ರೆಬೆಲ್ ಸ್ಟಾರ್ ಅಭಿನಯದ ‘ಅಂತ‘ ಸಿನಿಮಾ ಯಾರಿಗೆ ನೆನಪಿಲ್ಲ..? ಆ ಸಿನಿಮಾದ ‘ಕುತ್ತೇ ಕನ್ವರ್ ನಹಿ... ಕನ್ವರ್ ಲಾಲ್ ಬೋಲೋ‘ ಡೈಲಾಗ್ ಇಂದಿಗೂ ಫೇಮಸ್. ಇದೀಗ ಅಂತ ಸಿನಿಮಾ ಹೊಸ ತಂತ್ರಜ್ಞಾನದೊಂದಿಗೆ ಮತ್ತೆ ಬಿಡುಗಡೆಯಾಗಲಿದೆ.
ಡಾ. ರಾಜ್ ಅಭಿನಯದ ಸತ್ಯ ಹರಿಶ್ಚಂದ್ರ, ಕಸ್ತೂರಿ ನಿವಾಸ, ಡಾ. ವಿಷ್ಣುವರ್ಧನ್ ಅಭಿನಯದ ನಾಗರಹಾವು ಸಿನಿಮಾಗಳನ್ನು ಹೊಸ ತಂತ್ರಜ್ಞಾನದೊಂದಿಗೆ ಮತ್ತೆ ರಿಲೀಸ್ ಮಾಡಲಾಗಿತ್ತು. ಈಗ ‘ಅಂತ‘ ಸರದಿ. ರೆಬೆಲ್ ಸ್ಟಾರ್ಗೆ ಗೌರವ ಸಲ್ಲಿಸುವ ಸಲುವಾಗಿ ‘ಅಂತ‘ ಸಿನಿಮಾವನ್ನು ಮತ್ತೆ ಬಿಡುಗಡೆ ಮಾಡಲಾಗುತ್ತಿದೆ. ಈ ಸಿನಿಮಾ ಎಸ್.ವಿ. ರಾಜೇಂದ್ರಸಿಂಗ್ ಬಾಬು ನಿರ್ದೇಶನದಲ್ಲಿ 1980ರಲ್ಲಿ ಬಿಡುಗಡೆಯಾಗಿತ್ತು. ನಟಿ ಲಕ್ಷ್ಮಿ, ಅಂಬರೀಶ್ಗೆ ನಾಯಕಿಯಾಗಿ ಹಾಗೂ ಹಿರಿಯ ನಟಿ ಪಂಡರೀಬಾಯಿ ತಾಯಿಯಾಗಿ ಅಭಿನಯಿಸಿದ್ದರು. ಸಿನಿಮಾದ ‘ಪ್ರೇಮವಿದೆ ಮನದೆ‘ ಹಾಡು ಕೂಡಾ ಇಂದಿಗೂ ಎಲ್ಲರ ಮೋಸ್ಟ್ ಫೇವರೆಟ್. ಸಿನಿಮಾದಲ್ಲಿ ಅಂಬರೀಶ್ ಕೈದಿ ಕನ್ವರ್ ಲಾಲ್ ಹಾಗೂ ಇನ್ಸ್ಪೆಕ್ಟರ್ ಸುಶೀಲ್ ಕುಮಾರ್ ಎಂಬ ದ್ವಿಪಾತ್ರದಲ್ಲಿ ಅಭಿನಯಿಸಿದ್ದರು.