ಪ್ರಣಯಂ ಮೂಲಕ ಕನ್ನಡಕ್ಕೆ ನೈನಾ ಗಂಗೂಲಿ ಎಂಟ್ರಿ

ಪಿ2 ಪ್ರೊಡಕ್ಷನ್ಸ್​​​ನಡಿ ಪ್ರೇಮ್ ಮತ್ತು ಪರಮೇಶ್ ನಿರ್ಮಾಣದ ಹೊಸ ಚಿತ್ರದಲ್ಲಿ ನಟ ರಾಜವರ್ಧನ್ ನಟಿಸುತ್ತಿದ್ದು, ನಾಯಕಿಯಾಗಿ ಪರಭಾಷೆ ನಟಿ ನೈನಾ ಗಂಗೂಲಿ ಆಯ್ಕೆಯಾಗಿದ್ದಾರೆ. ಈ ಚಿತ್ರಕ್ಕೆ ಪ್ರಣಯಂ ಎಂದು ಹೆಸರಿಡಲಾಗಿದೆ.

ಬಿಚ್ಚುಗತ್ತಿ ಚಿತ್ರದ ನಂತರ ನಟ ರಾಜವರ್ಧನ್ ಸದ್ದಿಲ್ಲದೇ ಇನ್ನೊಂದು ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ ಎಂಬ ಸುದ್ದಿ ಇತ್ತು. ಪಿ2 ಪ್ರೊಡಕ್ಷನ್ಸ್​​​ನಡಿ ಪ್ರೇಮ್ ಮತ್ತು ಪರಮೇಶ್ ನಿರ್ಮಾಣದ ಹೊಸ ಚಿತ್ರದಲ್ಲಿ ನಟಿಸುತ್ತಿದ್ದಾರೆ ಎಂದು ಹೇಳಲಾಗಿತ್ತು. ಕೆಲವು ದಿನಗಳ ಕಾಲ ಚಿತ್ರೀಕರಣ ಸಹ ಆಗಿ, ಲಾಕ್​​ಡೌನ್​ನಿಂದ ಚಿತ್ರೀಕರಣ ಸ್ಥಗಿತಗೊಂಡಿತ್ತು. ಇದೀಗ ಚಿತ್ರಕ್ಕೆ ಚಾಲನೆ ಸಿಕ್ಕಿದ್ದು, ಪರಭಾಷೆ ನಟಿ ನೈನಾ ಗಂಗೂಲಿ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ.

ಐದು ವರ್ಷಗಳ ಹಿಂದೆ ಬಿಡುಗಡೆಯಾದ ರಾಮ್​ಗೋಪಾಲ್ ವರ್ಮಾ ನಿರ್ದೇಶನದ ತೆಲುಗು ಚಿತ್ರ ವಂಗವೀಟಿ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ನೈನಾ ಗಂಗೂಲಿ, ಆ ನಂತರ ತೆಲುಗು ಮತ್ತು ಹಿಂದಿ ಚಿತ್ರಗಳಲ್ಲಿ ನಟಿಸಿದ್ದರು. ಮೂಲತಃ ಬಂಗಾಳಿ ನಟಿಯಾದ ನೈನಾ ಕೆಲವು ಚಿತ್ರಗಳಲ್ಲಿ ಮತ್ತು ವೆಬ್​ ಸೀರಿಸ್​ನಲ್ಲಿ ಕಾಣಿಸಿಕೊಂಡಿದ್ದಾರೆ. ಕಳೆದ ವರ್ಷ ಬಿಡುಗಡೆಯಾದ ಆರ್​ಜಿವಿ ನಿರ್ದೇಶನದ ಬ್ಯೂಟಿಫುಲ್: ಏನ್ ಓಡ್ ಟು ರಂಗೀಲಾ ಎಂಬ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆ ಚಿತ್ರದ ನಂತರ ಯಾವೊಂದು ಚಿತ್ರದಲ್ಲೂ ನಟಿಸಿರಲಿಲ್ಲ. ಇದೀಗ ಅವರು ಕನ್ನಡಕ್ಕೆ ಎಂಟ್ರಿ ಕೊಟ್ಟಿದ್ದಾರೆ.

ಇದನ್ನೂ ಓದಿ:ವೀರಸಿಂಧೂರ ಲಕ್ಷ್ಮಣ ಸೆಟ್ಟೇರುವ ಹಾಗೆ ಕಾಣುತ್ತಿಲ್ಲ: ನಿರ್ದೇಶಕ ತರುಣ್ ಸುಧೀರ್ ಮುಂದಿನ ಪ್ಲಾನ್​?

ಕನ್ನಡ ಚಿತ್ರವೊಂದರಲ್ಲಿ ನಟಿಸುತ್ತಿರುವುದಾಗಿ ನಟಿ ನೈನಾ ಗಂಗೂಲಿ ಇನ್​ಸ್ಟಾಗ್ರಾಂನಲ್ಲಿ ಘೋಷಿಸಿದ್ದಾರೆ. ಈ ಚಿತ್ರಕ್ಕೆ ಪ್ರಣಯಂ ಎಂದು ಹೆಸರಿಡಲಾಗಿದ್ದು, ಸದ್ಯದಲ್ಲೇ ಎರಡನೇ ಹಂತದ ಚಿತ್ರೀಕರಣ ಪ್ರಾರಂಭವಾಗಲಿದೆ. ಹೆಸರೇ ಹೇಳುವಂತೆ ಇದೊಂದು ಪ್ರೇಮಕಥೆಯಾಗಿದ್ದು, ರಾಜವರ್ಧನ್ ಇಮೇಜ್​​ಗೆ ತಕ್ಕ ಹಾಗೆ, ಒಂದಿಷ್ಟು ಆ್ಯಕ್ಷನ್ ದೃಶ್ಯಗಳು ಸಹ ಇರಲಿವೆ. ದತ್ತಾತ್ರೇಯ ಎಂಬ ನವ ನಿರ್ದೇಶಕ ಈ ಚಿತ್ರದ ಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ.

ಪಿ2 ಪ್ರೊಡಕ್ಷನ್​ನಡಿ ಪ್ರೇಮ್ ಮತ್ತು ಪರಮೇಶ್ ಈಗಾಗಲೇ ಓ ಗುಲಾಬಿಯೇ, ಪಾರಿಜಾತ, ಪಲ್ಲಕ್ಕಿ, ಗಣಪ ಮತ್ತು ಕರಿಯ 2 ಚಿತ್ರಗಳನ್ನು ನಿರ್ಮಿಸಿದ್ದಾರೆ. ಈ ಚಿತ್ರದ ಮೂಲಕ ಬಹಳ ದಿನಗಳ ನಂತರ ಮನೋಮೂರ್ತಿ ಸಂಗೀತ ಸಂಯೋಜನೆಗೆ ವಾಪಸಾಗಿದ್ದಾರೆ.