ಪತ್ನಿ ಬಗ್ಗೆ ಸುಳ್ಳುಸುದ್ದಿ ಹಬ್ಬಿಸಿದ ವೆಬ್​ಸೈಟ್ ವಿರುದ್ಧ ಆರ್​ಜೆ ಪ್ರದೀಪ ದೂರು

ರಾಧಾರಮಣ ಧಾರಾವಾಹಿ ಖ್ಯಾತಿಯ ಶ್ವೇತಾ ಪ್ರಸಾದ್ ಬಗ್ಗೆ ವೆಬ್​​​ಸೈಟೊಂದು ಸುಳ್ಳುಸುದ್ದಿ ಪ್ರಕಟಿಸಿದ್ದು ಶ್ವೇತಾ ಪತಿ ಆರ್​ಜೆ ಪ್ರದೀಪ ಈ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸುಳ್ಳುಸುದ್ದಿ ಪ್ರಕಟಿಸಿದ ವೆಬ್​ಸೈಟ್ ಮೇಲೆ ದೂರು ನೀಡಿದ್ದಾರೆ.

ಆರ್​ಜೆ ಪ್ರದೀಪ ರಾಜ್ಯದ ಜನತೆಗೆ, ಅದರಲ್ಲೂ ಬೆಂಗಳೂರು ಜನರಿಗೆ ಸಾಕಷ್ಟು ಚಿರಪರಿಚಿತ. ಇನ್ನು ಅವರ ಪತ್ನಿ ಶ್ವೇತಾ ಪ್ರಸಾದ್ 'ರಾಧಾ ರಮಣ' ಧಾರಾವಾಹಿ ಮೂಲಕ ಮನೆ ಮಾತಾದ ನಟಿ.

ಶ್ವೇತಾ ಪ್ರಸಾದ್​

ಇತ್ತೀಚೆಗೆ ಶ್ವೇತಾ ಪ್ರಸಾದ್ ತಾನು 'ರಾಧಾ ರಮಣ' ಧಾರಾವಾಹಿಯಿಂದ ಹೊರಬಂದಿರುವುದಾಗಿ ಹೇಳಿದ್ದರು. ಇದರಿಂದ ಶ್ವೇತಾ ಅಭಿಮಾನಿಗಳಿಗೆ ಬೇಸರ ಉಂಟಾಗಿದ್ದಂತೂ ನಿಜ. ಈ ಬೇಸರದ ನಡುವೆ ಅಭಿಮಾನಿಗಳಿಗೆ ವೆಬ್​ಸೈಟ್​​ವೊಂದು ಶ್ವೇತಾ ಬಗ್ಗೆ ಸುಳ್ಳುಸುದ್ದಿ ಪ್ರಕಟಿಸಿ ಶಾಕ್ ನೀಡಿತ್ತು. ಶ್ವೇತಾ ಕಾರು ಅಪಘಾತದಲ್ಲಿ ಮೃತಪಟ್ಟಿದ್ದಾರೆ ಎಂಬ ಸುದ್ದಿಯನ್ನು ಈ ವೆಬ್​ಸೈಟ್ ಪ್ರಕಟಿಸಿದ್ದು ಇದನ್ನು ನೋಡಿದ ಶ್ವೇತಾ, ಪ್ರದೀಪ್ ಕುಟುಂಬದವರು ಹಾಗೂ ಅಭಿಮಾನಿಗಳು ಶಾಕ್ ಆಗಿದ್ದಾರೆ.

ಶ್ವೇತಾ ಪ್ರಸಾದ್​, ಪ್ರದೀಪ

ಈ ಸಂಬಂಧ ಪ್ರದೀಪ್ ಸೈಬರ್ ಕ್ರೈಂ ಪೊಲೀಸರಿಗೆ ದೂರು ನೀಡಿದ್ದಾರೆ. ಕೇವಲ ಲೈಕ್, ಕಮೆಂಟ್ ಗಿಟ್ಟಿಸಿಕೊಳ್ಳುವ ಉದ್ದೇಶದಿಂದ ಇಂತ ಕೆಟ್ಟ ಸುದ್ದಿಗಳನ್ನು ಪ್ರಕಟಿಸುತ್ತಿದ್ದಾರೆ. ಇಂತಹ ವೈಬ್​ಸೈಟ್​​​ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕಿದೆ. ಸುದ್ದಿ ಪ್ರಕಟವಾದಾಗಿನಿಂದ ನಮಗೆ ಎಲ್ಲರೂ ಕಾಲ್ ಮಾಡಿ ವಿಚಾರಿಸುತ್ತಿದ್ದಾರೆ. ಶ್ವೇತಾ ಚೆನ್ನಾಗಿದ್ದಾರೆ, ನಾವು ಸಂತೋಷವಾಗಿದ್ದೇವೆ. ದಯವಿಟ್ಟು ಈ ರೀತಿಯ ಸುಳ್ಳುಸುದ್ದಿಗಳನ್ನು ಪ್ರಕಟಿಸಿ ತೊಂದರೆ ಕೊಡಬೇಡಿ ಎಂದು ಪ್ರದೀಪ ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.

ರಾಧಾರಮಣ ಖ್ಯಾತಿಯ ಶ್ವೇತಾ ಪ್ರಸಾದ್