ರಾಷ್ಟ್ರಪ್ರಶಸ್ತಿ ವಿಜೇತ ಚಿತ್ರ 'ಒಂದಲ್ಲಾ ಎರಡಲ್ಲಾ' ಅಮೆಜಾನ್ ಪ್ರೈಮ್ ವೀಕ್ಷಣೆಗೆ ಲಭ್ಯ

ರಾಷ್ಟ್ರಪ್ರಶಸ್ತಿ, ರಾಜ್ಯ ಪ್ರಶಸ್ತಿ ಗಳಿಸಿರುವ 2018 ರಲ್ಲಿ ಬಿಡುಗಡೆಯಾದ ಡಿ. ಸತ್ಯಪ್ರಕಾಶ್ ನಿರ್ದೇಶನದ 'ಒಂದಲ್ಲಾ ಎರಡಲ್ಲಾ' ಸಿನಿಮಾ ಇದೀಗ ಅಮೆಜಾನ್ ಪ್ರೈಂನಲ್ಲಿ ವೀಕ್ಷಣೆಗೆ ಲಭ್ಯ ಇದೆ.

'ರಾಮ ರಾಮ ರೇ' ಖ್ಯಾತಿಯ ನಿರ್ದೇಶಕ ಸತ್ಯಪ್ರಕಾಶ್ ಅವರ ದ್ವಿತೀಯ ಚಿತ್ರ 'ಒಂದಲ್ಲಾ ಎರಡಲ್ಲಾ' ಕೂಡಾ ಅನೇಕ ಪ್ರಶಸ್ತಿಗಳನ್ನು ಬಾಚಿಕೊಂಡು ಕೆಲವೊಂದು ಸಿನಿಮಾ ಉತ್ಸವಗಳಿಗೂ ಎಂಟ್ರಿ ನೀಡಿತ್ತು.

'ಒಂದಲ್ಲಾ ಎರಡಲ್ಲಾ' ಬಾಲನಟ ರೋಹಿತ್ ಪಾಂಡವಪುರ

ಹೆಬ್ಬುಲಿ ಚಿತ್ರವನ್ನು ನಿರ್ಮಿಸಿದ್ದ ಉಮಾಪತಿ ಶ್ರೀನಿವಾಸ್​​ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಇದು ಉಮಾಪತಿ ನಿರ್ಮಾಣದ ಎರಡನೇ ಸಿನಿಮಾ. ದರ್ಶನ್ ಅಭಿನಯದಲ್ಲಿ ಉಮಾಪತಿ ರಾಬರ್ಟ್ ಸಿನಿಮಾ ನಿರ್ಮಿಸುತ್ತಿದ್ದಾರೆ. 'ಒಂದಲ್ಲಾ ಎರಡಲ್ಲಾ' ಸಿನಿಮಾ ಬಿಡುಗಡೆಯಾದಾಗ ಈ ಚಿತ್ರಕ್ಕೆ ದೊರೆಯಬೇಕಾದ ಮನ್ನಣೆ ದೊರೆಯಲಿಲ್ಲ ಎಂಬ ಆರೋಪ ಕೇಳಿಬಂದಿತ್ತು. ಈ ಸಿನಿಮಾ ಮಕ್ಕಳ ಸಿನಿಮಾವಾಗಿದ್ದು ಈ ಚಿತ್ರ ಬಿಡುಗಡೆಯಾಗುವ ಸಮಯದಲ್ಲಿ ಮತ್ತೊಂದು ಮಕ್ಕಳ ಸಿನಿಮಾ 'ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಸರಗೋಡು' ಸಿನಿಮಾ ಬಿಡುಗಡೆಯಾಗಿತ್ತು.

ಉಮಾಪತಿ, ಸತ್ಯಪ್ರಕಾಶ್

'ಒಂದಲ್ಲಾ ಎರಡಲ್ಲಾ' ಬಿಡುಗಡೆಯಾದ ನಂತರ ರಾಜ್ಯ ಪ್ರಶಸ್ತಿ ಪಡೆಯಿತು. ಬಿಡುಗಡೆಯಾದ ಎರಡು ವರ್ಷಗಳ ನಂತರ ಇದೀಗ ಈ ಚಿತ್ರ ಅಮೆಜಾನ್ ಪ್ರೈಂನಲ್ಲಿ ಲಭ್ಯವಿದೆ. ಇದೊಂದು ರಾಷ್ಟ್ರೀಯ ಐಕ್ಯತೆ ಸಾರುವ ಚಿತ್ರವಾಗಿದ್ದು ರೋಹಿತ್ ಪಾಂಡವಪುರ, ಮಠ ಕೊಪ್ಪಳ, ಸಾಯಿ ಕೃಷ್ಣ ಕುಡ್ಲ, ರಂಜಾನ್ ಸಾಬ್ ಉಲ್ಲಾಗಡ್ಡಿ ಹಾಗೂ ಇನ್ನಿತರರು ಅಭಿನಯಿಸಿದ್ದಾರೆ. ವಾಸುಕಿ ವೈಭವ್ ಹಾಗೂ ನೊಬಿನ್ ಪೌಲ್ ಈ ಚಿತ್ರಕ್ಕೆ ಸಂಗೀತ ಒದಗಿಸಿದ್ದಾರೆ.

ಅಮೆಜಾನ್ ಪ್ರೈಮ್​​​​ನಲ್ಲಿ 'ಒಂದಲ್ಲಾ ಎರಡಲ್ಲಾ'

ಸ್ವಾತಂತ್ರ್ಯ ದಿನಾಚರಣೆ ಅಂಗವಾಗಿ ಈ ಸಿನಿಮಾ ಆಗಸ್ಟ್ 14 ರಿಂದ ಅಮೆಜಾನ್ ಪ್ರೈಂನಲ್ಲಿ ಬಿಡುಗಡೆಗೆ ಲಭ್ಯವಿದೆ.