ಆ್ಯಸಿಡ್​ ದಾಳಿಯಿಂದ ನರಳುತ್ತಿದ್ದಾಗ ಕಂಗನಾ ಮಾಡಿದ ಸಹಾಯ ನೆನೆದ ರಂಗೋಲಿ

ತನ್ನ ಮೇಲಾದ ಆ್ಯಸಿಡ್​​ ದಾಳಿ ವೇಳೆ ತನ್ನ ತಂಗಿಯ ಸಹಾಯ ನೆನೆದಿರುವ ಕಂಗನಾ ರಣಾವತ್​ ಸಹೋದರಿ ರಂಗೋಲಿ ಭಾವುಕ ಟ್ವೀಟ್​ವೊಂದನ್ನು​ ಮಾಡಿದ್ದಾರೆ.

ಕಂಗನಾ ರಣಾವತ್​ ಸಹೋದರಿ ರಂಗೋಲಿ ಚಂಡೆಲ್​​​ ತನ್ನ ಮೇಲಾಗಿದ್ದ ಆ್ಯಸಿಡ್​ ದಾಳಿಯ ವೇಳೆ ಕಂಗನಾ ಮಾಡಿದ್ದ ಸಹಾಯವನ್ನು ನೆನೆದು ಭಾವುಕರಾಗಿ ಟ್ವೀಟ್​ ಮಾಡಿದ್ದಾರೆ.

ಈ ಬಗ್ಗೆ ಟ್ವೀಟ್​ ಮಾಡಿರುವ ರಂಗೋಲಿ, ಅಂದು ನನ್ನ ಮೇಲೆ ಆ್ಯಸಿಡ್​ ದಾಳಿಯಾದಾಗ ನಿನಗೆ ಕೇವಲ 19 ವರ್ಷ. ನನ್ನ ಅಪ್ಪ-ಅಮ್ಮ ಕೂಡ ನನ್ನ ಮುಖದ ಮೇಲಾದ ಗಾಯವನ್ನು ನೋಡಿ ನೋವಿನಲ್ಲಿ ಸುಮ್ಮನಾಗುತ್ತಿದ್ದರು. ಆದ್ರೆ ನೀನು ನನಗೆ ಸರಿಯಾಗಿ ಚಿಕಿತ್ಸೆ ನೀಡಿದ್ದೆ. ರಾತ್ರಿ-ಹಗಲೆನ್ನದೆ ನನಗಾಗಿ ಶ್ರಮಿಸಿದ್ದೆ. ಈ ನಿನ್ನ ಸಹಾಯದ ಋಣವನ್ನು ನಾನೆಂದೂ ತೀರಿಸಲು ಸಾಧ್ಯವಿಲ್ಲ ಚೋಟು ಎಂದು ಟ್ವಿಟ್ಟರ್​​ನಲ್ಲಿ ಬರೆದುಕೊಂಡಿದ್ದಾರೆ ರಂಗೋಲಿ.

ಇದೇ ತಿಂಗಳಲ್ಲಿ ತಮ್ಮ ಮೇಲಾಗಿದ್ದ ಆ್ಯಸಿಡ್​ ದಾಳಿ ಬಗ್ಗೆ ನೆನೆದು ಟ್ವೀಟ್​ ಮಾಡಿದ್ದ ರಂಗೋಲಿ, ನನ್ನ ಮೇಲೆ ಆ್ಯಸಿಡ್​ ದಾಳಿ ಮಾಡಿದವನ ಹೆಸರು ಅವಿನಾಶ್​​ ಶರ್ಮಾ. ನನ್ನನ್ನು ಪ್ರೀತಿಸು ಎಂದು ಪೀಡಿಸುತ್ತಿದ್ದ ಅವಿನಾಶ್​, ನನ್ನಿಂದ ನಕಾರಾತ್ಮಕ ಉತ್ತರ ದೊರೆತಾಗ ನನ್ನ ಮೇಲೆ ಆ್ಯಸಿಡ್​ ಎರಚಿದ್ದ ಎಂದು ರಂಗೋಲಿ ಹೇಳಿಕೊಂಡಿದ್ದರು.