ತಾಯ್ತನವನ್ನು ನಾನು ತ್ಯಾಗ ಮಾಡುತ್ತೇನೆ...ಪಾರೂಲ್ ಯಾದವ್ ಹೀಗೆ ಹೇಳಿದ್ದೇಕೆ..?

ಹಥ್ರಾಸ್ ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ನೋವು ಹೊರಹಾಕಿರುವ 'ಗೋವಿಂದಾಯ ನಮ:' ಖ್ಯಾತಿಯ ನಟಿ ಪಾರೂಲ್ ಯಾದವ್, ನಾನು ತಾಯ್ತನವನ್ನು ತ್ಯಾಗ ಮಾಡುತ್ತೇನೆ. ನನಗೆ ಜನಿಸುವ ಮಗು ಹೆಣ್ಣೇ ಆದರೆ ಕಷ್ಟ. ಈ ಸಮಾಜದಲ್ಲಿ ಹೆಣ್ಣನ್ನು ಕೆಟ್ಟ ದೃಷ್ಟಿಯಿಂದ ನೋಡಲಾಗುತ್ತದೆ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.

ಉತ್ತರ ಪ್ರದೇಶದ ಹಥ್ರಾಸ್​​​ ಸಾಮೂಹಿಕ ಅತ್ಯಾಚಾರ ಪ್ರಕರಣ ದೇಶವನ್ನೇ ಬೆಚ್ಚಿ ಬೀಳಿಸಿದೆ. ಆರೋಪಿಗಳಿಗೆ ಕಠಿಣ ಶಿಕ್ಷೆ ನೀಡುವಂತೆ ಪ್ರತಿಭಟನೆ ನಡೆಸಲಾಗುತ್ತಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ನಟಿ ಪಾರೂಲ್ ಯಾದವ್ ತಮ್ಮ ನೋವನ್ನು ಹೊರ ಹಾಕಿದ್ದಾರೆ.

'ಬಟರ್​ ಫ್ಲೈ' ಚಿತ್ರದ ಬಿಡುಗಡೆಯ ತವಕದಲ್ಲಿರುವ ನಟಿ ಪಾರೂಲ್ ಯಾದವ್​​ಗೆ ಹಥ್ರಾಸ್ ಪ್ರಕರಣ ನೋವು ತಂದಿದೆಯಂತೆ. 'ಈ ದೌರ್ಜನ್ಯ ನನ್ನ ಮನಸ್ಸಿಗೆ ಘಾಸಿಯುಂಟು ಮಾಡಿದೆ. ಪ್ರತಿ ಹೆಣ್ಣು ಕೂಡಾ ತಾಯಿ ಆಗಲು ಬಯಸುತ್ತಾಳೆ. ಆದರೆ ಇಂತಹ ಕ್ರೂರ ಘಟನೆಯನ್ನು ನೋಡಿದ ನಂತರ ನಾನಂತೂ ತಾಯಿ ಆಗುವುದಿಲ್ಲ ಎಂದು ದು:ಖ ಹೊರ ಹಾಕಿದ್ದಾರೆ ಪಾರೂಲ್ ಯಾದವ್. ಯಾವುದೇ ಹೆಣ್ಣು ನಾನು ಅಮ್ಮನಾಗಲಾರೆ ಎಂದು ಹೇಳುವುದು ಕಷ್ಟದ ವಿಚಾರ. ಆದರೆ ಈ ಜನ್ಮದಲ್ಲಿ ನಾನು ತಾಯಿ ಆಗುವುದನ್ನು ತ್ಯಾಗ ಮಾಡುತ್ತಿದ್ದೇನೆ. ನನ್ನ ಮಗು ಹೆಣ್ಣಾದರೆ ಬಹಳ ಕಷ್ಟ. ಹೆಣ್ಣನ್ನು ಎಷ್ಟು ಕೆಟ್ಟ ದೃಷ್ಟಿಯಿಂದ ನೋಡಲಾಗುತ್ತದೆ. ಈ ಕಷ್ಟ ಹೆಣ್ಣಿಗೆ ಏಕೆ ಬರುತ್ತದೆ...? ಇಂತ ಕಷ್ಟಗಳಿಂದ ಆಕೆ ತಪ್ಪಿಸಿಕೊಳ್ಳಲು ಸಾಧ್ಯ ಇಲ್ಲವೇ..?' ಎಂದು ಪಾರೂಲ್ ಯಾದವ್ ನೋವನ್ನು ಹಂಚಿಕೊಂಡಿದ್ದಾರೆ.