ಕಲರ್ಸ್ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ 'ನನ್ನರಸಿ ರಾಧೆ' ಧಾರಾವಾಹಿಯು ಯಶಸ್ವಿಯಾಗಿ 150 ಸಂಚಿಕೆಗಳನ್ನು ಪೂರೈಸಿದೆ. ಅಗಸ್ತ್ಯ ಹಾಗೂ ಇಂಚರಾ ಎಂಬ ಪಾತ್ರಗಳ ಮಧ್ಯೆ ನಡೆಯುವ ನವಿರಾದ ಪ್ರೇಮಕಥೆಯನ್ನು ಹೊಂದಿರುವ ಈ ಧಾರಾವಾಹಿಯು ಲಾಕ್ ಡೌನ್ ಅವಧಿಯಲ್ಲಿ ಹಲವು ಪ್ರೇಕ್ಷಕರ ಮನಗೆದ್ದಿತ್ತು.
ಸದ್ಯ ಕಥೆ ಕುತೂಹಲಕಾರಿಯಾಗಿದ್ದು, ಸೀರಿಯಲ್ ಪ್ರಿಯರು ಮುಂದೇನಾಗಲಿದೆ ಎಂದು ಕಾತರದಿಂದ ಕಾಯುತ್ತಿದ್ದಾರೆ. ಮನೆಯವರ ಇಚ್ಛೆಯಂತೆ ಇಂಚರಾ-ರಿಷಭ್ರ ಮಧ್ಯೆ ಮದುವೆ ನಡೆಯಬೇಕಿರುತ್ತದೆ. ಆದರೆ ಸನ್ನಿವೇಶಗಳು ಅಗಸ್ತ್ಯ-ಇಂಚರಾಳನ್ನು ಮದುವೆಯಾಗುವಂತೆ ಮಾಡುತ್ತವೆ.
ರಿಷಭ್-ಇಂಚರಾಳಿಗೆ ತಾಳಿ ಕಟ್ಟಲು ಸಿದ್ಧನಾಗಿರುವಾಗ ಅಗಸ್ತ್ಯ ಅವನಿಂದ ತಾಳಿ ಕಿತ್ತುಕೊಂಡು ಇಂಚರಾಳ ಕೊರಳಿಗೆ ಕಟ್ಟುತ್ತಾನೆ. ಮನೆಯವರು ಶಾಕ್ ಆಗುತ್ತಾರೆ. ಇತ್ತ ಅಗಸ್ತ್ಯ ಜೈಲಿಗೆ ಹೋಗುತ್ತಾನೆ. ಎರಡು ಕುಟುಂಬಗಳ ಮಧ್ಯೆ ಭಿನ್ನಾಭಿಪ್ರಾಯ ತಲೆದೋರಿದ್ದು ಇಂಚರಾಳ ಅಮ್ಮ ಮಗಳನ್ನು ಅಗಸ್ತ್ಯನ ಮನೆಗೆ ಕಳುಹಿಸಲು ಒಪ್ಪುವುದಿಲ್ಲ. ಆಕೆ ಅಮ್ಮನ ಮನೆಗೆ ಹೋಗುತ್ತಾಳೆ. ಇತ್ತ ಅಗಸ್ತ್ಯ ಜೈಲಿನಲ್ಲಿದ್ದರೆ, ಇಂಚರಾ ತಾಯಿಯ ಮನೆಯಲ್ಲಿ ಇರುತ್ತಾಳೆ. ಅಗಸ್ತ್ಯ ಜೈಲಿನಿಂದ ಹೊರಬರುತ್ತಾಳಾ, ಇಂಚರಾ ರಾಥೋಡ್ ಮನೆಗೆ ಸೊಸೆ ಆಗಿ ಹೋಗುತ್ತಾಳಾ ಅಥವಾ ಅವರಿಬ್ಬರು ಸುಖವಾಗಿ ಬದುಕು ಕಟ್ಟಿಕೊಳ್ಳುತ್ತಾರಾ ಎಂಬ ಪ್ರಶ್ನೆಗಳಿಗೆಲ್ಲಾ ಮುಂದೆ ಉತ್ತರ ಸಿಗಬೇಕಿದೆ.
ನನ್ನರಸಿ ರಾಧೆಯಲ್ಲಿ ನಾಯಕ ಅಗಸ್ತ್ಯ ರಾಥೋಡ್ ಆಗಿ ಅಭಿನವ್ ವಿಶ್ವನಾಥ್ ಹಾಗೂ ನಾಯಕಿ ಇಂಚರಾ ವೈದ್ಯರಾಗಿ ಕೌಸ್ತುಭಮಣಿ ಬಣ್ಣ ಹಚ್ಚಿದ್ದಾರೆ. ಉಳಿದಂತೆ ಸಿಹಿಕಹಿ ಚಂದ್ರು, ವೈಜಯಂತಿ ಕಾಶಿ, ವೀಣಾ ರಾವ್, ತೇಜಸ್ವಿನಿ ಮುಂತಾದವರು ತಾರಾಗಣದಲ್ಲಿದ್ದಾರೆ.
