ಕೊರೊನಾ ಲಾಕ್ಡೌನ್ ಮುಗಿದಾಗ ಪ್ರೇಕ್ಷಕರು ಸಿನಿಮಾ ನೋಡಲು ಥಿಯೇಟರ್ಗೆ ಬರುತ್ತಾರೋ ಇಲ್ಲವೋ ಎಂದು ಚಿಂತಿಸುವಾಗ ಈ ಸಮಯವನ್ನು ಉಪಯೋಗ ಮಾಡಿಕೊಳ್ಳುತ್ತಿರುವುದು ಓಟಿಟಿ ಪ್ಲಾಟ್ಫಾರ್ಮ್ಗಳು.
ಪಿಆರ್ಕೆ ಪ್ರೊಡಕ್ಷನ್ ಸಿನಿಮಾಗಳಾದ ‘ಲಾ’ ಹಾಗೂ ‘ಫ್ರೆಂಚ್ ಬಿರ್ಯಾನಿ’ಚಿತ್ರಗಳನ್ನು ಅಮೆಜಾನ್ ಪ್ರೈಮ್ನವರು ಖರೀದಿಸಿ ಪ್ರಸಾರ ಮಾಡಲು ದಿನಾಂಕ ಕೂಡಾ ನಿಗದಿ ಮಾಡಿಕೊಂಡಿದೆ. ಈಗ ಅಮೆಜಾನ್ ಬಹುಕೋಟಿ ನಿರ್ಮಾಣದ 'ಕೆಜಿಎಫ್ 2' ಹಾಗೂ 'ರಾಬರ್ಟ್' ಚಿತ್ರಗಳಿಗೆ ಆಹ್ವಾನ ನೀಡಿದೆ. ಯಶ್ ಅಭಿನಯದ 'ಕೆಜಿಎಫ್ 2' ಚಿತ್ರಕ್ಕೆ 120 ಕೋಟಿ ರೂಪಾಯಿ ಹಾಗೂ ದರ್ಶನ್ ಅಭಿನಯದ 'ರಾಬರ್ಟ್' ಚಿತ್ರಕ್ಕೆ 70 ಕೋಟಿ ರೂಪಾಯಿ ಆಹ್ವಾನ ನೀಡಿದೆ.
ಆದರೆ 'ರಾಬರ್ಟ್' ಚಿತ್ರದ ನಿರ್ಮಾಪಕ ಉಮಾಪತಿ ಶ್ರೀನಿವಾಸ ಗೌಡ ಅವರು 70 ಕೋಟಿಗೆ ಚಿತ್ರವನ್ನು ಓಟಿಟಿಗೆ ನೀಡುವುದನ್ನು ತಿರಸ್ಕರಿಸಿದ್ದಾರೆ. ಈ ಹಿಂದೆ ಜೇಕಬ್ ವರ್ಗೀಸ್ ‘ಚಂಬಲ್’ ಸಿನಿಮಾ ಸಮಯದಲ್ಲಿ ಹೇಳಿದಂತೆ ನನ್ನ ಸಿನಿಮಾ ಮಾಡಿರುವುದು ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕ ನೋಡಲು ಎಂದು ಉಮಾಪತಿ ಹೇಳಿದ್ದಾರೆ. ಓಟಿಟಿ ಪ್ಲಾಟ್ಫಾರ್ಮ್ 'ರಾಬರ್ಟ್' ಚಿತ್ರಕ್ಕೆ ಹಾಕಿದ ಬಂಡವಾಳಕ್ಕಿಂತ ಎರಡರಷ್ಟು ಹಣ ನೀಡಲು ಮುಂದಾಗಿದೆ. ಆದರೆ ಉಮಾಪತಿ ಇದಕ್ಕೆ ಬಿಲ್ಕುಲ್ ಒಪ್ಪುತ್ತಿಲ್ಲ.
ಇನ್ನು 'ಕೆಜಿಎಫ್-2' ನಿರ್ಮಾಪಕ ಹೊಂಬಾಳೆ ಫಿಲ್ಮ್ಸ್ ಬ್ಯಾನರ್ನ ವಿಜಯ್ ಕಿರಂಗದೂರು ಕೂಡಾ 120 ಕೋಟಿ ಹಣವನ್ನು ನಿರಾಕರಿಸಿದ್ದಾರೆ. ಅದಕ್ಕೆ ಪ್ರಮುಖ ಕಾರಣವೆಂದರೆ ಕೆಜಿಎಫ್ ಮೊದಲ ಭಾಗ 400 ಕೋಟಿಗೂ ಹೆಚ್ಚು ಲಾಭ ಮಾಡಿತ್ತು. ಆದರೆ ಓಟಿಟಿ ಪ್ಲಾಟ್ಫಾರ್ಮ್ ಆ ಹಣದಲ್ಲಿ ಅರ್ಧ ಹಣವನ್ನೂ ಕೂಡಾ ಆಫರ್ ಮಾಡುತ್ತಿಲ್ಲ.
ಒಟ್ಟಿನಲ್ಲಿ ತಯಾರಾಗುವ ಸಿನಿಮಾಗಳನ್ನೆಲ್ಲಾ ಓಟಿಟಿ ಪ್ಲಾಟ್ಫಾರ್ಮ್ಗೆ ನೀಡಿದರೆ ಚಿತ್ರಮಂದಿರ ಮಾಲೀಕರ ಪರಿಸ್ಥಿತಿ ಏನಾಗಬೇಡ..? ಇದನ್ನು ನಿರ್ಮಾಪಕರು ಅರ್ಥ ಮಾಡಿಕೊಂಡರೆ ಒಳ್ಳೆಯದು.
