ಕನ್ನಡ ಚಿತ್ರರಂಗದ ವರನಟ, ನಟಸಾರ್ವಭೌಮ ಡಾ. ರಾಜ್ಕುಮಾರ್ ಎಂದರೆ ನೆನಪಾಗುವುದು ಅವರ ಸರಳ ವ್ಯಕ್ತಿತ್ವ, ಸಾಮಾಜಿಕ ಕಳಕಳಿಯ ಸಿನಿಮಾಗಳು. ಅಣ್ಣಾವ್ರಿಗೆ ಸಂದ ಗೌರವ ಒಂದಲ್ಲಾ ಎರಡಲ್ಲ. ಇದೀಗ ಅವರಿಗೆ ಕಲೆಕ್ಟಿಬಲ್ ಮಿಂಟ್ ಎಂಬ ಸಂಸ್ಥೆಯೊಂದು ವಿಭಿನ್ನವಾಗಿ ಗೌರವ ಸೂಚಿಸಿದೆ.
ಕೋಟ್ಯಂತರ ಅಭಿಮಾನಿಗಳು ಆರಾಧಿಸುವ ನಟ ಡಾ. ರಾಜ್ಕುಮಾರ್ ಚಿತ್ರವಿರುವ ಚಿನ್ನದ ನಾಣ್ಯಗಳನ್ನು ಕಲೆಕ್ಟಿಬಲ್ ಮಿಂಟ್ ಹೊರತಂದಿದೆ. ಈ ಮೂಲಕ ಬಂಗಾರದ ಮನುಷ್ಯನಿಗೆ ಬಂಗಾರದ ನಾಣ್ಯಗಳ ಮೂಲಕ ಗೌರವ ನೀಡಲಾಗುತ್ತಿದೆ. ಡಾ. ರಾಜ್ಕುಮಾರ್ ಕುಟುಂಬದ ಅನುಮತಿ ಪಡೆದು ಅಣ್ಣಾವ್ರ ಚಿತ್ರ ಇರುವ 22 ಕ್ಯಾರೆಟ್ ಚಿನ್ನದ ನಾಣ್ಯಗಳು ಹಾಗೂ ಬೆಳ್ಳಿಯ ನಾಣ್ಯವನ್ನು ಹೊರತಂದಿದೆ. ಈ ನಾಣ್ಯಗಳ ಮೇಲೆ ಕನ್ನಡ ಹಾಗೂ ಇಂಗ್ಲಿಷ್ ಭಾಷೆಗಳ ಅಕ್ಷರಗಳಿವೆ.
ಈ ನಾಣ್ಯಗಳ ತೂಕ 10-25 ಗ್ರಾಂನಷ್ಟಿದೆ. ಈ ನಾಣ್ಯಗಳ ಫೋಟೋ ಹಾಗೂ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಡಾ. ರಾಜ್ಕುಮಾರ್ ಅವರ ಈ ಚಿನ್ನದ ಹಾಗೂ ಬೆಳ್ಳಿ ನಾಣ್ಯಗಳನ್ನು ನೋಡಿದ ಅಭಿಮಾನಿಗಳು ಬಹಳ ಖುಷಿಯಲ್ಲಿದ್ದಾರೆ. ಈ ಚಿನ್ನದ ನಾಣ್ಯಗಳನ್ನು ಸ್ವತ: ಕಂಪನಿಯೇ ಮಾರಾಟ ಮಾಡುವುದಾ ಅಥವಾ ರಾಜ್ಯದ ಎಲ್ಲಾ ಚಿನ್ನದ ಅಂಗಡಿಗಳಲ್ಲಿ ದೊರೆಯುವಂತೆ ವ್ಯವಸ್ಥೆ ಮಾಡುವುದಾ ಕಾದು ನೋಡಬೇಕು.
