ಚಿತ್ರರಂಗ ಎನ್ನುವುದು ಒಂದು ಮಾಯಾ ಬಜಾರ್ ಇದ್ದಂತೆ. ಯಾರ ಅದೃಷ್ಟ ಚೆನ್ನಾಗಿ ಇರುವುದೋ ಅಂಥವರು ಈ ಸಿನಿಮಾ ರಂಗದಲ್ಲಿ ಸ್ಟಾರ್ಗಳಾಗುತ್ತಾರೆ. ಈಗ ಇಲ್ಲೊಂದು ಚಿತ್ರತಂಡ ಇಂತದ್ದೇ ಕನಸು ಹೊತ್ತು 'ನವರತ್ನ' ಎಂಬ ಟೈಟಲ್ನೊಂದಿಗೆ ಸ್ಯಾಂಡಲ್ವುಡ್ಗೆ ಕಾಲಿಟ್ಟಿದೆ.
ಯುವ ನಟ ಪ್ರತಾಪ್ ರಾಜ್ ಹಾಗೂ ಯುವನಟಿ ಮೋಕ್ಷ ಕುಶಾಲ್ ಜೊತೆಗೆ ಹಾಸ್ಯನಟ ಅಮಿತ್ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ಚಿತ್ರತಂಡ ಸದ್ಯಕ್ಕೆ ಟ್ರೇಲರ್ ಬಿಡುಗಡೆ ಮಾಡಿ ಹುಮ್ಮಸ್ಸಿನಿಂದ ಸಿನಿಮಾ ಬಿಡುಗಡೆಗೆ ಸಜ್ಜಾಗುತ್ತಿದೆ. ಪ್ರತಾಪ್ ರಾಜ್ ಈ ಚಿತ್ರದಲ್ಲಿ ಆ್ಯಕ್ಟಿಂಗ್ ಜೊತೆಗೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. 'ನವರತ್ನ' ಎಂಬ ಕ್ಯಾಚಿ ಟೈಟಲ್ ಹೊಂದಿರುವ ಈ ಚಿತ್ರ ಆ್ಯಕ್ಷನ್ ಸಸ್ಪೆನ್ಸ್ ಹಾಗೂ ಥ್ರಿಲ್ಲರ್ ಕಥೆಯನ್ನು ಆಧರಿಸಿದೆ. ಮೋಕ್ಷ ಕುಶಾಲ್ ಈ ಚಿತ್ರದಲ್ಲಿ ಫೋಟೋಗ್ರಾಫರ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಫಸ್ಟ್ ರ್‍ಯಾಂಕ್ ರಾಜು ಸಿನಿಮಾದಲ್ಲಿ ಹಾಸ್ಯದ ಕಚಗುಳಿ ಇಟ್ಟಿರುವ ಅಮಿತ್ ಈ ಚಿತ್ರದಲ್ಲಿ ಲಿಂಗ ಎಂಬ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಉಡುಪಿ,ಇಂಡೋನೇಷ್ಯಾ, ಲಡಾಕ್ಗಳಲ್ಲಿ ಸಿನಿಮಾವನ್ನು ಚಿತ್ರೀಕರಿಸಲಾಗಿದೆ. ಸಿನಿಮಾ ರಿಲೀಸ್ಗೂ ಮುಂಚೆ ತೆಲುಗು, ತಮಿಳು ಭಾಷೆಯಲ್ಲಿ ರೀಮೇಕ್ ಆಗಲು ಮಾತುಕತೆ ನಡೆಯುತ್ತಿದೆ ಎಂದು ನಿರ್ದೇಶಕ, ನಟ ಪ್ರತಾಪ್ ರಾಜ್ ಹೇಳಿದ್ದಾರೆ.
'ನವರತ್ನ' ಸಿನಿಮಾಗೆ ರೀಜೋ ಪಿ ಜಾನ್ ಹಾಗೂ ಲಕ್ಷ್ಮಿರಾಜ್ ಛಾಯಾಗ್ರಾಹಕರಾಗಿ ಕೆಲಸ ಮಾಡಿದ್ದಾರೆ. ಉಡುಪಿಯ ಕಾಡಿನಲ್ಲಿ ಶೂಟಿಂಗ್ ಮಾಡುವುದು ಚಿತ್ರತಂಡಕ್ಕೆ ಚಾಲೆಂಜಿಂಗ್ ಆಗಿತ್ತಂತೆ. 'ಇಸ್ಮಾರ್ಟ್ ಶಂಕರ್' 'ಗೀತಗೋವಿಂದಂ' ಸಿನಿಮಾಗಳಿಗೆ ಸಾಹಸ ಸಂಯೋಜನೆ ಮಾಡಿರುವ ರಿಯಲ್ ಸತೀಶ್ ಈ ಚಿತ್ರಕ್ಕೆ ಫೈಟ್ ಕಂಪೋಸ್ ಮಾಡಿದ್ದಾರೆ. ಪಿಆರ್ ಸ್ಟುಡಿಯೋ ಬ್ಯಾನರ್ ಅಡಿ ಈ ಚಿತ್ರ ನಿರ್ಮಾಣ ಆಗಿದ್ದು, ಸೆನ್ಸಾರ್ ಮಂಡಳಿಯಿಂದ ಯು/ಎ ಸರ್ಟಿಫಿಕೇಟ್ ಸಿಕ್ಕಿದೆ. ಒಟ್ಟಾರೆ 'ನವರತ್ನ' ಸಿನಿಮಾ ರಿಲೀಸ್ಗೂ ಮುಂಚೆ ತೆಲುಗು ಹಾಗೂ ತಮಿಳು ಭಾಷೆಯಲ್ಲಿ ರೀಮೇಕ್ ಆಗುತ್ತಿರುವುದು ಚಿತ್ರತಂಡಕ್ಕೆ ಖುಷಿ ನೀಡಿದೆ.
