಮೂಡಿಸಿರುವ ನಟಿ ಸಮಂತಾ ಹಾಗೂ ನಟ ನಾಗ ಚೈತನ್ಯ ಡಿವೋರ್ಸ್​ ನೀಡಲಿದ್ದಾರೆ ಎಂಬ ಊಹಾಪೋಹಾಗಳಿಗೆ ತೆರೆಬಿದ್ದಿದೆ. ಇದು ಕೇವಲ ವದಂತಿ ಅಲ್ಲ, ಸತ್ಯ ಎಂಬುದನ್ನು ದಂಪತಿ ತಿಳಿಸಿದ್ದಾರೆ. ನಾವಿಬ್ಬರೂ ಪತಿ -ಪತ್ನಿಯಾಗಿ ಬೇರೆಯಾಗುತ್ತಿದ್ದು, ನಮ್ಮ ಸ್ನೇಹ ಹಾಗೇ ಇರಲಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಈ ಬಗ್ಗೆ ಟ್ವೀಟ್​ ಮಾಡಿರುವ ನಾಗ ಚೈತನ್ಯ, "ಬಹಳ ಆಲೋಚನೆ ಮಾಡಿದ ಬಳಿಕ ನಾನು ಮತ್ತು ಸ್ಯಾಮ್ (ಸಮಂತಾ) ಗಂಡ ಮತ್ತು ಹೆಂಡತಿಯಾಗಿ ಬೇರೆಯಾಗಲು ನಿರ್ಧರಿಸಿದ್ದೇವೆ. ಒಂದು ದಶಕದ ಕಾಲ ಸ್ನೇಹಿತರಾಗಿರಲು ನಾವು ಅದೃಷ್ಟಶಾಲಿಯಾಗಿದ್ದೇವೆ. ಈ ಸ್ನೇಹ ನಮ್ಮ ನಡುವೆ ವಿಶೇಷ ಬಾಂಧವ್ಯವಾಗಿ ಎಂದಿಗೂ ಇರಲಿದೆ ಎಂದು ನಾವು ಭಾವಿಸುತ್ತೇವೆ. ಈ ಕಷ್ಟದ ಸಮಯದಲ್ಲಿ ನಮ್ಮ ಅಭಿಮಾನಿಗಳು, ಹಿತೈಷಿಗಳು ಮತ್ತು ಮಾಧ್ಯಮಗಳು ನಮ್ಮನ್ನು ಬೆಂಬಲಿಸಬೇಕು ಮತ್ತು ನಮಗೆ ಬೇಕಾದ ಖಾಸಗಿತನವನ್ನ ನಮಗೆ ನೀಡಬೇಕೆಂದು ನಾವು ವಿನಂತಿಸುತ್ತೇವೆ. ನಿಮ್ಮ ಬೆಂಬಲಕ್ಕೆ ಧನ್ಯವಾದಗಳು" ಎಂದು ಹೇಳಿದ್ದಾರೆ.

ಸಮಂತಾ-ನಾಗ ಚೈತನ್ಯ

ಇದನ್ನೂ ಓದಿ: Watch- 'ಬುದ್ಧಿ ಇದೆಯಾ?' ಪತಿಯಿಂದ ದೂರಾಗುವ ಬಗ್ಗೆ ವರದಿಗಾರನ ಪ್ರಶ್ನೆಗೆ ಸಮಂತಾ ಕೆಂಡಾಮಂಡಲ

2017 ರಲ್ಲಿ ಟಾಲಿವುಡ್ ನಟ ಅಕ್ಕಿನೇನಿ ನಾಗಾರ್ಜುನ ಪುತ್ರ ನಾಗ ಚೈತನ್ಯ ಜೊತೆ ಸಮಂತಾ ಸಪ್ತಪದಿ ತುಳಿದಿದ್ದರು. ಬಳಿಕ ತಮ್ಮ ಹೆಸರನ್ನು ಸಮಂತಾ ಅಕ್ಕಿನೇನಿ ಎಂದು ಬದಲಿಸಿಕೊಂಡಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿಯೂ ಸಮಂತಾ ಅಕ್ಕಿನೇನಿ ಎಂದೇ ತಮ್ಮ ಹೆಸರನ್ನು ಬದಲಾವಣೆ ಮಾಡಿಕೊಂಡಿದ್ದರು.

ಕೆಲ ದಿನಗಳ ಹಿಂದೆ ಇದ್ದಕ್ಕಿದ್ದಂತೆ ತಮ್ಮ ಟ್ವಿಟರ್‌ ಮತ್ತು ಇನ್​​ಸ್ಟಾಗ್ರಾಂ ಖಾತೆಯಿಂದ 'ಸಮಂತಾ' ಹಾಗೂ 'ಅಕ್ಕಿನೇನಿ' ಎರಡೂ ಹೆಸರುಗಳನ್ನು ತೆಗೆದು ಹಾಕಿ ಕೇವಲ 'S' ಎಂಬುದನ್ನು ಮಾತ್ರ ಅವರು ಉಳಿಸಿಕೊಂಡಿದ್ದರು. ಈ ಬಳಿಕ ಸಮಂತಾ ಹಾಗೂ ಚೈತನ್ಯ ನಡುವೆ ಬಿರುಕು ಬಿಟ್ಟಿದೆ ಎಂಬ ಸುದ್ದಿ ಹರಿದಾಡತೊಡಗಿತ್ತು.

ಸಮಂತಾ - ನಾಗ ಚೈತನ್ಯ

ಇದನ್ನೂ ಓದಿ: 'S' ಎಂದು ಹೆಸರು ಬದಲಿಸಿಕೊಂಡ ನಟಿ ಸಮಂತಾ; ಹೀಗಂದ್ರೆ ಏನ್​ ಗೊತ್ತಾ?

2009ರಲ್ಲಿ ತೆರೆಕಂಡ ತೆಲುಗಿನ 'ಏಮ್​ ಮಾಯಾ ಚೇಸಾವೆ' ಚಿತ್ರದಲ್ಲಿ ಮೊದಲ ಬಾರಿ ತೆರೆಹಂಚಿಕೊಂಡಿದ್ದ ಈ ಜೋಡಿ ಮಜಿಲಿ, ಆಟೋ ನಗರ್​ ಸೂರ್ಯ, ಮನಂ ಸಿನಿಮಾಗಳಲ್ಲಿಯೂ ಒಟ್ಟಾಗಿ ನಟಿಸಿದ್ದರು. ಇವರಿಬ್ಬರ ಕೆಮಿಸ್ಟ್ರಿಗೆ ಅಭಿಮಾನಿಗಳು ಫಿದಾ ಆಗಿದ್ದರು.

ಸಮಂತಾ-ನಾಗ ಚೈತನ್ಯ