'ರಣಂ' ಆಡಿಯೋ ರಿಲೀಸ್​: ಅಡೆತಡೆಗಳ ನಡುವೆ ಶೂಟಿಂಗ್ ಪೂರ್ಣ

ಸಾಕಷ್ಟು ಅಡೆತಡೆಗಳ ನಡುವೆಯೂ ಶೂಟಿಂಗ್ ಮುಗಿಸಿರುವ 'ರಣಂ' ಸಿನಿಮಾದ ಆಡಿಯೋ ನಿನ್ನೆ ಬಿಡುಗಡೆಯಾಗಿದೆ. ಚಿತ್ರದಲ್ಲಿ ಚೇತನ್​​ ರೈತಪರ ಯುವ ಹೋರಾಟಗಾರನಾಗಿ, ಚಿರಂಜೀವಿ ಸರ್ಜಾ ಪೊಲೀಸ್ ಅಧಿಕಾರಿ ಆಗಿ ನಟಿಸಿದ್ದಾರೆ.

ವಿ. ಸಮುದ್ರಂ ನಿರ್ದೇಶನದಲ್ಲಿ ಆ‌ ದಿನಗಳು ಖ್ಯಾತಿಯ ಚೇತನ್ ಹಾಗೂ ಯುವ ಸಾಮ್ರಾಟ್ ಚಿರಂಜೀವಿ‌ ಸರ್ಜಾ ಅಭಿನಯದ 'ರಣಂ' ಚಿತ್ರದ ಆಡಿಯೋವನ್ನು ಚಿತ್ರತಂಡ ನಿನ್ನೆ ಬಿಡುಗಡೆ ಮಾಡಿದೆ.

ಆಡಿಯೋ ಬಿಡುಗಡೆಗೂ ಮುನ್ನ ಚಿತ್ರದ ಆ್ಯಕ್ಷನ್ ಸನ್ನಿವೇಶದ ಶೂಟಿಂಗ್ ವೇಳೆ ಸಿಲಿಂಡರ್ ಸ್ಫೋಟಗೊಂಡು ಸಾವನ್ನಪ್ಪಿದವರಿಗೆ ಇಡೀ ಚಿತ್ರತಂಡ ಒಂದು ನಿಮಿಷ ಮೌನಾಚರಣೆ ಮಾಡುವ ಮೂಲಕ ಘಟನೆಯಲ್ಲಿ ಮಡಿದವರ ಆತ್ಮಕ್ಕೆ ಶಾಂತಿ ಕೋರಿದರು. ಟಾಲಿವುಡ್​​​​​ ಹಿಟ್ ಸಿನಿಮಾ 'ಮಹಾನಂದಿ' ನಿರ್ದೇಶಿಸಿದ್ದ ವಿ. ಸಮುದ್ರಂ ಈ ಸಿನಿಮಾವನ್ನು ನಿರ್ದೇಶಿಸಿದ್ದಾರೆ. ಇದು ಸಮುದ್ರಂ ನಿರ್ದೇಶನದ ಮೊದಲ ಕನ್ನಡ ಸಿನಿಮಾವಾಗಿದೆ.

ಚಿತ್ರದಲ್ಲಿ ಚೇತನ್ ವಿಭಿನ್ನ ಪಾತ್ರದಲ್ಲಿ ಕಾಣಿಸಿದ್ದು ರೈತ ಪರ ಯುವ ಹೋರಾಟಗಾರನಾಗಿ ಮಿಂಚಿದ್ದಾರೆ. ಇನ್ನು ಚಿರಂಜೀವಿ ಸರ್ಜಾ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿ ಮಿಂಚಿದ್ದಾರೆ. ಮಾಣಿಕ್ಯ ಚಿತ್ರದಲ್ಲಿ‌ ಕಿಚ್ಚನ ಜೊತೆ ಸ್ಕ್ರೀನ್ ಶೇರ್ ಮಾಡಿದ್ದ ವರಲಕ್ಷಿ ಶರತ್ ಕುಮಾರ್ ಈ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರದಲ್ಲಿ ನಾಲ್ಕು ಹಾಡುಗಳಿದ್ದು ತೆಲುಗಿನ‌ ರವಿಶಂಕರ್ ಸಂಗೀತ ನೀಡಿದ್ದಾರೆ. ಕನಕಪುರ ಶ್ರೀನಿವಾಸ್ ಚಿತ್ರದ ಚಿತ್ರಕ್ಕೆ ಬಂಡವಾಳ ಹೂಡಿದ್ದು ಅನೇಕ ಅಡೆತಡೆಗಳ ನಡುವೆಯೂ ಶೂಟಿಂಗ್​ ಮುಗಿಸಿರುವ ಸಿನಿಮಾ ಜೂನ್​​​​ನಲ್ಲಿ ಬಿಡುಗಡೆಯಾಗಲಿದೆ.